ފުރަތަމަ ފަހަރަށް ނުކުޅެދުންތެރިކަން ހުންނަ މީހުންނަށް ހާއްސަ މަރުކަޒެއް ގާއިމްކުރަނީ
ކޮވިޑުގެ ސަބަބުން އިޖްތިމާއީ ގޮތުންނާއި އިގްތިސާދީ ގޮތުން ގިނަ ގޮންޖެހުންތަކާއި ކުރިމަތިލި
މަޖިލީހުގެ ކޮމިޓީއެއްގައި ޖެންޑަރ މިނިސްޓަރު ވާހަކަ ދައްކަވަނީ
ރާއްޖޭގައި ފުރަތަމަ ފަހަރަށް ނުކުޅެދުންތެރިކަން ހުންނަ މީހުންނަށް އެއް ފުރާޅެއްގެ ދަށުން ހިދުމަތް ދެވޭ ގޮތަށް ''ޑިސްއެބިލިޓީ މެނޭޖްމެންޓް އެންޑް ރީހެބިލިޓޭޝަން ސެންޓަރު" ގެ ނަމުގައި ސެންޓަރެއް ގާއިމް ކުރުމުގެ މަސައްކަތް ފަށާފައިވާކަމަށް ޖެންޑަރ މިނިސްޓަރު އައިޝަތު މުހައްމަދު ދީދީ ވިދާޅުވެއްޖެއެވެ.
މިނިސްޓަރު އެކަން ހާމަކުރެއްވި، ބުރާސްފަތި ދުވަހު ފާހަގަކުރާ ނުކުޅެދުންތެރިކަން ހުންނަ މީހުންގެ ދުވަހު ދެއްވީ ހިތޯބުގައެވެ. ''އިންޓަނޭޝަނަލް ޑޭ އޮފް ޕާސަން ވިތް ޑިސްއެބިލިޓީސް" ނުވަތަ ނުކުޅެދުންތެރިކަން ހުންނަ މީހުންގެ ދުވަހަކީ 1992 ވަނަ އަހަރުން ފެށިގެން ކޮންމެ އަހަރެއްގެ ޑިސެމްބަރު މަހުގެ ތިން ވަނަ ދުވަހު ފާހަގަކުރަމުން އަންނަ ދުވަހެވެ.
މި އަހަރުގެ ޝިޔާރަކީ, ''ބިލްޑިން ބެކް ބެޓަރ: ޓުވާޑްސް އޭން އިންކްލޫސިވް، އެކްސެސިބަލް އެންޑް ސަސްޓެއިނަބަލް ޕޯސްޓު ކޮވިޑް-19 ވޯލްޑް ބައި، ފޯ އެންޑް ވިތް ޕާރސަންސް ވިތް ޑިސްއެބިލިޓީސް'' އެވެ.
މިނިސްޓަރުގެ ޚިތާބުގައި އެ ކަމަނާ ވިދާޅުވީ، ނުކުޅެދުންތެރިކަމުގެ ދުވަހެއް ފާހަގަކުރުމުގެ މައިގަނޑު މަގްސަދަކީ އެ މީހުންނަކީ މުޖުތަމައުގެ އެހެން ފަރުދުންނެކޭ އެއްފަދައިން ފުރިހަމައަށް ޝާމިލްވެވޭނޭ މާހައުލެއް ގާއިމުކުރަން ބާރުއަޅާ މިހާރަށް ވުރެ ބޮޑަށް އެފަދަ ފުރުސަތުތައް ފަހިކޮށް ދިނުމަށް މަސައްކަތްކުރުން ކަމަށެވެ.
މި އަހަރުގެ ޝިޔާރަށް އަލިއަޅުއްވާލައްވަމުން އައިޝަތު ދީދީ ވިދާޅުވީ، ކޮވިޑް-19 ގެ ސަބަބުން ނުކުޅެދުންތެރިކަން ހުންނަ މީހުންނާއި އެފަރާތްތަކުގެ އާއިލާއަށް އިޖްތިމާއީ ގޮތުންނާއި އިގްތިސާދީ ގޮތުން ގިނަ ގޮންޖެހުންތަކާއި ކުރިމަތިލާން ޖެހުނު ކަމަށެވެ. އެހެންކަމުން ކޮވިޑްގެ ސަބަބުން އެ ފަރާތްތަކަށް ދިމާވެފައިވާ ދަތިތަކާއި އެކަންތައް ހައްލު ކުރުމަށް ގިނަ މަސައްކަތްތަކެއް ކުރެވިފައިވާ ކަަމަށާއި، އަދި މިހާރުވެސް އެ މަސައްކަތްތައް ކުރެވުމުންދާކަން ފާހަގަކުރެއްވިއެވެ.
އެގޮތުން އެ ފަރާތްތަކުގެ އާއިލާތަކަށް ދިމާވި ދަތިތައް ދެނެގަނެ ފާހަގަކުރެވުނު ކަންތައްތަކާއި ގުޅިގެން އެކަންކަން ހައްލު ހޯދައިދޭން އެކަށީގެންވާ ނިޒާމުތައް އެކުލަވާލެވުނު ކަމަށާއި، އަދި މި ނިޒާމުގެ ތެރެއިން އެހީތެރިކަން ފޯރުކޮށް ދިނުމުގެ މަސައްކަތް އެޕްރީލް މަހުން ފެށިގެން ކުރެވެމުންދާކަން ފާހަގަކުރެއްވިއެވެ.
ނުކުޅެދުންތެރިކަން ހުންނަ މީހުންނަށް މުޖުތަމައުން ދޭ ސަމާލުކަން އިތުރުވެފައިވިޔަސް މުޖުތަމައުގައި ހަވާސާވެފައިވާ މިފަދަ ފަރާތްތަކަށް އަދިވެސް އެންމެ އެކަށީގެންވާ ގޮތުގައި ޝާމިލްވެ އުޅުމުގައި ތަފާތު ގޮންޖެހުންތަކެއް އެބަހުރި މިނިސްޓަރު ވިދާޅުވިއެވެ.
އައިޝަތު ދީދީ ވިދާޅުވީ، ނުކުޅެދުންތެރިކަން ހުންނަ މީހުންނަށް ހިދުމަތްތައް އެއް ފުރާޅެއްގެ ދަށުން ގާއިމްކުރާ ޑިސްއެބިލިޓީ މެނޭޖްމެންޓް އެންޑް ރީހެބިލިޓޭޝަން ސެންޓަރު ގާއިމްކުރެވިގެން ދިޔުމުން ނުކުޅެދުންތެރިކަން ހުންނަ މީހުންނަށާއި، ކުދިންނަށް ދިމާވެފައިވާ ކަންތައްތަކަށް ހައްލު ލިބިގެންދާނެ ކަމަށެވެ.
ނުކުޅެދުންތެރިކަން ހުންނަ މީހުންގެ ހައްގުތައް ކުރިއެރުވުމަށް ރައީސް އިބްރާހިމް މުހައްމަދު ސޯލިހު ދެއްވާ އަހަމިއްޔަތު މިނިސްޓަރު ފާހަގަކުރެއްވިއެވެ.
