ފިއުލް ސަޕްލައި މޯލްޑިވްސް (އެފްއެސްއެމް) ގެ މެނޭޖިންގ ޑިރެކްޓަރުކަމުގެ މަގާމާ ހަވާލުވެ، ކުންފުނީގެ ތެރެއިން ކޮރަޕްޝަންގެ އަމަލު ހިންގާފައިވާ ކަމަށް ތުހުމަތު ކުރެވޭ 25 މުވައްޒަފުން ވަކިކޮށްފައިވާނެ މުހައްމަދު ގަސަމް ވިދާޅުވެއްޖެ އެވެ.

ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިސަސް (އެސްއޯއީ) ކޮމެޓީން ބުދަ ދުވަހު ބޭއްވި ބައްދަލުވުމަށް ވަޑައިގެން އެފްއެސްއެމްގެ މެނޭޖިންގ ޑިރެކްޓަރ ގަސަމް ވިދާޅުވީ، އޭނާ މަގާމާ ހަވާލުވިއިރު، އެކުންފުނީގެ ތެރެއިން ކޮރަޕްޝަންގެ ގިނަ އަމަލުތަކެއް ހިންގާފައިވާކަން ފާހަގަކުރެވިގެން، އެމައްސަލަތައް އެކުންފުނީގެ ތެރޭގައި ތަހުޤީޤް ކުރި ކަމަށެވެ. އަދި ތަހުގީގުން ސާބިތުވާތީ، ކުންފުނީގެ އޮންނަ އުސޫލްގެ ތެރެއިން މިހާތަނަށް 25 މުވައްޒަފަކު ވަޒީފާއިން ވަކިކޮށްފައިވާ ކަމަށް އޭނާ ވިދާޅުވި އެވެ.

ގަސަމް ވިދާޅުވީ، އެ 25 މުވައްޒަފުންގެ މައްސަލަތަކުގެ ތެރެއިން ކުންފުންޏަށް މާލީ ގެއްލުންވެފައިވާ މައްސަލަތައް ފުލުހުންގެ އިދާރާއަށާއި އެންޓި ކޮރަޕްޝަން ކޮމިޝަނަށް ހުށަހަޅާފައިވާ ކަމަށެވެ.

މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ ތެރެއިން ހިންގި 8 މިލިއަން ރުފިޔާގެ ތެލުގެ ވަގު ވިޔަފާރިއާ ގުޅިގެން، އެމްޕީއެލަށް ތެޔޮ ސަޕްލައިކުރަމުންދާ އެފްއެސްއެމްގެ މުވައްޒަފުންތަކެއް އެކަމުގައި ބައިވެރިވާކަމަށް ކުރެވޭ ތުހުމަތާއި ގުޅިގެން އެސްއޯއީ ކޮމެޓީން ބޭއްވި މި ބައްދަލުވުމުގައި ގަސަމް ވިދާޅުވީ، އެމްޕީއެލްގެ އިންޓާނަލް އޮޑިޓުން ފާހަގަކޮށް، އެކުންފުނިން އެފްއެސްއެމްގެ މުވައްޒަފެއްގެ ނަން ބަޔާންކޮށް ހުށަހަޅާފައިވާކަމަށެވެ. އަދި ވަގުތުން އެމުވައްޒަފަށް ކުރެވޭ ތުުހުމަތުތަކަށް ބެލުމަށްފަހު، ސަސްޕެންޑް ކޮށްފައިވާ ކަމަށެވެ. އެ މައްސަލާގައި އިތުރު ބަޔަކު ސާމިލްވޭތޯ އާއި، އެމްޕީއެލްގެ ތެރެއިން ހިންގާފައިވާ ތެލުގެ ވައްކަމާ ގުޅޭގޮތުން ކުންފުނީގެ ތެރޭގައިވެސް ބެލުންތަކެއް ބަލަމުންދާކަމަށް ގަސަމް ވިދާޅުވި އެވެ.

ކޮމެޓީގައި އެފްއެސްއެމްގެ އިންޓާނަލް އޮޑިޓުގެ ފަރާތުން ވާހަކަދެއްކެވި ބޭފުޅުން ވިދާޅުވީ އިންޓާނަލް އޮޑިޓާއި ތަހުގީގު ކުރިއަށްދާ ކަމަށާއި މިމައްސަލައަކީ އެއްދުވަހުން ދެވަހުން ހިންގާފައިވާ ހިޔާނާތެއް ނޫންކަމަށެވެ. އަދި މިއީ ގިނަ ދުވަސްތަކެއްގެ މަތިން ހިންގާފައިވާ ވައްކަމެއްކަން ފާހަގަ ކުރެވޭ ކަމަށެވެ. އެހެންކަމުން މިމައްސަލައަށް ހާއްސަ އިސްކަމެއް ދެއްވައިގެން ވީހާވެސް އަވަހަކަށް ނިންމާލެވޭތޯ މަސައްކަތް ކުރަމުންދާ ކަމަށް އެބޭފުޅުން ވިދާޅުވި އެވެ.

ގަސަމް ވިދާޅުވީ، އެމްޕީއެލްގެ ތެރެއިން ހިންގާފައިވާ 8 މިލިއަން ރުފިޔާގެ ތެލުގެ ހިޔާނާތަކީ އެފްއެސްއެމްގެ މުވައްޒަފުން ބައިވެރިވެގެން ހިންގާފައިވާ އެންމެބޮޑު ހިޔާނާތް ކަމަށެވެ. މިހާތަނަށް މިވަރުގެ ހިޔާނާތެއް އެފްއެސްއެމްގެ މުވައްޒަފެއް ނުވަތަ މުވައްޒަފުންތަކެއް ބައިވެރިވެގެން ހިންގާފައި ނުވާކަމަށާއި، މިއީ އިތުރަށް ކަންކަން އިސްލާހު ކުރުމަށް ލިބުނު ފިލާވަޅެއް ކަމަށްވެސް ގަސަމް ވިދާޅުވި އެވެ. ނަމަވެސް ގަސަމް ވިދާޅުވީ، މިހިޔާނާތަކީ އެމްޕީއެލްގެ ތެރެއިން ހިންގާފައިވާ ހިޔާނާތަކަށްވާއިރު، އެމްޕީއެލަށް ބޭނުންވާ ތެޔޮ އިންތިހާއަށް އިތުރުވެގެންގޮސް، އެމްޕިއެލްގެ މެނޭޖްމަންޓަށް ނޭނގި އޮތުމަކީ ކަންބޮޑުވާ ކަމެއް ކަމަށެވެ.

މީގެއިތުރުން ގަސަމް ވިދާޅުވީ، އެމްޕީއެލަށް ބޭނުންވާ ތެޔޮ ސަޕްލައި ކުރުމުގައި ކުރިއަށް އޮތްތަނުގައި އަމަލު ކުރާނެ ގޮތަކާއި، ހިޔާނާތާއި ކޮރަޕްޝަނަށް މަގުފަހި ނުވާނެ ގޮތަށް ކަންކަން ބައްޓަން ކުރުމަށް އެމްޕީއެލްގެ މެނޭޖްމަންޓާއެކު މަޝްވަރާ ކުރެއްވުމަށް އެކުންފުނީގެ މެނޭޖްމަންޓަށް ދައުވަތު ދެއްވާފައިވާ ކަމަށެވެ.

ކޮމެޓީގެ މިބައްދަލުވުމުގައި ގަސަމް ވިދާޅުވީ، އެފްއެސްއެމްގެ ތެރެއިން ކޮރަޕްޝަނާއި ހިޔާނާތް ހިންގުމަށް އެއްވެސް ފުރުސަތެއް ނުދެއްވާނެ ކަމަށާއި މޫނަށް ކަނދުރާއަށް ބެލުމެއް ނެތި، އެފަދަ ކަންކަން ކުރާ މުވައްޒަފުންނާމެދު ވަގުތުން ފިޔަވަޅު އަޅުއްވަމުން ގެންދަވާނެ ކަމަށެވެ.