ރިސޯޓުތަކަށް އިމާމުން ތަމްރީނު ކުރުމުގެ ޕްރޮގްރާމެއް ފައްޓައިފި
ކޯސް ހިންގަން ހަމަޖެހިފައި ވަނީ 4 ހަފްތާއަށް
ރާއްޖޭގެ ރިސޯޓެއް
ޓުއަރިޒަމް މިނިސްޓްރީ އާއި މިނިސްޓްރީ އޮފް އިސްލާމިކް އެފެއާޒް އާއި ގުޅިގެން ރިސޯޓުތަކަށް އިމާމުން ތަމްރީނު ކުރުމުގެ ޕްރޮގްރާމެއް ފައްޓަވައިފި އެވެ.
ޕްރޮގްރާމް އިފްތިތާޙް ކޮށްދެެއްވުމުގެ ރަސްމިއްޔާތު ބާއްވާފައިވަނީ ވާރޗުއަލްކޮށެވެ. މި ރަސްމިއްޔާތުގައި ޓޫރިޒަމް މިނިސްޓަރ ޑރ. އަބްދުﷲ މައުސޫމް، މިނިސްޓަރ ޑރ. އަހްމަދު ޒާހިރު އަލީ އާއި އައްޝައިޙް ނަސްރުﷲ އަލީ އާއި އައްޝައިޙް އިބްރާހިމް ރަޝީދުގެ އިތުރުން ރިސޯޓު ތަކުގެ ބައެއް މުއައްޒަފުންގެ އިތުރުން ދެ މިނިސްޓްރީގެ ބައެއް އިސްވެރިން ވަނީ ބައިވެރި ވެފައެވެ.
ޕްރޮގްރާމުގެ ތައާރަފެއް ދެއްމުން އައްޝައިޙް ނަސްރުﷲ އަލީ ވިދާޅުވީ މި ކޯސް ހިންގޭނީ އެކިއެކި ބެޗް ތަކަށް ބަހާލައިގެން 4 ހަފްތާގެ މުއްދަތަކަށް ކަމަށާއި އަދި ކޮންމެ ބެޗްއެއްގައިވެސް ބައިވެރިވެވޭނީ 20 މީހުންނަށް ކަމަށެވެ. އަދި މި ކޯހުގައި އުގަންނައިދޭން ހަމަޖެހިފައި ވަނީ ކޮންމެހެން އިމާމަކަށް އިނގެން މަޖުބޫރު ބައިތައް ކަމަށް ޝެއިޙް ވިދާޅުވިއެވެ. އެގޮތުން މި ކޯހުގައި ހިމަނާފައިވާ ބައިތަކު ތެރޭގައި އަންމާފޮތް ފަރިތަކޮށް ކިޔަވަން ދަސްކުރުން، ފިޤުހު، ނަމާދުގެ އާންމު ހުކުމް ތަކާއި ޙުތުބާ ކިޔުމާއި ރާގައް ބަންގި ގޮވުމާއި ރީއްޗަށް ޤުރުއާން ކިޔެވުމުގެ އިތުރުން ތަރާވީސް ނަމާދު ކުރުމަށް ޓްރެއިނިންގ ދިނުން ހިމެނެއެވެ. މި ކޯހުގައި ބައިވެރިވެވޭނީ ކޮންމެ ރިސޯޓަކުންވެސް ދެ މުއައްޒަފަކަށެވެ.
މީގެ އިތުރުން މި ރަސްމިއްޔާތުގައި މިނިސްޓަރ ޒާހިރު ވާހަކަ ދައްކަވަމުން ވިދާޅުވީ މި ޕްރޮގްރާމުގެ އެންމެ ބޮޑު އެއް މަޤްސަދަކީ ރިސޯޓުގެ މުއައްޒަފުން އިމާމުންނަށްވުމަށް ޓްރެއިނިންގ ދިނުން ކަމަށެވެ. ސަބަބަކީ މޫސުންގޯސްވެ ނުވަތަ އެހެން ހާލަތެއްގައި ނަމަވެސް ރިސޯޓްއަށް ކައިރި ރައްރަށުން އިމާމުން ނުގެނެވިދާނެ ހާލަތު މަދުން ނަމަވެސް ދިމާވާ ކަމަށާއި މި ޕްރޮގްރާމުގެ ދަށުން މިކަމަށް ހައްލެއް ލިބިގެން ދާނެ ކަމަށް މިނިސްޓަރ ވިދާޅުވިއެވެ.
އެގޮތުން މި ޕްރޮގްރާމް ހިންގާނީ މަސްދުވަހުގެ މުއްދަތައް ކަމަށާއި މި ޕްރޮގްރާމު އެކި ސެޝަން ތަކަކަށް ބަހާލެވިގެން ކުރިއަށް ގެންދަން ހަމަޖެހިފައި ވާއިރު ހުރިހާ ސެޝަން ތަކުގައި ބައިވެރި ވެގެން ނޫނީ ކޯސް ފުރިހަމަ ވެގެން ނުދާނެ ކަމަށް މިނިސްޓަރުގެ ވާހަކައިގައި ފާހަގަ ކުރައްވާފައިވެ އެވެ. އަދި ކޯސް ފުރިހަމަ ކުރުމުން ސެޓްފިކެޓްއެއް ލިބިގެން ދާނެ ކަމަށާއި ސެޓްފިކެޓް ހާސިލް ވުމުން ރާއްޖޭގެ ކޮންމެ ރިސޯޓެއްގައި ވެސް އިތުރު ހުއްދައަކާއި ނުލާ އިމާމް ކުރުމުގެ ފުރުސަތު ލިބިގެން ދާނެ ކަމަށް މިނިސްޓަރ ވިދާޅުވިއެވެ.
މި ރަސްމިއްޔާތުގައި ވާހަކަ ދައްކަވަމުން މިނިސްޓަރ މައުސޫމް ވިދާޅުވީ މިފަދަ ޕްރޮގްރާމެއް އެހާ ފުރިހަމަ ކޮށް އެހާ ކުރު މުއްދަތެއް ތެރޭގައި ތައްޔާރު ކޮށްދެއްވި ކަމަށްޓަކައި އިސްލާމިކް މިނިސްޓްރ އަށާއި އެމިނިސްޓްރީގެ ޓީމަށް ޝުކުރު އަދާ ކުރާ ކަމަށެވެ.
އަދި މިފަދަ ޕްރޮގްރާމަކަށް ރިސޯޓުގެ މުއައްޒަފުން ދެއްވި އަހަންމިއްޔަތުކަމާއި މެދު ވާހަކަ ދައްކަވާ މިނިސްޓަރ ވިދާޅުވީ ކުރު މުއްދަތެއްގެ ތެރޭގައި 85 ރިސޯޓަކުން 169 މީހަކު މި ޕްރޮގްރާމުގައި ބައިވެރިވެފައި ވާކަމަށާއި މީގެންވެސް ދައްކުވައިދެނީ މިފަދަ ޕްރޮގްރާމަކަށް މުއައްޒަފުންގެ ހިތްތަކުގައި އުފެދިފައިވާ ޝައުޤުކަމަށެވެ.
