ދުވާލެއްގެ މައްޗަށް ނަގުދު ފައިސާ ނެގޭ މިންވަރު 200،000 ރުފިޔާ އަށް!
މިބަދަލު ގެންނާނީ ޑިސެންބަރު މަހުގެ 31 ވަނަ ދުވަހުން ފެށިގެން
މޯލްޑިވްސް މަނިޓަރީ އޮތޯރިޓީ (އެމްއެމްއޭ)
ރާއްޖޭގައި ދުވާލެއްގެ މައްޗަށް ނަގުދު ފައިސާ ނެގޭ މިންވަރު 200،000 ރުފިޔާއަށް ހިފެހެއްޓުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ނިންމައިފިއެވެ.
އެމްއެމްއޭއިން ބުނީ މިގޮތަށް ނިންމީ ޑިޖިޓަލް ވަސީލަތްތައް ބޭނުންކޮށްގެން ފައިސާގެ މުޢާމަލާތްތައް ކުރިއަށް ގެންދިއުމަށް ހިތްވަރު ދިނުމުގެ ގޮތުން ކަމަށާއި މިބަދަލު ޑިސެންބަރު މަހުގެ 31 ވަނަ ދުވަހުން ފެށިގެން ގެންނާނެ ކަމަށެވެ.
އެހެންކަމުން މި ބަދަލާއެކު ނަޤުދު ފައިސާ ބޭނުންކުރުމުން ވިޔަފާރިތަކަށް ކުރިމަތިވާ ހިރާސްތައް ކުޑަކުރެވި މަދުކުރެވޭނެ ކަމަށްވެސް އެމްއެމްއޭއިން ބުންޏެވެ. އަދި މިއީ ޑިޖިޓަލް އަދި އިލެކްޓްރޯނިކް މުއާމަލާތްތައް އިތުރުކުރުމަށް ހިތްވަރު ލިބޭނެ ބަދަލަކަށްވާނެ ކަމުގައިވެސް އެމްއެމްއޭއިން ބުންޏެވެ.
މިހާތަނަށް ރާއްޖޭގައި ދުވާލެއްގެ މައްޗަށް ނަޤުދު ފައިސާ ނެގޭނެ ވަކި މިންވަރެއް އެމްއެމްއޭއިން ކަނޑައަޅާފައެއް ނޯވެ އެވެ. އެހެންނަމަވެސް ވަކި ވަކި ބޭންކުތަކުން ވަކި އަދަދުތަކަށް ލިމިޓެއް ގެންގުޅެމުންގޮސްފައިވެ އެވެ.
މި މަހުގެ 31 ވަނަ ދުވަހުން ފެށިގެން ނަގުދު ފައިސާ ނެގޭނެ މިންވަރު ކަމުގައި ހަމަޖައްސާފައިވާ 200،000 ރުފިޔާގެ ސަބަބުން ބޮޑެތި އަދަދުތަަކުން ފައިސާ އެއްތަނުން އަނެއް ތަނަށް އުފުލުމުގެ ތެރެއިން ދިމާވާ ކަންކަން ހައްލުވެގެންދާނެ އެވެ.
