ރާއްޖޭގައި އެއިޑްސް ފެތުރެން މަގުފަހިވާ ފަދަ އާދަތައް ފެންނަން އެބަހުރި - ހެލްތް މިނިސްޓަރ
މިނިސްޓަރ ވިދާޅުވީ ބަލި ފެތުރުން ހުއްޓުވުމަށް ކަމާ ގުޅުންހުރި އިދާރާތަކުގެ މަސައްކަތްތައް ހަރުދަނާ ކުރުމަށް ވިސްނަންޖެހޭކަމަށް
މިނިސްޓަރ އޮފް ހެލްތް އަޙްމަދު ނަސީމް
ރާއްޖޭގައި ކުރެވިފައިވާ އެސެސްމަންޓްތަކާއި ދިރާސާތަކުން ދައްކާ ގޮތުގައި ރާއްޖޭގައި އެއިޑްސް ބަލި ފެތުރިގެން ދިޔުމަށް މަގުފަހިވާ ފަދަ އާދަތައް ފެންނަން އެބަހުރިކަމަށް މިނިސްޓަރ އޮފް ހެލްތް އަޙްމަދު ނަސީމް ވިދާޅުވެއްޖެއެވެ.
މިނިސްޓަރ އަޙްމަދު ނަސީމް މިހެން ވިދާޅުވީ ދުނިޔޭގެ އެއިޑްސް ދުވަސް 2020، ފާހަގަކުރުމުގެ ގޮތުން އަންގާރަ ދުވަހު ދެއްވި ހިތާބުގައެވެ. މިނިސްޓަރ އިތުރަށް ވިދާޅުވީ އެޗްއައިވީ ނުވަތަ އެއިޑްސްއަކީ އިސްކަންދޭ ކަމެއްގެ ގޮތުގައި ބާއްވާ، އެއިޑްސްއާއި ގުޅޭގޮތުން ހޭލުންތެރިކަން އިތުރުކުރުމާއި ރާއްޖޭގައި މި ބަލި ފެތުރުން ހުއްޓުވުމަށްޓަކައި ކަމާ ގުޅުންހުރި އިދާރާތަކުން ކުރެވޭ މަސައްކަތްތައް އިތުރަށް ހަރުދަނާ ކުރުމަށް ވިސްނަންޖެހޭކަމަށެވެ.
މިހާރުވެސް ރާއްޖޭގައި މިކަމާ ދެކޮޅަށް ގިނަ މަސައްކަތްތަކެއް ކުރެވެމުން ދާކަން ފާހަގަކޮށް މިނިސްޓަރ ނަސީމް ވިދާޅުވީ، މި ބައްޔަށް ދެވޭ ފަރުވާ އަދި ފަރުވާއަށް ބޭނުންވާ އެހެނިހެން ވަސީލަތްތައް ހަމަޖައްސާފައިވަނީ ސަރުކާރުގެ ފަރާތުން ހިލޭ ފޯރުކޮށްދެވޭ ޚިދުމަތެއްގެ ގޮތުގައި ކަމަށް މިނިސްޓަރ ވިދާޅުވިއެވެ.
މިނިސްޓަރ ނަސީމް އިތުރަށް ވިދާޅުވީ މި ދުވަސް ފާހަގަކުރުމުގެ މަޤްސަދުތަކުގެ ތެރޭގައި އެއިޑްސްއާ ދެކޮޅަށް ކުރެވެމުންދާ މަސައްކަތްތަކުގެ އަގުވަޒަންކުރުން ހިމެނޭ ކަމަށެވެ. އަދި މި ބައްޔަށް ފަރުވާދިނުމަށް މަސައްކަތް ކުރަނީ މި ބަލިންކުރާ އަސަރަށް ވަރަށް ބޮޑަށް ރިއާޔަތްކުރެވިގެން ކަމަށް ނަސީމް ވިދާޅުވިއެވެ. އެގޮތުން މި މަސައްކަތުގައި ހަރަކާތްތެރިވާ އެންމެހާ ފަރާތްތަކަށް ދުވަހުގެ މުނާސަބަތުގައި ކުރައްވާ ބުރަ މަސައްކަތަށް ހިތްވަރާއި ސާބަސް ދެއްވިއެވެ.
މިނިސްޓަރުގެ ހިތާބުގައި، ރާއްޖޭގައި އެޗްއައިވީ ޓެސްޓްކުރުމުގައި ގެންގުޅެނީ "ކޮންމެ މީހަކަށްވެސް ހިލޭ އެޗްއައިވީ ޓެސްޓެއް ކުރުމަށް އެދެވިދާނެ، އަދި އެކަން ކޮށްދެވޭނެ" ކަމުގެ ސިޔާސަތު ކަމުން ވީހާވެސް ގިނަ ބޭފުޅުން އެޗްއައިވީއަށް ޓެސްޓްކޮށް ބަލި ނެތްކަން ދެނެގަނެގެން ތިބުންކަމަށް އިލްތިމާސްކުރެއްވިއެވެ.
އޭގެ އިތުރުން އެޗްއައިވީ ބަލިމީހުންނާ ދޭތެރޭ މުޖުތަމައުން ދެކޭގޮތާއި ތަފާތުކުރުން ނައްތާލާ އެ ފަރާތްތަކަށް ބޭނުންވާ އެހީތެރިކަން ފޯރުކޮށްދިނުމަށްވެސް މިނިސްޓަރ ގޮވާލެއްވިއެވެ. އަދި ދިވެހިރާއްޖެއަށް ލިބިފައިވާ 'މައިމީހާގެ ފަރާތުން ދަރިފުޅަށް އެޗްއައިވީ ޖެހުން ނައްތާލެވިފައިވާ ޤައުމެއް' ގެ ނަން އެ ގޮތުގައި ދެމެހެއްޓުމާއެކު، އެކަން އެގޮތަށް ދެމިއޮތުން ކަމަށްވެސް މިނިސްޓަރ ވަނީ ވިދާޅުވެފައެވެ.
މި އަހަރުގެ އެެއިޑްސް ދުވަހުގެ ޝިއާރަކީ "ގްލޯބަލް ސޮލިޑަޓަރީ، ޝެއާރޑް ރެސްޕޮންސިބިލިޓީ" ކަން ފާހަގަކުރައްވާ މިނިސްޓަރ ވިދާޅުވީ ބައިނަލްއަޤްވާމީ ފެންވަރުގައި މި ޝިއާރު ކަނޑައަޅާފައިވަނީ މިހާރު މުޅިދުނިޔެއަށް ދިމާވެފައިވާ ކޮވިޑް-19 ގެ ހާލަތާ ގުޅުވައިގެން ކަމަށެވެ.
