ފަލަސްތީނުގެ ރައްޔިތުންނާއެކު ފޮރިން މިނިސްޓަރ އަބްދުﷲ ޝާހިދު ސާބިތުވެ ހުންނެވީތީ ޝުކުރުވެރިވާކަމަށާއި، އަލްއަޤްޞާގައި އެކުގައި ނަމާދު ކުރެވޭނެކަމުގެ ޔަޤީންކަން އެބައޮތް ކަމަށް ފަލަސްތީނުން ދިވެހިރާއްޖެއަށް ކަނޑައަޅާފައި ހުންނަވާ ސަފީރު ވަލީދު އަބޫ އަލީ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ "އިންޓަނޭޝަނަލް ޑޭ އޮފް ސަލިޑާރިޓީ ވިތް ދަ ފަލަސްތީން ޕީޕަލް" ގެ މުނާސަބަތުގައި ފޮރިން މިނިސްޓަރ އަބްދުﷲ ޝާހިދު ކުރެއްވި ޓްވީޓަކަށް ޖަވާބު ދެއްވަމުންނެވެ. މިނިސްޓަރ ޝާހިދު ވިދާޅުވީ ދިވެހިރާއްޖެއިން އަބަދުވެސް ތިބޭނީ ފަލަސްތީނުގެ ރައްޔިތުންނާއި އެކުގައި ކަމަށާއި، މެދުއިރުމަތީގެ ހަމަޖެހުމާއި ކުރިއެރުމަށް ފަލަސްތީނުގައި ސުލްހަ ގާއިމްވާން ޖެހޭކަމަށެވެ.

ދިވެހިރާއްޖެއަކީ ފަލަސްތީނުގެ މިނިވަންކަމަށް މެދުނުކެނޑި ވަކާލާތުކުރަމުންދާ ޤައުމެކެވެ. އެގޮތުން 1967 ވަނަ އަހަރު ކުރެހުނު ސަރަހައްދީ އިމުގެ މައްޗަށް ބިނާވެގެންވާ ފަލަސްތީނުގެ މިނިވަން ދައުލަތެއް ޤާއިމްކުރެވި، އެ ދައުލަތުގެ ވެރިރަށަކީ އިރުމަތީ ޤުދުސްކަމުގައި ވާން ޖެހޭކަމަށާއި، އިޒްރޭލުން ފޭރުނު ބިންތަކަށް ފަލަސްތީނުގެ ރެފިއުޖީންނަށް އަނބުރާ އާދެވެން ޖެހޭކަމަށް ދިވެހިރާއްޖެއިން ދަނީ ވަކާލާތުކުރަމުންނެވެ.

ފޮރިން މިނިސްޓަރ އަބްދުﷲ ޝާހިދު މަޤާމާ ހަވާލުވެވަޑައިގަތުމަށްފަހު އެންމެ ފުރަތަމަ ބައްދަލުކުރައްވާފައިވަނީ ފަލަސްތީނުން ފަލަސްތީނުގެ ޚާރިޖީ ވަޒީރު ރިޔާދް މާލިކް އާއެވެ.

އަދި އޭގެ ފަހުންވެސް އެކި ފަހަރުމަތިން ފަލަސްތީނުގެ ޚާރިޖީ ވަޒީރާ ބައްދަލުކުރައްވާފައިވާއިރު، ފަލަސްތީނުގެ މިނިވަންކަމަށް ބައިނަލްއަޤްވާމީ ފޯރަމްތަކުގައި މެދުކެނޑުމެއްނެތި މިނިސްޓަރ ޝާހިދު ގެންދަވަނީ ގޮވާލައްވަމުންނެވެ.

ނިމިދިޔަ ހަފްތާގައި ނައިޖަރގެ ވެރިރަރަށް ނިއާމޭގައި ބޭއްވި އޯއައިސީ ޚާރިޖީ ވަޒީރުންގެ ބައްދަލުވުމުގައިވެސް މިނިސްޓަރ ޝާހިދު ވަނީ ފަލަސްތީނުގެ ރައްޔިތުންގެ ހައްގުގައި އަޑުއުފުއްލަވާފައެވެ.