ދިވެހި ރައްޔިތުންގެ އުފަންދުވަހުގެ ރަޖިސްޓްރީ އާއި، ރައްވެހިންގެ ރަޖިސްޓްރީ އަދި ގޯތި ގެދޮރުގެ ރަޖިސްޓްރީ ބަލަހައްޓަން ލޯކަލް ގަވަރމަންޓް އޮތޯރިޓީއިން އެންސީއައިޓީ އާއި ގުޅިގެން ތައްޔާރުކުރި އީ-ކައުންސިލްގެ ގެމެން މޮޑިއުލްގެ މަސައްކަތް ކުރިއަށްދާއިރު ދަތިތަކެއް އެބަހުރި ކަމަށް މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޯލޮޖީން ބުނެފިއެވެ.
"ރާއްޖެއެމްވީ" އާއި ވާހަކަދައްކަވަމުން މިނިސްޓަރ އޮފް ސްޓޭޓް ފޮރ ކޮމިއުނިކޭޝަން، ސައިންސް އެންޑް ޓެކްނޯލޮޖީ އަލީ ސާލިހު ވިދާޅުވީ ގެމެން މޮޑިއުލްއަކީ މުއައްސަސާތަކަށް ދުވުމުގެ ބަދަލުގައި ރަޖިސްޓްރޭޝަން ކަންތައް އެއް ޕްލެޓްފޯމަކަށް ގެނެސްފައިވާ ޕޯޓަލް އެއް ކަމަށާއި ޚިދުމަތްތައް ޑިޖިޓަލައިޒް ކުރުމަށް ދިމާވެފައިވާ މައްސަލައަކީ މީގެ ކުރިން ހުރިހާ ރެކޯޑްސްތައް ބަލަހައްޓާފައިވަނީ މެނުއަލްކޮށް ކަމަށް ވުމުންނެވެ.
އެހެންކަމުން މި ވަގުތު މި ޙިދުމަތްތައް ރައްޔިތުންނާއި ހަމައަށް އެންމެ ފުރިހަމަ ގޮތުގައި ފޯރުކޮށްދިނުމަށްޓަކައި ކުރަމުންދާ އެއް މަސައްކަތަކީ ހުރިހާ ޑޭޓާތަކެއް އެއް ކުރުން ކަމަށް ވިދާޅުވިއެވެ. ނަމަވެސް ޑޭޓާތައް އެންޓަރ ކުރުމަށް ގިނަ ވަގުތު ނަގާ ކަމަށާއި މި މަސައްކަތް ކުރުމަށް މުވައްޒަފުންގެ ދަތިކަން ކައުންސިލްތަކުގައި އެބަހުރި ކަމަށް އަލީ ސޯލިޙް ވިދާޅުވިއެވެ.
ކައުންސިލްތަކުން އާބާދީއާއި ގުޅޭ މައުލޫމާތު ވަކިވަކިން ކަރުދާހުގައި ބެލެހެއްޓުމުގެ ސަބަބުން ރިކޯޑްތަކުގައި އެކި މައްސަލަތައް ދިމާވުމާއި، މައްސަލަތަކުގައި ހޭދަކުރަންޖެހޭވަގުތާއި ޙަރަދު އިންތިހާއަށް ބޮޑު. ގެމެން މޮޑިއުލްއިން މި މައްސަލަތަކަށް ހައްލެއް ގެނެވޭނެ. މުޅި ރާއްޖެއަށް ވިހާ، މަރުވާ މީހުންގެ މައުލޫމާތު އެއް ސިސްޓަމެއްގައި އެއްގޮތަކަށް ބެލެހެއްޓޭނެ.~ މިނިސްޓަރ އޮފް ސްޓޭޓް ފޮރ ކޮމިއުނިކޭޝަން، ސައިންސް އެންޑް ޓެކްނޯލޮޖީ އަލީ ސާލިހު
މި ހުރިހާ މައުލޫމާތު އެއް ކުރެވި ޚިދުމަތްދޭން ފެށުމުން އުފަންދުވަހުގެ ރަޖިސްޓްރީ އާއި، ރައްވެހިންގެ ރަޖިސްޓްރީ އަދި ގޯތި ގެދޮރުގެ ރަޖިސްޓްރީގެ ކަންކަމުގައި ކިއުގައި ޖެހިގެން ރައްޔިތުން އެއްވެސް ކަމެއް ކުރަން ނުޖެހޭ ކަމަށްވެސް އޭނާ ވިދާޅުވިއެވެ.
ގެމެންގެ ސަބަބުން ޑިޕަރޓްމަންޓް އޮފް ނޭޝަނަލް ރަޖިސްޓްރޭޝަނަށް ރާއްޖޭގެ އާބާދީއާއި ގުޅޭ މައުލޫމާތު ވަގުތުން ވަގުތަށް އިނގޭނޭ މަގުފަހިވެފައެވެ. މިއާއެކު އާބާދީއާއި ގުޅޭ ތަފާސްހިސާބުތައް ބެލެހެއްޓުމަށް ނޭޝަނަލް ބިއުރޯ އޮފް ސްޓެޓިސްޓިކްސް އަށް ވަނީ ވަރަށް ބޮޑަށް ފަސޭހަވެފައެވެ.
އެގޮތުން ކުރިމަގުގައި ސަރުކާރުގެ އެހެން އިދާރާތައް ބޭނުންވާ އާބާދީއާއި ގުޅޭ މުހިންމު މައުލޫމާތު ފަސޭހަކަމާއިއެކު ލިބި، ސަރުކާރުގެ މަސައްކަތްތަކުގެ ދުވެލިއާއި ފެންވަރު ގެމެން މޮޑިއުލްގެ އެހީގައި އިހުނަށް ވުރެން ރަނގަޅުވުން ވެގެންދާނީ މި ޕްރޮޖެކްޓްގެ އެންމެ މައިގަނޑު މަޤްސަދު ޙާސިލްވުންކަމުގައި އަލީ ސޯލިޙް ފާހަގަކުރެއްވިއެވެ.
އެގޮތުން މި ވަގުތުވެސް އަލަށް އުފަންވާ ކުދިންގެ ފޫޅުމައި ފޯމް މިޕޯޓަލް މެދުވެރިކޮށް ހޮސްޕިޓަލް ފުރާނެ ކަމަށާއި އެ ހިސާބުން ކައުންސިލްއާއި އައިޑީކާޑު ޔުނިޓް އަދި ހެލްތް މިނިސްޓްރީއަށް މި މައުލޫމާތު ވަގުތުން ލިބޭނެއެވެ. އަދި ކުއްޖާގެ ބެލެނިވެރިޔާ މިހާރު ކައުންސިލްއަށް ދާންޖެހޭނީ ކުއްޖާގެ ނަން ފާސްކޮށްގެން އުފަންދުވަހުގެ ސެޓްފިކެޓް ބަލާ އެކަނި ކަމަށާއި އަދި ފޮޓޯ ހިފައިގެން ދިއުމުން ކުއްޖާގެ އައިޑީ ކާޑުވެސް ހެއްދޭނެ ކަމަށް އަލީ ސޯލިޙް ވިދާޅުވިއެވެ.
އެހެންކަމުން މި ސިސްޓަމްގެ ސަބަބުން ރައްޔިތުންނަށް ކައުންސިލްތަކުން ފޯރުކޮށްދެމުންދާ ވަރަށް މުހިއްމު ޙިދުމަތެއް ޑިޖިޓަލް ކުރެވި މައުލޫމާތު ރައްކާތެރިކޮށް ބެލެހެއްޓޭނެ ނިޒާމެއް ޤާއިމުކުރެވޭނެއެވެ. މިފަދަ މުހިއްމު މައުލޫމާތު މިހާތަނަށް ގެންގުޅެމުން އައިސްފައިވަނީ ކަރުދާހުގައެވެ.
އޭގެ އިތުރުން ސިއްޙީ ޙިދުމަތްދޭ އިދާރާތަކުން ގެމެން ސިސްޓަމަށް ވަގުތުން އެޅޭނެހެން ހުރުމުން، މިނިސްޓްރީ އޮފް ހެލްތުން މައުލޫމާތު ކަށަވަރުކޮށް ވަގުތުން އިސްލާހުކުރަން ފަސޭހަވެގެންދެއެވެ. ގެމެން މޮޑިއުލް މެދުވެރިކޮށް މިހާތަނަށް 1000ށް ވުރެ ގިނަ ރިކޯޑް ޕްރޮސެސް ކުރެވިފައި ކަމަށާއި މިއީ ރާއްޖޭގެ ވިހާމަރުވާ ރިކޯޑް ބެލެހެއްޓުމުގެ މަސައްކަތް ޑިޖިޓަލައިޒް ކުރުމަށް ކުރެވޭ މަސައްކަތުގައި ލިބުނު ވަރަށްވެސް ބޮޑު ކާމިޔާބީއެއް ކަމަށްވެސް އަލީ ސޯލިޙް ފާހަގަކުރެއްވިއެވެ.
ގެމެން ސިސްޓަމް ވަރަށް ރަނގަޅު ޙިދުމަތެއް. ނަމަވެސް މި ވަގުތު މުވައްޒަފުންގެ ދަތިކަން ހުރުމުން ބޭނުންވާ ހުރިހާ ކަމެއް ފުރިހަމަ ނުވެ މިދަނީ. ޑޭޓާތައް އެއް ކުރެވުމުން ވަރަށް ގިނަ ކަންކަމަށް ލުއި ފަސޭހަތަކެއް ލިބިގެންދާނެ. އެ މަސައްކަތް މިހާރު ކައުންސިލްތަކުން ކުރަމުން ގެންދަނީމިނިސްޓަރ އޮފް ސްޓޭޓް ފޮރ ކޮމިއުނިކޭޝަން، ސައިންސް އެންޑް ޓެކްނޯލޮޖީ އަލީ ސާލިހު
އަދި މަރުވާ މީހުންގެ މައުލޫމާތުވެސް މި ސިސްޓަމަށް ވަގުތުން އަޕްލޯޑް ކުރެވޭނެ ކަމަށާއި އެ ހިސާބުން ޕެންޝަން އޮފީހަށްވެސް އެ މައުލޫމާތު ހިއްސާކުރެވިގެންދާނެ ކަމަށް އަލީ ސޯލިޙް ވިދާޅުވިއެވެ. އެހެންކަމުން ކުރިއަށް އޮތް މަދު ދުވަސްކޮޅުގެ ތެރޭގައި ގެމެން ސިސްޓަމުން ރައްޔިތުންނަށް ވަރަށް ގިނަ ކަންކަމުގައި ލުއި ފަސޭހަތަކެއް ލިބިގެންދާނެއެވެ.
މި މަސައްކަތަކީ ހުރިހާ އެންމެން ގުޅިގެން ރައްޔިތުންނަށް ލުއިފަސޭހަ ގޮތެއްގައި ޒަމާނީ ވަސީލަތްތައް މެދުވެރިކޮށް ޙިދުމަތް ލިބިގަތުމަށް ފަހިކޮށްދިނުމަށް ފެށުމެއް ކަމާއި އަދި ސިޓީ ކައުންސިލްތަކުގެ ބާރުތައް ނަގައި މިނިސްޓްރީތަކަށް މައްސޫލިއްޔަތުތައް ބަދަލުކޮށް ހެދިއިރު އާބާދީއާއި ގުޅުންހުރި މިފަދަ މުހިންމު ލިޔެކިޔުންތަކުގެ ރަސްމީ ރިކޯޑްތައް ގެއްލޭނެހެން ދެން އަމަލުނުކުރެވޭކަން އަލީ ސާލިހު ފާހަގަ ކުރެއްވިއެވެ.
"ގެމެން" މި ސިސްޓަމް ފުރިހަމަ މާނާގައި ބޭނުންކުރަން ފެށުމުން ޙިދުމަތެއް ހޯދުމަށް ގޯތީގެ ރަޖިސްޓްރީ ފޮޓޯ ކޮޕީ ހައްދައި އެތަކެއް ބައެއްގެ އަތްމައްޗަށް މައުލޫމާތު ދޫކުރުމުގެ ބަދަލުގައި، ސިސްޓަމް ތެރެއިން ބޭނުންވާ މައުލޫމާތު، ބޭނުންވާ މިންވަރަށް، ރައްކާތެރިކަމާއި، ސައްޙަކަމާއެކު އިދާރާތަކުގެ މެދުގައި ހިއްސާކުރުމުގެ އިންތިޒާމް އެންސީއައިޓީއިން ހަމަޖައްސައިދޭނެ ކަމަށްވެސް އޭނާ ވިދާޅުވިއެވެ.
މިގޮތަށް ސިސްޓަމްގައި ރައްކާ ކުރެވޭ މައުލޫމާތު ނަހަމަގޮތުގައި ބޭނުންކުރުމުގެ ފުރުސަތު އެއްވެސް ފަރާތަކަށް ނުދޭނެ ކަމުގެ ޔަގީންކަންވެސް ރައްޔިތުންނަށް މިނިސްޓްރީން ވަނީ އަރުވާފައެވެ.
