ސީޑީއާރުއައި ގައި ބައިވެރިވެ މުއާހަދާ އޮތްގޮތް ބަދަލުކުރުމުގައި ރާއްޖެއިން މަސައްކަތްކުރަންޖެހޭ: ރައީސް ނަޝީދު
މުއާހަދާގައި ބައިވެރިވުމުގެ މައްސަލަ ދިރާސާކުރުމަށް ފޮނުވާފައިވަނީ އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީއަށް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ޗާޓަރ އޮފް ދަ ކޯލިޝަން ފޮރ ޑިޒާސްޓަރ ރެޒިލިއަންޓް އިންފްރާސްޓްރަކްޗަރ (ސީ.ޑީ.އާރު.އައި)ގައި ރާއްޖެއިން ބައިވެރިވެ އެމުއާހަދާ މިހާރު އޮތްގޮތް ބަދަލުކުރުމުގައި ރާއްޖެއިން އިސްނަގައިގެން މަސައްކަތްކުރަންޖެހޭ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
އަންގާރަ ދުވަހުގެ ޖަލްސާއަށް ސީޑީއާރުއައި ގައި ބައިވެރިވުމާއި ގުޅޭގޮތުން މަޖިލީހުގެ ރުހުން ހޯދުމަށް ރައީސުލްޖުމްހޫރިއްޔާ ފޮނުއްވާފައިވާ މައްސަލަ ދިރާސާކޮށް ގޮތެއް ނިންމުމަށް ކަމާބެހޭ ކޮމިޓީއަށް ފޮނުވުމަށް ވަނީ އެޖެންޑާކޮށްފައެވެ.
މިކަމާއި ގުޅޭގޮތުން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވާފައިވާ ސިޓީފުޅުގައި ވަނީ ދެމެހެއްޓެނެވި ތަރައްޤީ ކަށަވަރުކުރުމަށްޓަކައި މޫސުމާއި ކާރިސާތަކުން އަރައިގަނެ ގައުމުތަކުގެ ކަންކަން ވަރުގަދަކޮށް ކުރިއެރުމަށްޓަކައި ގައުމުތަކާއި އދ ގެ އެޖެންސީތައް ޕްރޮގްރާމްތަކާއި މަލްޓިލޭޓްރަލް ޑިވެލޮޕްމަންޓް ބޭންކުތަކާއި މާލީ އިންތިޒާމުތަކާއި ޕްރައިވެޓް ސެކްޓަރުގެ އިތުރުން އިލްމީ މަރުކަޒުތައް ހިމެނޭގޮތުން އެކުލަވާލާފައިވާ ބައިނަލްއަގްވާމީ ޕަރޓްނަރޝިޕެއް ކަމުގައިވާ ޗަރޓަރ ފޮރދަ ކޯލިޝަން އޮފް ޑިޒާސްޓަރ ރެޒިލިއަންޑް އިންފްރާސްޓަރަކްޗަރ ގައި ސީޑީއާރުއައި ގައި ބައިވެރިވުމާއި ގުޅޭގޮތުން 13 އޮކްޓޯބަރ ގައި އޮތް ވަޒީރުންގެ މަޖިލީހުގެ ބައްދަލުވުމުގައި މަޝްވަރާކުރުމަށްފަހު މިމުއާހަދާގައި ބައިވެރިވުމުގައި ނިންމާފައިވާ ކަމަށެވެ.
އެހެންކަމުން މިކަމާއި ގުޅޭގޮތުން މަޖިލީހުން ދިރާސާކޮށް ގޮތެއް ނިންމުމަށް ރައީސުލްޖުމްހޫރިއްޔާ ވަނީ އެދިވަޑައިގަންނަވާފައެވެ.
މިމުއާހަދާގައި ބައިވެރިވުމުގެ މައްސަލަ ދިރާސާކުރުމަށް ފޮނުވާފައިވަނީ އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީއަށެވެ. މިމައްސަލަ ދިރާސާކުރުމަށް ކޮމިޓީއަށް ފޮނުއްވަވަމުން ވާހަކަދައްކަވަމުން ރައީސް ނަޝީދު ވިދާޅުވީ މޫސުމަށް އަންނަ ބަދަލުތަކާއި ގުޅިގެން ރާއްޖޭގައި މިހާރު ބިނާކުރަންޖެހޭ އުމްރާނީ އެކިއެކި ވަސީލަތްތައް ބިނާކުރެވެން ޖެހެނީ ވަކި ބާވަތެއްގެ ގޮތަކަށް ކަމަށެވެ. މަޖިލީހުގެ އެންވަޔަރަންމަންޓް އެންޑް ކްލައިމެޓް ޗޭންޖް ކޮމިޓީން މިކަމާއި ގުޅޭގޮތުން އެކި ފަހަރު އެކި ރިޕޯޓް ހެދިފައިވާ ކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މިމުއާހަދާގައި ބައިވެރިވެ މިކަމުގައި ރާއްޖެއިން މަސައްކަތްތަކެއް ކުރަންޖެހޭ ކަމަށް ދެކެވަޑައިގަންނަވާކަމަށެވެ.
