އޮޑިޓް ރިޕޯޓް: ރައީސުލްޖުމްހޫރިއްޔާގެ އޮފީހަށް ފުރިހަމަ "އޭ" ރިޕޯޓެއް
30 ނޮވެމްބަރު 2020 | ހޯމަ 16:51މިދިޔަ އަހަރު ރައްޔިތުންގެ މަޖިލީހުން ރައީސް އޮފީހަށް ފާސްކޮށްފައި ވަނީ 121،008،144 ރުފިޔާ
ރައީސުލްޖުމްހޫރިއްޔާގެ އޮފީސް
ރައީސުލްޖުމްހޫރިއްޔާގެ އޮފީހުން ފާއިތުވި އަހަރު ހަރަދުކޮށްފައި ވަނީ މާލިއްޔަތު ގާނޫނާއި، ގަވައިދާ އެއްގޮތަށް ކަމަށް އޮޑިޓަރ ޖެނެރަލްގެ އޮފީހުން ހާމަކޮށްފިއެވެ.
އޮޑިޓަރ ޖެނެރަލް ހަސަން ޒިޔަތު ސޮއިކުރައްވާ އާންމުކޮށްފައިވާ ރައީސް އޮފީހުގެ އޮޑިޓް ރިޕޯޓުގައި ވަނީ، ރައީސުލްޖުމްހޫރިއްޔާގެ އޮފީހުން 31 ޑިސެންބަރު 2019 އަށް ނިމުނު މާލީ އަހަރުގެ ޚަރަދުތައްކޮށްފައި ވަނީ އެ އަހަރަށް ރައްޔިތުންގެ މަޖިލީހުން ފާސްކޮށްދެއްވި ބަޖެޓުގެ މަގުސަދުތައް ހާސިލްވާ ގޮތަށް ކަމަށެވެ.
މީގެ އިތުރުން އެ އޮފީހުން ޚަރަދުކޮށްފައި ވަނީ ބަޖެޓުގައި ކަނޑައެޅިފައިވާ ކަންތައްތަކަށް، ބަޖެޓުގައި ކަނޑައެޅިފައިވާ މިންވަރަށް، ދައުލަތުގެ މާލިއްޔަތުގެ ޤާނޫނާއި ދަޢުލަތުގެ މާލިއްޔަތުގެ ޤަވާއިދާ އެއްގޮތަށް އޮޑިޓަރޖެނަރަލްގެ އޮފީހުން ދެކޭކަމަށް މި ރިޕޯޓުގައި ފާހަގަކޮށްފައިވެއެވެ.
އޮޑިޓް ރިޕޯޓަށް ބަލާއިރު، މިދިޔަ އަހަރު ރައްޔިތުންގެ މަޖިލީހުން ރައީސް އޮފީހަށް ފާސްކޮށްފައި ވަނީ 121،008،144 (ސަތޭކަ އެކާވީސް މިލިއަން އަށްހާސް އެއްސަތޭކަ ސާޅީސް ހަތަރު) ރުފިޔާއެވެ. އޭގެ ތެރެއިން 110،126،608 (ސަތޭކަ ދިހަ މިލިއަން އެއްލައްކަ ސައްބީސް ހާސް ހަސަތޭކަ އަށް) ރުފިޔާ ހަރަދު މުވައްޒަފުންގެ މުސާރައަށް ހަރަދު ކޮށްފައިވާއިރު، ޕެންޝަނާއި ވަކި ހިދުމަތަކަށް ނޫން ގޮތުން ދޭ ފައިސާއަށް 2،900،954 (ދެ މިލިއަން ނުވަލައްކަ ނުވަ ސަތޭކަ ފަންސާސް ހަތަރު) ރުފިޔާ ވަނީ ހަރަދު ކޮށްފައެވެ.
ދަތުރުފަތުރު ކުރުމުގެ ހަރަދަށް ބަލާއިރު، 26،532،450 (ސައްބީސް މިލިއަން ފަސްލައްކަ ބައްތިރީސް ހާސް ހަތަރު ސަތޭކަ ފަންސާސް) ރުފިޔާ ހަރަދުކޮށްފައިވާއިރު، އޮފީހަށް ބޭނުންވާ ތަކެތި ގަތުމަށް 5،359،253 (ފަސް މިލިއަން ތިންލައްކަ ފަންސާސް ނުވަ ހާސް ދުއިސައްތަ ފަންސާސް ތިން) ރުފިޔާ ވަނީ ހަރަދުކޮށްފައެވެ.
މީގެ އިތުރުން ދެން އެންމެ ބޮޑު ހަރަދެއް ރައީސް އޮފީހުން ކޮށްފައިވަނީ އޮފީސް ހިންގުމަށް ބޭނުންވާ ހިދުމަތްތަކުގެ ހަރަދުގެ ގޮތުގައެވެ. އެގޮތުން ބަލާއިރު އެކަމަށް 22،055،432 (ބާވީސް މިލިއަން ފަންސާސް ފަސް ހާސް ހަތަރު ސަތޭކަ ބައްތިރީސް) ރުފިޔާ ހަރަދުވެފައިވާ ކަމަށް އޮޑިޓް ރިޕޯޓްގައި ވަނީ ބުނެފައެވެ.
މާލީ ބަޔާންތަކުގައި ބަޔާންކޮށްފައިވާ ފައިސާ ލިބުނުގޮތާއި ފައިސާ ހޭދަ ކުރެވުނުގޮތުގެ ބަޔާނާއި، ފާސްކުރެވުނު ބަޖެޓާއި އެ ބަޖެޓުން ހޭދަ ކުރެވުނުގޮތުގެ ބަޔާނުގެ އިތުރުން މާލީ ބަޔާންތަކާއި ގުޅޭ ނޯޓްތަކަކީ މައިގަނޑު ގޮތެއްގައި ރައީސް އޮފީހަށް ލިބުނު ފައިސާ އާއި އެ ފައިސާއިން ކުރެވުނު ޚަރަދާއި ނިމިގެން މިދިޔަ މާލީ އަހަރުގެ ނިޔަލަށް ބާކީ ހުރި ފައިސާ އަދި ފާސްކުރެވުނު ބަޖެޓާއި އެ ބަޖެޓުން ހޭދަކުރެވުނު ގޮތް ރަނގަޅުކަމަށް އޮޑިޓް ރިޕޯޓުގައި އޮޑިޓަރ ޖެނެރަލް ވަނީ ފާހަގަކުރައްވާފައެވެ.
