ރާއްޖޭގެ އައިސީޓީ ދާއިރާއަށް މި ވަގުތު ދިމާވެފައިވާ އެންމެ ބޮޑު ގޮންޖެހުމަކީ މުވައްޒަފުންގެ ދަތިކަން ކަމަށް މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީއިން ބުނެފިއެވެ.
އައިސީޓީ ދާއިރާގައި ރާއްޖެ އޮތް ހާލަތު ދެނެގަނެ އެސެސްމަންޓެއް ހެދުމަށް އެދި ހުށަހަޅާފައިވާ މައްސަލަ ދިރާސާ ކުރުމަށްޓަކައި، ހޯމަ ދުވަހު ކުރިއަށްދިޔަ ރައްޔިތުންގެ މަޖިލީހުގެ ގައުމީ ތަރައްޤީއާއި ތަރިކައިގެ ކޮމިޓީގެ ސަބް ކޮމިޓީއަށް، ކޮމިއުނިކޭޝަން މިނިސްޓްރީގެ ސިޔާސީގެ ބޭފުޅުން ހާޒިރުކޮށް މައުލޫމާތު އޮޅުންފިލުވުމުން އެ މިނިސްޓްރީގެ ސްޓޭޓް މިނިސްޓަރ އަލީ ސޯލިޚް ވިދާޅުވީ މިވަގުތު މިނިސްޓްރީއަކީ 53 މުވައްޒަފުން މަސައްކަތް ކުރުމަށް އޮނިގަނޑެއް އެކުލަވާލާފައިވާ މިނިސްޓްރީއެއް ކަމަށާއި ނަމަވެސް މި ވަގުތު މަސައްކަތްކުރަމުންދަނީ ޖުމްލަ 17 މުވައްޒަފުން ކަމަށެވެ. މި 17 މުވައްޒަފުން މިނިސްޓްރީގެ ހުރިހާ މަސައްކަތްތަކެއް ކުރަމުންދާ ކަމަށް އަލީ ސޯލިޙް ވިދާޅުވިއެވެ.
ސޯލިހު ވިދާޅުވީ މި ދާއިރާ ކުރިއަރުވަން ބޭނުން ނަމަ އެކުލަވާލެވިފައިވާ ސިޔާސަތުތައް އޮންނަން ޖެހޭ ކަމަށާއި ފަންނީ ބޭފުޅުންނަށް ދެވޭ އުޖޫރަ ރަނގަޅުވާންޖެހޭ ކަމަށާއި ސިވިލް ސަރވިސް އޮނިގަނޑުގެ ތެރޭގައި އެކަށީގެންވާ އުޖޫރައެއް ކަނޑައެޅިފައި ނުވާ ކަމަށްވެސް އަލީ ސޯލިހް ވިދާޅުވިއެވެ.
ސަރުކާރުގެ އެހެން ވުޒާރާއަކަށް އައިސީޓީ ދާއިރާއިން މީހަކު ނަގާ ކަމަށްވާނަމަ ވަރަށް ބޮޑު މައްސަލަތަކެއް އެބަހުރި. އެއް ރޭންޖުގެ މީހުން މަސައްކަތް ކުރުމަށްޓަކައި އުޖޫރައެއް ކަނޑައެޅިފައެއް ނުބވޭ. ސިޔާސަތު އެކުލަވާލާ ބަޖެޓް ކަނޑައެޅިފައި އޮތް ނަމަވެސް ސިވިލް ސަރވިސްގައި އެދިފައިވީ ނަމަވެސް އަހަރު ދެބައިވާފަހުން އެކަމަށް އެއްބަސްވަނީ.މިނިސްޓަރ އޮފް ސްޓޭޓް އަލީ ސޯލިޚް
މި އުނދަލުގެ ތެރެއިން އެ މިނިސްޓްރީން ކުރިއަށްގެންދާ މަސައްކަތުގެ ތެރެއިން މިވަގުތު ރާއްޖޭގެ ވިހާ މަރުވާގެ ރިކޯޑް ޑިޖިޓަލައިޒް ކުރެވުމުގެ މަސައްކަތް މުޅި ރާއްޖޭގައި ފަށައިގެން ކުރިއަށްދާ ކަމަށާއި، މީގެ އިތުރުން ހައުސިން ޕޯޓަލްއެއް ތަޢާރަފްކޮށް ރައްޔިތުންނަށް ލުއި ފަސޭހަތަކެއް ގެނެސްދިނުމަށް މަސައްކަތްކޮށްފައިވާ ކަމަށް އަލީ ސޯލިޙް ވިދާޅުވިއެވެ.
އޭގެ އިތުރުން އެ މިނިސްޓްރީއަކީ ދައުލަތުގެ 52 އެޕްލިކޭޝަންއެއް ބަލަހައްޓަމުންދާ މިނިސްޓްރީއަކަށްވާއިރު މި ހުރިހާ މަސައްކަތެއް މޮނިޓަރކޮށް ކުރުމަށް ތިބީ އެންމެ 12 ޑިވެލޮޕަރުން ކަމަށާއި، މިއީ ވަރަށް ދަތި ކަމެއް ކަމަށް އޭނާ ވިދާޅުވިއެވެ.
މި ބައްދަލުވުމުގައި އެމިނިސްޓްރީގެ މަސައްކަތްތަކާއި ބެހޭ ގޮތުން ވާހަކަދައްކަވަމުން މިނިސްޓަރ އޮފް ސްޓޭޓް އަޙްމަދު އަފްސަލް އިބްރާހިމް ވިދާޅުވީ މިވަގުތު އެންމެ ބޮޑު ދަތިތަކެއް އޮތީ މިދާއިރާ ހިނގައިގަންނަން ބޭނުންވާ ޤަވާއިދުތަކާއި އުސޫލުތަކެއް ހެދިފައި ނުވުން ކަމަށެވެ. އެގޮތުން 2015 ވަނަ އަހަރު ވުޖޫދުވެފައި އޮތް ކޮމިއުނިކޭޝަން އޮތޯރިޓީގެ ޤާނޫނު ރިވިއުކޮށް ނިމިފައިވީ ނަމަވެސް މިނިސްޓްރީއާއި އެކު މި މަސައްކަތް ކުރަންތިބި ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް) ގެ އެއްބާރުލުން ނުލިބޭ ކަމަށް އަފްސަލް ވިދާޅުވިއެވެ. އަދި މިވަރުގެ ބޮޑު އިންޓަސްޓްރީއެއްގައި ޤާވާއިދެއް އުސޫލެއް ނެތުމުން ވަރަށް ބޮޑު ދަތިތަކާއި ކުރިމަތިވާ ކަމަށްވެސް ވިދާޅުވިއެވެ.
