ޖަމީލާ ޙުސެއިން އަވަހާރަވުމާ ގުޅިގެން އާއިލާއަށް ރައީސްގެ ތައުޒިޔާ
28 ނޮވެމްބަރު 2020 | ހޮނިހިރު 08:29އަވަހާރަވީ ހޮނިހިރު ދުވަހުގެ 10:22 ގައި
ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރުގެ މަންމާފުޅު ޖަމީލާ ހުސެއިން (82)
ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށް ފަހު ހޮނިހިރު ދުވަހުގެ ހެނދުނު 10:22 ގައި، ހއ. އިހަވަންދޫ ވައިޖެހޭގޭ އަލްފާޞިލާ ޖަމީލާ ޙުސެއިން (82) އަވަހާރަވުމާ ގުޅިގެން، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު އާއިލާއަށް ތައުޒިޔާ ދަންނަވައިފިއެވެ.
ރައީސް ސޯލިހުގެ ޓުވީޓުގައި، އާއިލާއަށް ކެތްތެރިކަން ދެއްވައި މަރްހޫމާއަށް ސުވަރުގޭގެ ދާއިމީ ނިއުމަތް މިންވަރު ކުރެއްވުމަށް އެދި ދުޢާ ދަންނަވާކަމަށް ވިދާޅުވިއެވެ.
ޖަމީލާ ހުސައިން އަކީ ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރުގެ އިތުރުން، ރައީސުލްޖުމްހޫރިއްޔާގެ އޮފީހުގެ ޗީފް ޓެކްނޮލޮޖީ އޮފިސަރގެ މަގާމުގައި ހުންނެވި ހާމިދު ޝަފީޢު އާއި މީރާގެ ޑެޕިއުޓީ ކޮމިޝަނަރ ޖެނެރަލް އަސްމާ ޝަފީއުގެވެސް މަންމާފުޅެވެ. އަދި ޖަމީލާ އަކީ، ކުރީގެ ރައީސް ވަހީދުގެ ދައުރުގައި ފިޝަރީޒް މިނިސްޓަރ ކަމާއި ހޯމް މިނިސްޓަރުކަން ކުރެއްވި އަހްމަދު ޝަފީއުގެވެސް މަންމާފުޅެވެ.
ޖަމީލާގެ ބޭފުޅުން ވަނީ އެކި ދައުރުތަކުގައި ސަރުކާރުގެ އިސްމަަގާމުތައް ފުރުއްވާފައެވެ. އަދި، ޖަމީލާއަކީ ގައުމަށް ހިދުމަތްކުރެއްވުމުގައި އުފެއްދުންތެރި ހިދުމަތްތެރި ދަރިން ބިނާކުރެއްވި މަންމައެކެވެ.
