ޕެންސިލްވޭނިއާގައި ވޯޓު އޮޅުވާލާފައިވާ ކަމަށް ބުނެ ހުށަހެޅި މައްސަލަ ބޭރުކޮށްލައިފި

ޕެންސިލްވޭނިއާގެ ފެޑަރަލް ކޯޓަށް، ވޯޓު އޮޅުވާލާފައިވާ ކަމަށް ބުނެ ޓްރަމްޕްގެ ކެމްޕެއިން ޓީމުން ހުށަހެޅި މައްސަލައިގައި އެކަށީގެންވާ ވަރަށް ހެކި ނެތް ކަމަށް ބުނެ އެ ކޯޓުން މައްސަލަ ބޭރު ކޮށްލައިފިއެވެ.

ޕެންސިލްވޭނިއާގެ ކޯޓަށް ޓްރަމްޕްގެ ކެމްޕެއިން ޓީމުން ހުށަހެޅި މި މައްސަލަ ބެއްލެވި ފަނޑިޔާރުން ނިންމެވި ނިންމުމުގައި ބުނީ ވޯޓު އޮޅުވާލާފައިވާ ކަމުގެ އެއްވެސް ހެއްކެއް ޓްރަމްޕްގެ ކެމްޕެއިން ޓީމަށް ދެއްކިފައި ނުވާ ކަމަށާއި، ފަނޑިޔާރުން ބެލި ބެލުމުން އޮޅުވާލައިގެން ވޯޓު ލާފައިވާ ކަމަށް ނުފެންނަ ކަމަށެވެ.

ފަނޑިޔާރުންގެ ނިންމެވި ނިންމެވުމުގައި އިތުރަށް ބުނީ ޕެންސިލްވޭނިއާގެ ވޯޓު އޮޅުވާލުމަށް ވޯޓުލާ މަރުކަޒުތަކުގައި ތިބި އޮފިޝަލުން އެއްވެސް ކަމެއް ކޮށްފައިވާ ކަމަށް ނުފެންނަ ކަމަށާއި، އެ ސްޓޭޓުގައި ވޯޓުގެ ކަންކަން ކުރިޔަށް ގޮސްފައިވަނީ ދެފުށް ފެންނަ ގޮތައް ކަމަށެވެ.

އެމެރިކާގައި އިންތިހާބު ކާމިޔާބު ކުރާ ފަރާތެއް ކަނޑައަޅާ އިލެކްޓޯރަލް ކޮލެޖް ސިސްޓަމުން ބައިޑަން ވަނީ 306 ވޯޓު ހޯއްދަވައިފައެވެ. ޓްރަމްޕަށް ލިބިވަޑައިގެންނެވީ 232 އިލެކްޓޯރަލް ކޮލެޖް ވޯޓެވެ. އިންތިޚާބު ކާމިޔާބު ކުރާ ކެންޑިޑޭޓަކު މަދުވެގެން 270 ވޯޓު ހޯދަން ޖެހެއެވެ.

ނަތީޖާ ރަސްމީކޮށް އިއުލާން ކުރުމަށް އިލެކްޓަރުން ބައްދަލު ކުރުން ޑިސެމްބަރު 14 ވަނަ ދުވަހަށް ހަމަޖެހިފައިވާއިރު އިންތިހާބީ ރައީސް ބައިޑަން ހުވާ ކުރައްވާނީ ޖެނުއަރީ 20 ގައެވެ.

ބަލި ގަބޫލު ނުކުރެއްވި ނަމަވެސް ޓްރަމްޕް ވަނީ ވެރިކަން ބަދަލު ކުރުމުގެ ކަންކަން ކުރިއަށް ގެންދިއުމުގެ ހުއްދަ މިިދިޔަ ހަފުތާގައި ދެއްވައިފައެވެ.

ޓްރަމްޕްގެ ތުހުމަތުތަކާ ގުޅިގެން އެ މަނިކުފާނުގެ ކެމްޕޭނުން ވޯޓާ ދެކޮޅަށް ބައެއް ސްޓޭޓުތަކުގައި ކޯޓަށް މައްސަލަ ހުށަހަޅާފައިވީ ނަމަވެސް ހެކި ނެތުމުގެ ސަބަބުން ގިނަ މައްސަލަތައް ވަނީ ބޭރުކޮށްފައެވެ.