އިރާންގެ ނިއުކްލިއަރ ސައިންސްވެރިއަކު މަރާލައިފި!
27 ނޮވެމްބަރު 2020 | ހުކުރު 18:47މުހުސިންއަށް މަރުވެފައިވަނީ ލިބުނު ހަމަލާއަށް ހޮސްޕިޓަލުގައި ފަރުވާދެމުން ދަނިކޮށް
އީރާންގެ ނިއުކްލިއަރ ސައިންޓިސްޓެއް ކަމަށްވާ މުހުސިން ފަޚްރިޒާދުގެ ކާރަށް ހަމަލާ ދީފައިވާ މަންޒަރެއް
ހަތިޔާރު އެޅި ބަޔަކު ދިން ހަމަލާއެއްގައި އިރާންގެ އިސް ނިއުކްލިއަރ ސައިންސްވެރިޔަކު ކަމުގައިވާ މުހުސިން ފަޚްރިޒާދަށް ހަމާލީ މަރާލައިފި ކަމަށް އެ ގައުމުގެ ޑިފެންސް މިނިސްޓްރީން ހާމަކޮށްފިއެވެ.
ފަޚްރިޒާދު މަރުވީ ހަމަލާގައި ލިބުނު ޒަހަމްތަކަށް ހޮސްޕިޓަލުގައި ފަރުވާދެމުން ދަނިކޮށެވެ. ފަޚްރިޒާދަށް ދިން ހަމަލާއަކީ ޓެރަރިސްޓު ހަމަލާއެއް ކަމަށް އިރާނުގެ ޑިފެންސް މިނިސްޓްރީން ބުނެފައިވާއިރު، އޭނާ މަރުވުމާއި ގުޅިގެން އިރާންގެ ހާރިޖީ ވަޒީރު މުހައްމަދް ޖަވާދު ވިދާޅުވީ މި ހަމަލާއަކީ ދައުލަތާ ދެކޮޅަށް ދީފައިވާ ހަމަލާއެއް ކަމަށެވެ.
2010 ވަނަ އަހަރާ 2012 ވަނަ އަހަރުގައި ވެސް އީރާންގެ ހަތަރު ސައިންޓިސްވެރިއަކަށް ހަމަލާދީ މަރާލާފައިވެއެވެ. އީރާނުން ތުހުމަތުކުރާ ގޮތުގައި މި ހަމަލާތަކުގެ ފަހަތުގައި ވަނީ އިޒްރޭލެވެ.
އިރާނުގެ ނިއުކްލިއަރ ހަކަތައިގެ ޕްރޮގްރާމުގެ ހަގީގީ މަގުސަދާއި މެދު ހުޅަނގުގެ ގިނަ ގައުމުތަކުން، ހާއްސަކޮށް އެމެރިކާއިން، ސުވާލު އުފައްދަމުން ދާއިރު އިރާނުން ބުނަމުންދަނީ އެ ގައުމުގެ ނިއުކްލިއަރ ޕްރޮގްރާމްތައް ހިންގަމުންދަނީ އަމާންކަން ދެމެހެއްޓުމުގެ ނިޔަތުގައި ކަމަށެވެ. އަދި އެ ގައުމުން ނިއުކްލިއަރ ހަތިޔާރު އުފައްދާކަމަށް ކުރާ ތުހުމަތުތައް އިރާނުން ދޮގުކުރެއެވެ.
