ޚާއްސަ އެހީއަށް ބޭނުންވާ ކުދިންގެ ހައްޤުތައް ކަށަވަރުކުރުމަށް އެންމެން އެއްމޭޒަކަށް!
ޚާއްސަ އެހީއަށް ބޭނުންވާ ކުދިންގެ ހައްޤުތަކާއި ގުޅިގެން ބެލެނިވެރިންގެ ގިނަ ޝަކުވާތަކެއް
ރައްޔިތުންގެ މަޖިލީހުގެ އިޖުތިމާއީ ކޮމިޓީގެ ބައްދަލުވުން
ޚާއްސައެހީއަށް ބޭނުންވާ ކުދިންގެ ހައްޤުތައް ކަށަވަރުކުރުމަށްޓަކައި ރައްޔިތުންގެ މަޖިލީހުގެ އިޖްތިމާއީ ކޮމިޓީއަށް އެ ފަރާތްތަކުގެ ކަންބޮޑުވުންތަށް ހިއްސާކޮށްފިއެވެ.
ބުރާސްފަތި ދުވަހު ކުރިއަށްދިޔަ ރައްޔިތުންގެ މަޖިލީހުގެ އިޖުތިމާއީ ކޮމިޓީގައި ޚާއްސައެހީއަށް ބޭނުންވާ ކުދިންގެ ބެލެނިވެރިންގެ ފަރާތުން މައިގަނޑު ހަތަރު ދާއިރާއަކުން ކަންބޮޑުވުންތައް ހުށަހަޅާފައެވެ.
އެގޮތުން އެންމެ ގިނަ މައްސަލަ ފާހަގަކުރި ދާއިރާގެ ގޮތުގައި ތައުލީމީ ދާއިރާ ހިމެނުނުއިރު މި ކަމަށް އިޝަރާތްކުރައްވާ އެޑިއުކޭޝަން މިނިސްޓަރ ޑރ. އައިޝަތު އަލީ ވިދާޅުވީ މި ސަރުކާރު އައި ފަހުން ތައުލީމީ ދާއިރާގެ ތެރެއިން އެންމެ އިސްކަމެއްދީގެން ކުރި އެއް މަސައްކަތެއްގެ ގޮތުގައިވެސް އޮތީ އެއްވެސް ތަފާތު ކުރުމެއް ނެތި ނުކުޅެދުންތެރިކަން ހުންނަ ފަރާތްތަކަށް ޚިދުމަތް ފޯރުކޮށްދިނުމަށް ކުރެވުނު މަސައްކަތްތަކެއް ކަމަށާއި އެގޮތުން މިހާތަނަށް އައިއިރު ވަކި ޑިޕާރޓްމަންޓެއްގެ ދަށުން މި މަސައްކަތް ފެށިފައިވާ ކަމަށެވެ.
ބެލެނިވެރިންގެ ފަރާތުން ހުށަހެޅި ކަންކަމުގެ ތެރޭގައި ހިމެނޭ ސްކޫލުތަކުގެ ބޯޑުގަޔާއި ޕީޓީއޭ އިސް މަޤާމްތައް ތަމްސީލް ކުރުމުގައި ޚާއްސަ އެހީއަށް ބޭނުންވާ ކުދިންނަށް ވަކި ގޮނޑިއެއް ހުންނަން ޖެހޭނެ ކަމަށް ޤަބޫލުކުރާއިރު، ޚާއްސަ އެހީއަށް ބޭނުންވާ ކުދިންނަށް ޚާއްސަކޮށްގެން ފާހަގަކުރާ ދުވަސްތައް ފާހަގަކުރުމުގައިވެސް މިހާރަށްވުރެ ހަރުދަނާ ގޮތްތަކެއް ގެންގުޅޭޖެހޭ ކަމަށް ބުނި ބުނުމަށް މިނިސްޓަރ އައިޝަތު އަލީ ވަނީ ތާޢީދުކުރައްވާފައެވެ.
މީގެ އިތުރުން ބެލެނިވެރިން ފާހަގަކުރި ހުރިހާ ސުވާލުތަކަށް ޖަވާބު ދެއްވަމުން މިނިސްޓަރ އައިޝަތު އަލީ ވިދާޅުވީ އެމިނިސްޓްރީގެ ތެރެއިން ކުރެވެން ހުރިހާ މަސައްކަތެއް ކޮށްދެއްވާނެ ކަމަށެވެ.
މި ކޮމިޓީގައި ބައިވެރިވެވަޑައިގެންނެވި ހެލްތް މިނިސްޓަރ އަޙްމަދު ނަސީމް ވިދާޅުވީ ޚާއްސަ އެހީއަށް ބޭނުންވާ ކުދިންގެ ޙައްގުތައް ކަށަވަރުކުރަން ޖެހޭ ކަމަށާއި އެގޮތުން މިހާރު އަލަށް ހުޅުވިގެންދާ ޓާރޝީއަރީ ހޮސްޕިޓަލްތަކުން މިފަދަ ކުދިންނަށް ޚިދުމަތް ލިބުމުގައި ދަތިކަމެއް ކުރިމަތި ނުވާނެ ކަމަށެވެ. އަދި މި ކުދިންނަށް ފޯރުކޮށްދޭ ސްޕީޗްއަށް މީހުން ބިނާކުރުމަށް މިހާރުވެސް މަސައްކަތްތަކެއް ކުރަމުންދާ ކަމަށާއި އެކިއެކި ދާއިރާތަކަށް ޚާއްސަވެފައި ތެރަޕިސްޓުން ހޯދުމުގައި ދިމާވާ ދަތިތަކަށް ހައްލެއް ހޯދުމަށް މިނިސްޓްރީން މަސައްކަތް ކުރާނެ ކަމަށް މިނިސްޓަރ ނަސީމް ވިދާޅުވިއެވެ.
މީގެ އިތުރުން ޕްރައިވެޓް ކްލިނިކްތަކުން ފޯރުކޮށްދޭ ޚިދުމަތްތަކުގެ އަގު ރިވިއުކޮށް އަލުން އެކުލަވާލުމަށް އެފަރާތްތަކާއި އެކު މަޝްވަރާކުރާނެ ކަމަށްވެސް މިނިސްޓަރ ނަސީމް ވިދާޅުވިއެވެ.
ބެލެނިވެރިން އިތުރަށް ފާހަގަކުރި ކަންތައްތަކަށް ވާހަކަދައްކަވަމުން ހަޔަރ އެޑިޔުކޭޝަން މިނިސްޓަރ ޑރ. އިބްރާހިމް ހަސަން ވިދާޅުވީ ހާއްސަ އެހީއަށް ބޭނުންވާ ކުދިންނަށް މަތީ ތައުލީމް ހާސިލް ކުރުމުގައި ފުރުޞަތުތައް މަދު ކަމަށެވެ. އެހެންނަމަވެސް ސަރުކާރު އައި ފަހުން ކުރި މަސައްކަތުގެ އަލީގައި މިހާތަނަށް ޕޮލިޓެކްނިކް މެދުވެރިކޮށް 10 ކުއްޖަކު ކޯސް ފުރިހަމަކޮށް ވަޒީފާ އަދާކުރަމުންދާ ކަމަށާއި އޭގެ ތެރެއިން އެމްއޭސީއެލް އަދި ޝީޝާގައި މި ކުދިން ވަޒީފާ އަދާކުރަމުންދާ ކަމަށް މިނިސްޓަރ ވިދާޅުވިއެވެ.
ޔޫތް މިނިސްޓަރ އަޙްމަދު މަޙްލޫފު ވެސް ވަނީ ބެލެނިވެރިން ފާޅުކުރި ކަންބޮޑުވުންތަކަށް ވާހަކަދައްކަވާފައެވެ. އެގޮތުން އެ މިނިސްޓްރީގެ މެންޑޭޓްގެ ތެރޭގައި ހިމެނޭ ކަންތައްތައް ކޮށްދެއްވާނެ ކަމަށާއި އެނޫން ކަންތައްތައް ވެސް އެ މިނިސްޓްރީގެ ސަމާލުކަމަށް ގެނައުމުން ކޮށްދެއްވާނެ ކަމަށް ވިދާޅުވިއެވެ.
މި ބައްދަލުވުމުގައި ޚާއްސަ އެހީއަށް ބޭނުންވާ ފަރާތްތަކަށް އެންމެ ކައިރިން އެހީތެރިކަން ފޯރުކޮށްދެމުންދާ އެންސްޕާ އަދި އާސަންދައިގެ އިސްވެރިންނާއި ޖެންޑަރ މިނިސްޓްރީންވަނީ ބައިވެރިވެ ވާހަކަދައްކަވާފައެވެ. އެގޮތުން އެންސްޕާއިން މި ފަރާތްތަކަށް ފޯރުކޮށްދޭ ޚިދުމަތްތަކުގެ މައުލޫމާތުވަނީ ވަރަށް ތަފްސީލްކޮށް ބެލެނިވެރިންނާއި ހިއްސާކޮށްފައެވެ.
ދެ ގަޑިއިރަށް ދިގުދެމިގެންދިޔަ މި ކޮމިޓީ ނިންމާލަމުން މުޤައްރިރް ކެނދިކުޅުދޫ ދާއިރާގެ މެމްބަރު އަޙްމަދު އީސަ ވިދާޅުވީ ކަމާއި ގުޅުން ހުރި ހުރިހާ އިދާރާއަކުން މި މައްސަލަ ހައްލުކޮށްދެއްވުމަށް ކުރެވެން ހުރި މަސައްކަތްތައް ލިޔުމުން އެކޮމިޓީއަށް ފޮނުވުމަށާއި އަދި ބެލެނިވެރިންގެ ކަންބޮޑުވުންތައް އަބަދުވެސް ރައްޔިތުންގެ މަޖިލީހުގެ މެމްބަރުން އަޑުއައްސަވާނެ ކަމަށެވެ.
