ކިޔަވައިދިނުމާއި، ދިރާސާކުރުމުގެ ފެންވަރާއި މެދު ސުވާލު އުފެދިގެން ނުވާނެ: ޑރ. އިބްރާހިމް ހަސަން
26 ނޮވެމްބަރު 2020 | ބުރާސްފަތި 12:16ކިޔަވައި ދިނުމާއި ދިރާސާ ކުރުމުގަ، ފެންވަރު ދައްވާ ފަދަ ނުވަތަ ފެން ވަރާއި މެދު ބަޔަކު ސުވާލު އުފައްދާނެ ޖާގަ ދީގެން ނުވާނެ
އެމްއެންޔޫގެ ސްޓްރެޓެޖިކް އެކްޝަން ޕްލޭން އިފްތިތާހުކުރި ރަސްމިއްޔާތުގައި ހަޔަރ އެޑިޔުކޭޝަން ޑރ. އިބްރާހީމް ޙަސަން
ކިޔަވައި ދިނުމުގައި އާއި ދިރާސާ ކުރުމުގައި، ފެންވަރާއި މެދު ސުވާލު އުފައްދާނެ ޖާގަ ދީގެން ނުވާނެ ކަމަށް މިނިސްޓަރ އޮފް ހަޔަރ އެޑިޔުކޭޝަން ޑރ. އިބްރާހީމް ޙަސަން ވިދާޅުވެއްޖެއެވެ.
ބުރާސްފަތި ދުވަހު އެމްއެންޔޫގެ އޮޑިޓޯރިއަމްގައި ބޭއްވި ދިވެހިރާއްޖޭގެ ޤައުމީ ޔުނިވަރސިޓީގެ ސްޓްރެޓީޖިކް ޕްލޭން އިފްތިތާހުކޮށްދެއްވާ، އެ ރަސްމިއްޔާތު ވާހަކަ ދައްކަވަމުން ޑރ. އިބްރާހިމް ހަސަން ވިދާޅުވީ ހަޔަރ އެޑިއުކޭޝަން މިނިސްޓަރެއްގެ ހައިސިއްޔަތުން ޔުނިވަރސިޓީގެ ހުރިހާ ހިންގުންތެރިންނަށް މެސެޖެއް ދޭން އެދޭ ކަމަށެވެ.
އެގޮތުން ފުރަތަމަ އިލްތިމާސްއަކީ ކިޔަވައި ދިނުމާއި ދިރާސާ ކުރުމުގައި، ފެންވަރު ދައްވާ ފަދަ ނުވަތަ ފެންވަރާއި މެދު ބަޔަކު ސުވާލު އުފައްދާ ފަދަ ޖާގައެއް ނުދެއްވުން ކަމަށް މިނިސްޓަރ ވިދާޅުވިއެވެ. ދެވަނަ ކަމެއްގެ ގޮތުގައި މިނިސްޓަރ ފާހަގަކުރެއްވީ ވަކިކަހަލަ ވަޒީފާ ތަމްރީނަކާއި ހުނަރުތަކެއް ހާސިލުކޮށްގެން ވަޒީފާގެ ބާޒާރަށް ނިކުމެވޭނެ ފަދަ ލައިސެންސެއް ހޯދަން އެދޭނަމަ، އެ ލައިސެންސް ދޫކުރާ ވުޒާރާއެއްގެ މަޝްވަރާގެ ތެރެއިން މަސައްކަތްތައް ކުރިއަށް ގެންދިޔުމަށެވެ.
ތިންވަނަ ކަމަކަށް މިނިސްޓަރ އެދިލައްވާފައި ވަނީ އެއްބައިވަންތަކަމާއި ބަދަހިކަމާ އެކު މަސައްކަތް ކުރިއަށް ގެންދިޔުމަށެވެ. އެގޮތުން ގައުމުގައި ބައިބައި ވުމާއި ފަސާދަ އުފެދޭނެ އެއްވެސް ކަމަކަށް އެމްއެންޔޫއިން ޖާގަ ނުދިނުމަށް ގޮވައިލެއްވިއެވެ. މިނިސްޓަރ އިތުރަށް ވިދާޅުވީ ގައުމުގައި ސިޔާސީ ފަރާތްތަކުން ސިޔާސަތުގެ ކަންކަން ނިންމާއިރު ފަންނީ މީހުންގެ ދިރާސާތަކުގެ އަލީގައި ކަންކަން ނިންމުމަކީ މިނިސްޓަރުގެ ވަރަށް ބޮޑު އުންމީދެއް ކަމަށެވެ.
އެމްއެންޔޫގެ ކާމިޔާބީތަކަށް އަލިއަޅުވާލާ ވާހަކަ ދައްކަވަމުން ޑރ. އިބްރާހިމް ހުސައިން ވިދާޅުވީ ޤައުމީ ޔުނިވަރިސިޓީއަކީ ޤައުމުގެ ތަރައްޤީއަށް ވަރަށް މުހިއްމު ދައުރެއް އަދާކުރާ ޔުނިވަރސިޓީއެއް ކަމަށާއި މިހާތަނަށް 73،000 އަށް ވުރެ ގިނަ ދަރިވަރުންނަށް ތަޢުލީމު ފޯރުކޮށްދީފައި ވުމަކީ ޤައުމުގެ ކުރިއެރުމަށް އެ ޔުނިވަރސިޓީގެ މުހިއްމުކަން އަންގައިދޭ ކަމެއް ކަމަށެވެ.
އެމްއެންޔޫގެ ސްޓްރެޓެޖިކް ޕްލޭން އިފްތިތާހުކޮށްދެއްވި މި ރަސްމިއްޔާތުގައި މިނިސްޓަރ އޮފް ހަޔަރ އެޑިޔުކޭޝަންގެ އިތުރުން އެމްއެންޔޫގެ ޗާންސެލަރ ޑރ. ހަސަން ހަމީދް އާއި ވައިސް ޗާންސެލަރ ޑރ. މުހައްމަދު ޝަރީފް އާއި ޑެޕިޔުޓީ ވައިސް ޗާންސެލަރ ޑރ. ހުސެއިން ހަލީމްގެ އިތުރުން އެމްއެންޔޫގެ އިސްވެރިން ބައިވެރިވެ ވަޑައިގެންފައިވެއެވެ.
ބުރާސްފަތި ދުވަހު އިފްތިތާހުކުރެވުނު ސްޓްރެޓެޖިކް ޕްލޭން ހިންގަން ހަމަޖެހިފައި ވަނީ 2020 ވަނަ އަހަރުން 2025 ވަނަ އަހަރާ ހަމައަށް ފަސް އަހަރަށް ބަހާލައިގެންނެވެ.
