ރައީސްގެ ނަސޭހަތް ސިފައިންނަށް: ބަޣާވާތްތެރިންގެ ކިބައިން ސަލާމަތްވާނީ އަމާނާތްތެރިވެ، ތެދުވެރިވެގެން
26 ނޮވެމްބަރު 2020 | ބުރާސްފަތި 07:18އަސްކަރިއްޔާއެއް އޮތުމުގެ ހަގީގީ ބޭނުމަކީ، ހަނގުރާމަތަކާއި ލޭއޮހޮރުވުންތަކުން ދުރުވުން ކަމަށް ވިދާޅުވި
އެމްއެންޑީއެފްގެ 66 ވަނަ އަސާސީ ތަމްރީނު ކޯސް ފުރިހަމަކުރި ދަރިވަރަކަށް ރައީސް ސޯލިހު ބަޑި ހަވާލުކުރައްވަނީ
އަމާނާތްތެރިކަމާއި ތެދުވެރި ކަމަކީ ސިފައިންގެ ގައިގައި ހުންނަން ޖެހޭ އެންމެ މުހިއްމު ދެ ސިފަ ކަމަށާއި، ބަޣާވާތްތެރިންގެ ކިބައިން ދައުލަތް ސަލާމަތް ކުރެވޭނީ އެ ދެ ސިފަ ސިފައިންގެ ގައިގައި ހުރެގެން ކަމަށް ރައީސުލްޖުމްހޫރިޔާ އަދި ސިފައިންގެ އެންމެ މަތީވެރިޔާ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
އެމަނިކުފާނު އެފަދައިން ސިފައިންނަށް ނަސޭހަތްތެރިވެ ވަޑައިގެންނެވީ، އެމްއެންޑީއެފްގެ 66 ވަނަ އަސާސީ ތަމްރީނު ކޯސް ފުރިހަމަކުރި ދަރިވަރުން, ސިފައިންގެ ހުވާކުރުމާއި ބަޑި ހަވާލުކުރުމުގެ ގޮތުން ބުރާސްފަތި ދުވަހު ހެނދުނު ޅ. މާފިލާފުށީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ކޯސް ފުރިހަމަކުރި ދަރިވަރުންނާ މުހާތަބު ކުރައްވާ ރައީސް ސޯލިހު ވިދާޅުވީ، ސިފައިން ފުރިހަމަކުރި ތަމްރީނުތަކަކީ، ވަރުގަދަ ބިންގަލުގެ މަތީގައި ސާބިތުވެތިބެ ދިވެހިރާއްޖެ ދިފާއުކުރުމަށް ބޭނުންވާ ޖިސްމާނީ އަދި ނަފްސާނީ ގާބިލްކަމާއި ހުނަރުވެރިކަމާއި ސިފަވަންތަ ސިފަތައް ހާސިލްކުރުމުގެ ތަމްރީނުތައް ކަމަށެވެ. އޭގެ ތެރެއިން ވެސް އެންމެ މުހިންމު ދެ ސިފައަކީ، ތެދުވެރިކަމާއި އަމާނާތްތެރިކަން ކަމުގައި ރައީސް ވިދާޅުވިއެވެ.
އެމަނިކުފާނު ވިދާޅުވީ، އެއިރެއްގައި ރައްޔިތުން ގާއިމުކޮށްފައި އޮންނަ ގާނޫނީ ވެރިކަމަށް ކިޔަމަންތެރިވެ، ގާނޫނުގެ ވެރިކަން ދެމެހެއްޓުމަށް އެހީތެރިވުމުގެ ސިފަ ހަރުލާފައި ހުންނަން ޖެހޭނެ ކަމުގައެވެ.
އަދި އަސްކަރިއްޔާއެއް އޮތުމުގެ ހަގީގީ ބޭނުމަކީ، ހަނގުރާމަތަކާއި ލޭއޮހޮރުވުން ތަކުން ދުރުވެ، ސުލްހަ ގާއިމްކުރުމާއި އަމާންކަން ދެމެހެއްޓުން ކަމުގައި ވިދާޅުވެ ރައީސް ވަނީ އަސްކަރީ ގާބިލުކަން އިތުރުކުރަން ޖެހެނީ ސުލްހަ ދެމެހެއްޓުމަށް ކުރިމަތިވާ ގޮންޖެހުންތަކާއި ހުރަސްތައް ނައްތައިލުމަށް ކަމުގައި ހާމަކުރައްވާފައެވެ.
ސިފައިންގެ ޚިދުމަތަކީ މަދަނީ އަދި އިޖްތިމާއީ ވާޖިބުތަކެއް ވެސް ލާމެހިފައިވާ ހިދުމަތެއްކަމާއި، ކާރިސާއެއް ދިމާވާ ހާލަތުގައި އެންމެ ފުރަތަމަ ރައްޔިތުންނަށް އެހީވާން ނުކުންނަ އެއް ބަޔަކީ ދިވެހި ސިފައިންކަން ފާހަގަކުރައްވައި، ރައީސް ވަނީ އެންމެހައި ސިފައިންނަށް ޝުކުރު ދަންނަވާފަ އެވެ.
