ޕްރޮފެޝަނަލް ބާރެއްގެ ގޮތުގައި ތަރައްގީ ކުރަން ސަރުކާރުން ގިނަ މަސައްކަތްތަކެއް ކުރެވިފައިވޭ
އެމްއެންޑީއެފްގެ 66 ވަނަ އަސާސީ ތަމްރީނު ކޯހުގެ ދަރިވަރުން ހުވާކުރުމުގެ ރަސްމިއްޔާތުގެ ތެރެއިން
ފާއިތުވި ދެ އަހަރު ދުވަހުގެ ތެރޭގައި ގައުމީ ދިފާއީ ބާރަށް އިދާރީ ގޮތުންނާއި އޮޕަރޭޝަނަލް ގޮތުން އިންގިލާބީ ބަދަލުތަކެއް ގެނެވިއްޖެ ކަމަށް ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލް ވިދާޅުވެއްޖެއެވެ.
އެމްއެންޑީއެފްގެ 66 ވަނަ އަސާސީ ތަމްރީނު ކޯހުގެ ދަރިވަރުން ހުވާކުރުމާއި ބަޑި ހަވާލުކުރުމުގެ ރަސްމިއްޔާތުގައި ވާހަކަ ދައްކަވަމުން ޗީފް އޮފް ޑިފެންސް ވިދާޅުވީ، ގައުމީ ދިފާއީ ބާރު މިއަދު ދަނީ ތަރައްގީގެ އައު ހަރުފަތްތަކެއް ގިރާކުރަމުން ކަމަށެވެ.
ޝަމާލްގެ ވާހަކަފުޅުގައި ސިފައިންނަކީ އަސްކަރީ ގޮތުން ގާބިލް، ހަރުދަނާ، ހުޝިޔާރު އަދި ޕްރޮފެޝަނަލް ބާރެއްގެ ގޮތުގައި ތަރައްގީ ކުރުމަށް މި ސަރުކާރުން ކޮށްދެއްވާފައިވާ މަސައްކަތްތައް ފާހަގަކުރެއްވިއެވެ. އެގޮތުން، ސިފައިންނަށް ބޭނުންވާ އުޅަނދުފަހަރާއި، އެންމެ ޒަމާނީ އާލާތްތަކާއި، ހަތިޔާރާއި ވަސީލަތްތައް ހޯދާ ހަމަކުރުމުގެ މަސައްކަތް ބާރު ދުވެއްޔައްގައި ކުރިޔަށްދާ ކަމަށް ވިދާޅުވިއެވެ.
ޝަމާލް ވިދާޅުވީ، އެ ރަސްމިއްޔާތު ކުރިޔަށް ދިޔަ ކޮމްޕޮސިޓް ޓްރެއިނިންގ ސެންޓަރަކީ ވެސް ސަރުކާރުން ވަރަށް ބޮޑު އިސްކަމެއްދީގެން ތަރައްގީ ކުރަމުންދާ ތަމްރީނު މަރުކަޒެއް ކަމަށެވެ. ޅ. މާފިލާފުށީގައި ގާއިމުކުރެވިފައިވާ އެމްއެންޑީއެފްގެ ކޮމްޕޮސިޓި ޓްރެއިނިންގ ސެންޓަރަކީ ކޯސްޓްގާޑް އަދި މެރިން ކޯރ ފަދަ ސާވިސްތަކުގެ ހާއްސަ ތަމްރީންތައް ހިމަނައިގެން، އެއްފަހަރާ 400 ދަރިވަރުން ތަމްރީނުކުރެވޭ ކެޕޭސިޓީ ހުރި މަރުކަޒެކެވެ.
އެމްއެންޑީއެފްއިން ހޯދާފައިވާ އިތުރު ކާމިޔާބީތައް ފާހަގަކުރައްވާ ޝަމާލް ވިދާޅުވީ، ފުރަތަމަ ފަހަރަށް ކެޕްސްޓަން ޑޮކްޓްރީންއެއް އެކުލަވާލައި އޭގެ އަލީގައި ސިފައިންގެ ފޯސްތަކާއި، ކޮމާންޑްތައް މިހާރު ތަރުތީބު ކުރެވިފައިވާ ކަމަށެވެ. އަދި ސިފައިންގެ އަސްކަރީ ގާބިލިއްޔަތު ބެހިގެންވަނީ ޖިސްމާނީ، މަފްހޫމީ އަދި އަގީދާގެ ދާއިރާތަކަށް ފޯކަސް ކޮށްގެން ކަމަށެވެ.
ތަމްރީންތައް ނިންމާ ސިފައިންނަށް ފަންނީ ދާއިރާތައް ހިޔާރުކޮށް، އެ ދާއިރާތަކުން ކުރިއަށް ދިއުމަށް ބޭނުންވާ ގައިޑެންސް ދެވޭނެ ނިޒާމެއް ސިފައިންގޭގައި އެކުލަވާލެވިފައިވާކަން ފާހަގަކުރައްވަމުން ޝަމާލް ވަނީ، ނިޒާމުގެ ފުރިހަމަ ބޭނުންހިފައި އިލްމާއި ހުނަރާއި އިތުރު ތަމްރީން ލިބިގަތުމަށް ސިފައިންނަށް ނަސޭހަތްތެރިވެ ވަޑައިގެންފައެވެ.
