އާޖެންޓީނާގެ ފުޓްބޯޅަ ލެޖެންޑް ޑިއޭގޯ މަރަޑޯނާ މަރުވެއްޖެއެވެ.

މަރަޑޯނާ މަރުވީ އުމުރުން 60 އަހަރުގައެވެ. މަރަޑޯނާ މަރުވިކަން އާޖެންޓީނާގެ މީޑިއާތަކުން ވަނީ ކަށަވަރުކޮށްދީފައެވެ.

މަރަޑޯނާ މަރުވިއިރު، މި މަހުގެ ކުރީކޮޅު އޭނާގެ ސިކުނޑީގައި ލޭ ކޮޅެއް ގަނޑުވެފައި ހުރުމުގެ ސަަބަބުން ވަނީ ކުއްލި އޮޕަރޭޝަނެއްވެސް ކޮށްފައެވެ. މަރަޑޯނާ މަރުވިކަން ބުދަ ދުވަހުގެރޭ އާޖެންޓީނާގެ މީޑިއާއިން ރިޕޯޓުކުރީ އޭނާ އޮޕަރޭޝަނަށްފަހު ހޮސްޕިޓަލުން ދޫކޮށްލިތާ ދެ ހަފުތާއެއްހާ ދުވަސް ފަހުންނެވެ.

ދާދި ފަހުން މަރަޑޯނާގެ ސިކުނޑީގައި ލޭ ކޮޅެއް ގަނޑުވެގެން އޭނާ ފަރުވާ ހޯދިއިރު، މީގެ ކުރިންވެސް މަރަޑޯނާގެ ސިއްހީ ހާލަތު ގޯސްވެގެން އެކި ކަންކަމަށް ވަނީ ފަރުވާ ހޯދާފައެވެ.

އާޖެންޓީނާގެ ފުރަތަމަ ޑިވިޝަން ޓީމެއް ކަމަށްވާ ޖިމްނާސިއާއަށް އިރުޝާދު ދެމުން އައި މަރަޑޯނާ މިދިޔަ އަހަރުގެ ސެޕްޓެމްބަރު މަހު ޖިމްނާސިއާގެ ކޯޗުކަމާ ހަވާލުވިއިރު، އޭގެ ކުރިން މިދިޔަ އަހަރުގެ ކުރީކޮޅު އޭނާ ކޯޗުކަން ކޮށްދިނީ މެކްސިކޯގެ ޑޮރަޑޯސްއަށެވެ. އެކަމަކު މަރަޑޯނާ އެ ޓީމުގެ ކޯޗުކަމާ ހަވާލުވެ ހުރިއިރު، ސިއްހީ ހާލަތު ގޯސްވުމުން އޭނާއަށް ގިނަ މެޗުތަކެއް ގެއްލުނެވެ.

އާޖެންޓީނާއަށް 1986 ވަނަ އަހަރުގެ ފީފާ ވޯލްޑް ކަޕް ކާމިޔާބުކޮށްދިން ކެޕްޓަން މަރަޑޯނާ އަކީ ފީފާއިން ހޮވި 20 ވަނަ ގަރުނުގެ އެންމެ މޮޅު ފުޓްބޯޅަ ކުޅުންތެރިންގެ ތެރޭގައި ހިމެނޭ ފުޓްބޯޅަ ލެޖެންޑެކެވެ. ކާމިޔާބު ފުޓްބޯޅަ ކެރިއަރެއް ނިންމާލާފައިވީ ނަމަވެސް، މަރަޑޯނާގެ ކޯޗިންގ އެންމެ ފުރިހަމައެއް ނޫނެވެ. އޭނާ ވަނީ އާޖެންޓީނާ ގައުމީ ފުޓްބޯޅަ ޓީމަށް 2010 ވަނަ އަހަރުގެ ވޯލްޑް ކަޕުގައި ކޯޗުކޮށްދީފައެވެ.