މައްސަރު ދުވަސްވަރު ބޭނުންކުރާ ތަކެތި ހިލޭ ފޯރުކޮށްދޭން ލާޒިމުކުރި ފުރަތަމަ ޤައުމަކަށް ސްކޮޓްލެންޑް!

މައްސަރު ދުވަސްވަރު ބޭނުންކުރާ ތަކެތި ހިލޭ ފޯރުކޮށްދިނުމަށް ލާޒިމުކުރި ފުރަތަމަ ޤައުމަކަށް ސްކޮޓްލޭންޑް ވެއްޖެއެވެ.

ތިން އަހަރަށް ދިގުދެމިގެން ދިޔަ ބަހުސަކަށް ފަހު އަންގާރަ ދުވަހު ސްކޮޓްލޭންޑުގެ މަޖިލިސް ޖަލްސާގައި ބައިވެރިވެވަޑައިގަތް ހުރިހާ މެމްބަރުންގެ އިއްތިފާޤުން ވަނީ "ޕީރިއަޑް ޕްރޮޑަކްޓްސް ފްރީ ޕްރޮވިޝަން ބިލް" ގެ ނަމުގައި ހުށައަޅާފައިވާ މި ބިލް ފާސްކޮށްފައެވެ. އެގޮތުން މަޖިލީހަށް މި ބިލު ހުށައަޅުއްވައިދެއްވީ ސްކޮޓިޝް ލޭބަރ ޕާޓީގެ މެމްބަރު މޮނިކާ ލެނަންއެވެ.

މަޖިލީހުން މި ބިލް ފާސްކުރުމާއެކު، މިހާރު އެ ޤައުމުގެ ސަރުކާރުން ދަނީ އެކަމާ ގުޅޭ ޚާއްސަ ސްކީމެއް އެކުލަވާލުމުގެ މަސައްކަތް ކުރަމުންނެވެ. އެއާއެކު ބޭނުން ޖެހިފައިވާ އެންމެންނަށް މި ސްކީމުގެ ދަށުން ހިލޭ އެފަދަ ސާމާނުތައް ލިބިގެންދާނެ ކަމަށް ބޭރުގެ މީޑިއާތަކުން ރިޕޯޓްކޮށްފައިވެއެވެ. އޭބީސީ ނިއުސްގައި ރިޕޯޓް ކޮށްފައިވާ ގޮތުން މި ސްކީމަށް އަހަރަކު 24 މިލިއަން ޕައުންޑް (44 މިލިއަން އެމެރިކާ ޑޮލަރު) ޚަރަދުވާނެ ކަމަށް އަންދާޒާ ކުރެވެއެވެ.

މި ބިލުގެ ދަށުން ކޮލެޖުތަކާއި، ސުކޫލުތައް ފަދަ ތަންތަނުގައި ސެނިޓަރީ ޕެޑް ފަދަ ތަކެތި ލިބޭނެ އިންތިޒާމު ހަމަޖައްސާފައި ހުރުން ލާޒިމުވެގެންދެއެވެ. އެއާއެކު ފަޤީރު އާބާދީތަކަށް ނިސްބަތްވާ އަންހެނުންނަށްވެސް އޭގެ ސަބަބުން ފައިދާ ކުރާނެއެވެ. އެގޮތުން 2014 ވަނަ އަހަރުން ފެށިގެން 2017 ވަނަ އަހަރާ ދެމެދުގެ ތަފާސްހިސާބުތަކަށް ބަލާއިރު، ސްކޮޓްލޭންޑުގެ 19 އިންސައްތައެއްހާ މީހުން ފަޤީރުކަމާ ކުރިމަތިލާން ޖެހިފައިވެއެވެ.