700،000 ރޮހިންޖާ މުސްލިމުންނަށް ވާވަރަށް ކާބޯތަކެތި ފޯރުކޮށްދެވޭނެ ކޮންޓިންޖެންސީ ޕްލޭނެއް އދ. އިން ހަދައިފި

މިޔަންމާގެ ރޮހިންޖާ މުސްލިމުންނާ މެދު އެގައުމުގެ އަސްކަރިއްޔާ އިން ހިންގަމުންދާ ލާއިންސާނީ އަމަލުތަކުން ސަލާމްވުމަށް ބަންގްލަދޭޝްއަށް ގިނަ އަދަދެއްގެ ރޮހިންޖާ މުސްލިމުން ހިޖުރަކުރަމުންދާ އިރު، 700،000 ރޮހިންޖާ މުސްލިމުންނަށް ވާވަރަށް ކާބޯތަކެތި ފޯރުކޮށްދެވޭނެ ކޮންޓިންޖެންސީ ޕްލޭނެއް ހަދާފައިވާ ކަމަށް އދ. އިން ބުނެފިއެވެ.

މިޔަންމާގެ އަސްކަރިއްޔާ އިން މިދިޔަ މަހު ފަހުކޮޅު ރޮހިންޖާ މުސްލިމުންނާ ދެކޮޅަށް ފެށި ލާއިންސާނީ އޮޕަރޭޝަނާ ގުޅިގެން އެކަމުން ސަލާމަތްވުމަށް މިހާތަނަށް 480،000 ރޮހިންޖާ މުސްލިމުން ބަންގްލަދޭޝް އަށް ހިޖުރުކޮށްފައިވެއެވެ.

ކާބޯތަކެތީގެ އެހީ ފޯރުކޮށްދިނުމުގެ ބައިނަލްއަގުވާމީ ޖަމިއްޔާ ނުވަތަ އދ. ގެ ޑަބްލިޔުއެފްޕީގެ އޮފިޝަލަކު ރޮއިޓާސް އަށް ވިދާޅުވީ ކުރިއަށް އޮތް ހަފްތާތަކުގައި ރޮހިންޖާ މުސްލިމުން ގިނަ އަދަދަކަށް އަތުވެއްޖެ ނަމަ އެ ފަރާތްތަކަށް ކާބޯތަކެއްޗާއި އަދި ކުއްލި އެހީ ފޯރުކޮށްދިނުމަށް ތައްޔާރުވެފައިވާ ކަމަށެވެ.

ބަންގްލަދޭޝްގައި ހަރަކާތްތެރިވާ ޑަބްލިޔުއެފްޕީގެ ޑެޕއުޓީ ޗީފް ޑިޕަޔަން ބަޓަޗާރިޔާ ރޮއިޓާސް އަށް ވިދާޅުވީ އދ. ގެ ހުރިހާ އެޖެންސީތައް ވެގެން 700،000 ރޮހިންޖާ މުސްލިމުންނަށް ވާވަރަށް ކާބޯތަކެތި ފޯރުކޮށްދޭނެ ކޮންޓިންޖެންސީ ޕްލޭނެއް ހަދާފައިވާ ކަމަށާއި، ރޮހިންޖާ މުސްލިމުންގެ އަދަަދު 700،000 އަށް އަރައިފި ނަަމަ އެ ޕްލޭންގެ ދަށުން ކަންކަން ކަވަރުވެގެން ދާނެ ކަމަށެވެ. ބަޓަޗާރިޔާ ވިދާޅުވީ ބަންގްލަދޭޝްގައި ހުރި ރޮހިންޖާ މުސްލިމުން އުޅެމުންދާ ކޭމްޕްތަކުގެ މީހުންގެ ބަނޑުހައިހޫނު ކަމަށް މިހާރު ކޮންމެ ވެސް ވަރެއްގެ ލުޔެއް ލިބިފައިވާ ކަމަށާއި އެއީ ޑަބްލިޔުއެފްޕީ އާއި އަދިވެސް އެހިނިހެން އެޖެންސީތަކަށް، ރޮހިންޖާ ރެފިއުޖީންނާ ހަމައަށް ވާސިލު ވެވޭތީ ކަމަށެވެ.

އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ވަނީ މިޔަންމާގެ ރޮހިންޖާ މުސްލިމުންނާ ދެކޮޅަށް އާ އޮޕަރޭޝަނެއް ފަށާފައެވެ. މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަަތް ފޭރިގަންނަމުންނެވެ. މިޔަންމާ މީހުން ދެކޭ ގޮތުގައި ރޮހިންޖާ މުސްލިމުންނަކީ އެގައުމުގެ މީހުންނެއް ނޫނެވެ.