"ކީރިތި ޤުރްއާން ބަލައިގެން ކިޔެވުމުގެ ވާޗުއަލް ޤައުމީ މުބާރާތް 2020" އަށް ވައިބަރ މެދުވެރިކޮށް ކިޔެވުމުގެ ރެކޯޑިން މިހާރު ފޮނުވޭނެ
ޕޯޓަލްއަށް މުބާރާތުގައި ކިޔެވުމުގެ ރެކޯޑިން ހުށަހަޅަން ދަތިވާ ބައިވެރިންނަށް 7321728 ވައިބަރ ނަންބަރަށް ވީޑިއޯ ފޮނުވޭނެ
މީގެކުރިން ބޭއްވި ގުރުއާން ކިޔެވުމުގެ ގައުމީ މުބާރާތުގެ ތެރެއިން، މިފަހަރު މި މުބާރާތް ބާއްވަމުންދަނީ ބަލައިގެން ކިޔެވުމަށް ހާއްސަ މުބާރާތެއްގެ ގޮތުގައި
"ކީރިތި ޤުރްއާން ބަލައިގެން ކިޔެވުމުގެ ވާޗުއަލް ޤައުމީ މުބާރާތް 2020" އަށް ވައިބަރ މެދުވެރިކޮށް ކިޔެވުމުގެ ރެކޯޑިން ފޮނުވޭނެ އިންތިޒާމް ހަމަޖެހިފައިވާ ކަމަށް އިސްލާމިކް މިނިސްޓްރީން ބުނެފިއެވެ.
ބުދަ ދުވަހު މިކަމާއި ގުޅޭ އިތުރު މައުލޫމާތު ހިއްސާކޮށް އިސްލާމިކް މިނިސްޓްރީން ބުނީ، ޕޯޓަލްއަށް މުބާރާތުގައި ކިޔެވުމުގެ ރެކޯޑިން ހުށަހަޅަން ދަތިވާ ބައިވެރިންނަށް 7321728 ވައިބަރ ނަންބަރަށް ވީޑިއޯ ފޮނުވުމުގެ އިންތިޒާމު ހަމަޖައްސާފައިވާކަމަށެވެ. އަދި، އެގޮތަށް ހަމަޖައްސާފައި ވަނީ ބައެއް ބޭފުޅުންނަށް ކިޔެވުމުގެ ރެކޯޑިން ޕޯޓަލްއަށް ހުށަހެޅުމުގައި ދަތިތަކެއް ދިމާވަމުން އަންނަ ކަމުގެ ޝަކުވާ ލިބެމުން ދާތީކަމަށެވެ.
މިނިސްޓްރީ އޮފް އިސްލާމިކް އެފެއާޒުން އިންތިޒާމު ކޮށްގެން ބާއްވާ "ކީރިތި ޤުރްއާން ބަލައިގެން ކިޔެވުމުގެ ވާޗުއަލް ޤައުމީ މުބާރާތް 2020" އަކީ މީގެ ކުރިން ބާއްވަމުންދިޔަ ޤައުމީ މުބާރާތާއި ޚިލާފަށް މިހާރުގެ ޙާލަތަށް ރިޢާޔަތްކޮށް ވާޗުއަލްކޮށް ޤައުމީ ފެންވަރުގައި ބޭއްވުމަށް ހަމަޖެހިފައިވާ ބަލައިގެން ކިޔެވުމުގެ ޚާއްޞަ މުބާރާތެކެވެ.
މި މުބާރާތް ދެ ކެޓަގަރީއަކަށް ބަހާލައިގެން ގެންދާއިރު މި ދެ ކެޓަގަރީއަކީ މުޖައްވަދުކޮށް (ދިގު ރާގަށް) އަދި ހަދަރުކޮށް (ކުރު ރާގަށް) ކިޔެވުމެވެ. މުބާރާތް ބޭއްވުމަށް މިނިސްޓްރީއިން ނިންމާފައި ވަނީ ދެ ބުރަކަށް ބަހާލައިގެންނެވެ. އެގޮތުން ފުރަތަމަ ބުރަކީ އޮޑިޝަންގެ ބުރެވެ. މި ބުރު ކުރިއަށްދާނީ 28 ނޮވެމްބަރ 2020 ގެ ނިޔަލަށެވެ. އަދި ފައިނަލް ނުވަތަ އެންމެ ފަހު ބުރު ކުރިއަށް ގެންދިއުމަށް ހަމަޖެހިފައި ވަނީ 13 ޑިސެމްބަރ 2020 ފެށިގެން 17 ޑިސެމްބަރ 2020 ގެ ނިޔަލަށެވެ.
މި މުބާރާތުގައި ބައިވެރިވެވޭނީ ހަމައެކަނި ދިވެހިންނަށެވެ. އަދި މުބާރާތުގައި ބައިވެރިވުމަށްޓަކައި ރަޖިސްޓްރީވުމާ އެކު އޮޑިޝަންގެ ވީޑިއޯ އަޕްލޯޑު ކުރަންޖެހެއެވެ.
މުބާރާތުގައި ބައިވެރިވެވުމުން ކެންޑިޑޭޓަށް ރަޖިސްޓްރީ ވެވުނުކަމުގެ މެސެޖު ލިބިގެން ދާނެއެވެ. އިސްލާމިކް މިނިސްޓްރީން ބުނީ މުބާރާތާއި ބެހޭ އިތުރު މައުލޫމާތު މުބާރާތުގެ އުސޫލުގައި ވާނެ ކަމަށާއި އުސޫލު ޕޯޓަލްއިން ލިބޭނެ ކަމަށެވެ. މި ޕޯޓަލްއަށް ވަދެވޭނީ އިސްލާމިކް މިނިސްޓްރީގެ ވެބްސައިޓް މެދުވެރިކޮށެވެ. އިސްލާމިކް މިނިސްޓަރ ޑރ. އަހްމަދު ޒާހިރު އަލީ ވަނީ މުބާރާތަށް އާންމުންގެ ފަރާތުން ބޮޑު ތަރުހީބެއް ލިބެމުން އަންނަކަމަށް ވިދާޅުވެފައެވެ.
