ގިނަ މުއައްޒަފުންނަށް ހިޔާލު ފާޅު ކުރަން ނުކެރޭ
ޓޫރިޒަމް މިނިސްޓަރ ރާއްޖެޓީވީގެ ފަލަ ސުރުޙީ ޕްރޮގްރާމްގައި
ކުރިއަށް އޮތް ދެމަސް ތެރޭގައި ޓުއަރިޒަމްގެ މުއައްޒަފުންނަށް ހާއްސަ ޕްލެޓްފޯމެއް އުފައްދާނެ ކަމަށް ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
އަންގާރަ ދުވަހުގެރޭ ރާއްޖެޓީވީގެ "ފަލަ ސުރުޙީ" ޕްރޮގްރާމްގައި ވާހަކަ ދައްކަވަމުން މިނިސްޓަރ ވިދާޅުވީ މިނިސްޓަރ މަގާމާއި ހަވާލުވި ދުވަހުން ފެށިގެން ފަތުރުވެރިކަމުގެ ދާއިރާގައި މަސައްކަތްކުރާ ވަރަށް ގިނަ މުވައްޒަފުންނާއި ވާހަކަ ދައްކަމުން ގެންދާ ކަމަށާއި، ނަމަވެސް ގިނަ މުވައްޒަފުންނަށް ހިޔާލު ފާޅު ކުރަން ނުކެރޭކަން ފާހަގަކުރެވިފައިވާ ކަމަށެވެ.
އެހެންކަމުން މިކަމަށް ހައްލެއް ގެނައުމުގެ ގޮތުން މިހާރުވެސް، ކާކުކަން ނޭނގޭ ގޮތަށް މެއިލް ހުށައެޅޭގެ ގޮތް ތައާރަފް ކޮށްފައިވާނެކަން ފާހަގަކުރައްވަމުން މިނިސްޓަރ މައުސޫމް ވިދާޅުވީ މުވައްޒަފުންނާއި އޮންނަ ގުޅުން އިތުރަށް ބަދަހިކުރުމަށްޓަަކައި މިއަހަރުގެ ޑިސެމްބަރ ފަހުކޮޅު ނުވަތަ އަންނަ އަހަރުގެ ޖެނުއަރީ މަހުގެތެރޭގައި، ޓުއަރިޒަމް ދާއިރާގައި މަސައްކަތްކުރާ މުވައްޒަފުންނަށް ހާއްސަ ޕްލެޓް ފޯމެއް ތައާރަފް ކުރާނެ ކަމަށެވެ.
މައުސޫމް ވިދާޅުވީ މިޕްލެޓްފޯމް މިއަހަރު ނޮވެމްބަރު މަހުގެ ކުރިން ތަޢާރަފްކުރަން ނިންމި ނަމަވެސް ބޭރުގެ ޓެކްނޮލޮޖީ ކުންފުންޏަކާއި އެކު ކުރަންޖެހޭ މުއާމަލާތް ނުނިމި ހުރުމުން ލަސްތަކެއް ކުރިމަތިވީ ކަމަށެވެ.
މީގެ އިތުރުން މިނިސްޓަރ ވިދާޅުވީ ރިސޯޓް މުވައްޒަފުންނަކީ ވަރަށް ހުނަރުވެރި އަދި ގާބިލް ބައެއް ކަމަށާއި އެގޮތުން މިފަދަ މުވައްޒަފުން އިތުރަށް ކުރިއަށް ދިޔުމުގެ ފުރުސަތު ލިބޭނެ ގޮތްތަކާއި މެދު މިހާރުވެސް މަޝްވަރާތައް ކުރިއަށް ގޮސް އަމަލީ ގޮތުން މަސައްކަތްތައް ކުރިއަށް ގެންދަމުންދާ ކަމަށެވެ.
މި ކަމުގެ ނަތީޖާ ނިކުންނަން ފެށުމުން ރިސޯޓު މުވައްޒަފުންނަށް އުފާވެރިކަމާއި ހިނިތުންވުން ލިބިގެން ދާނެ ކަމަށް މިނިސްޓަރ ވިދާޅުވި އެވެ.
ކޮވިޑް-19 އާއި ގުޅިގެން ރިސޯޓުތަކުގެ ވަރަށް ގިނަ މުއައްޒަފުންގެ ވަޒީފާ ގެއްލި، ނޯޕޭގައި ބަހައްޓާފައި އަދި އަނބުރާ ރިސޯޓަށް ނުގެންދާ އެތައް މުއައްޒަފުންނެއް އަދިވެސް އެބަތިބި ކަން ފާހަގަ ކުރައްވާ މިނިސްޓަރ ވިދާޅުވީ، މިއަދު އެފަދަ މުއައްޒަފުންގެ ހާލު ބަލަމުން ގެންދަނީ އެކަން ދެނެގެން ކަމަށެވެ.
