މިއަހަރުގެ އެއިޑްސް ދުވަސް ވާޗުއަލްކޮށް، ހަފްތާއަކަށް ކުރިއަށްދާނެ: އެޗްޕީއޭ

ކޮވިޑް-19 ގެ ހާލަތާއި ގުޅިގެން މިއަހަރުގެ އެއިޑްސް ދުވަސް ފާހަގަކުރަން ހަމަޖެހިފައިވަނީ ވާރޗުއަލްކޮށް ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފި އެވެ.

ދުނިޔޭގެ އޭޑްސް ދުވަހުގެ ގޮތުގައި ފާހަގަކުރާ ދުވަހަކީ ކޮންމެ އަހަރެއްގެވެސް ޑިސެމްބަރު މަހުގެ އެއްވަނަ ދުވަހެވެ. މިދުވަސް 1987 ވަނަ އަހަރުން ފެށިގެން ރާއްޖޭގައިވެސް އަންނަނީ ކޮންމެ އަހަރަކު ފާހަކުރަމުންނެވެ. މިއަހަރުގެ އޭޑްސް ދުވަހުގެ ޝިއާރަކީ "ގްލޯބަލް ސޮލިޑަރިޓީ، ޝެއާޑް ރެސްޕޮންސިބިލިޓީ" މިއެވެ.

އެޗްޕީއޭއިން ބުނީ އެއިޑްސް ދުވަސް ފާހަގަކުރުމަށް ކުރިއަށްގެންދާ އެއް ހަފްތާގައި ރަތް ރިބަން ބޭނުން ކުރަން ހަމަޖެހިފައިވާއިރު، މި ދުވަސް މިފަހަރު ފާހަގަކުރާނީ ވާރޗުއަލް ކޮށް ކަމަށެވެ. އަދި ސޯޝަލް މީޑިއާގެ އެކި ޕްލެޓްފޯމްތަކުގައި ރަތް ރިބަން ބޭނުންކޮށްގެން މި ދުވަސް ފާހަގަކުރުމަށް އެ އޮތޯރިޓީ އިން ވަނީ އެދިފައެވެ. މީގެ އިތުރުން ޓީވީ ތަކުންވެސް މި ހަތް ދުވަހު އެކި ޕްރޮގްރާމްތައް ދައްކާއިރު، ޓީވީއަށް ރަތް ރިބަން ލޯގޯ އެރުވުމަށް ވެސް ވަނީ އެދިފައެވެ.

އެޗްޕީއޭއިން ބުނީ މިކަމަކީ، އޭޑްސް ބަލިން މުޖުތަމައު ސަލާމަތް ކުރުމަށްޓަކައި ކުރެވޭ ކަންކަމުގައި ހުރިހާ އެންމެންގެ ބައިވެރިވުން ހިމަނައި، އެއިޑްސް ބަލި ޖެހިފައިވާ ފަރާތްތައް މުޖުތަމައިން ބާކީކޮށް ނުލުމަށް ހުރިހާ ފަރާތްތަކުން ކަނޑައަޅާފައިވާކަން ރަމްޒުކޮށްދިނުމުގެ ގޮތުން ކުރެވެމުންދާ މުހިންމު ކަމެއް ކަމަށެވެ.

ދުނިޔޭގެ އެއިޑްސް ދުވަސް ފާހަގަ ކުރުމުގެ ގޮތުން މީގެ ކުރިން ތަފާތު އެކި ހަރަކާތްތައް ރާވާ ހިންގާފައިވާކަން ފާހަގަކޮށްލެވެ އެވެ. ނަމަވެސް މިއަހަރު މުޅި ދުނިޔެއަށް ދިމާވެފައިވާ ކޮވިޑް-19 ގެ ހާލަތާއެކު ދުނިޔޭގެ އެއްވެސް ގައުމަކުން މި ދުވަސް ފާހަގަކުރުމަށް މާބޮޑެތި ހަރަކާތްތަކެއް އިންތިޒާމުކޮށްފައިވާ ނުވާކަން ފާހަގަކޮށްލެވެ އެވެ.