ހުޅުދޫ ޑްރަގް ޑިޓޮކްސް ސެންޓަރުގައި އެއްފަހަރާ 60 މީހުންނަށް ފަރުވާދެވޭނެ: އެންޑީއޭ
24 ނޮވެމްބަރު 2020 | އަންގާރަ 16:35މިއީ އިންޑިއާގެ ގްރާންޓް އެހީގެ އަށް މިލިއަން ރުފިޔާގެ ދަށުން ޕްލޭނިން މިނިސްޓްރީއިން ހިންގާ މަޝްރޫއެއް
އައްޑޫގައި ގާއިމްކުރާ ޑަރްގް ޑިޓޮކްސްސިފިކޭޝަން ސެންޓަރ އިމާރަތުގެ ކުރެހުމެއް
އައްޑޫ ސިޓީ ހުޅުދޫގައި އަލަށް ޢިމާރާތްކުރެވޭ ޑްރަގް ޑިޓޮކްސިފިކޭޝަން، ރިހެބިލިޓޭޝަން އެންޑް ކޮމިއުނިޓީ ސެންޓަރުގައި އެއްފަހަރާ 60 މީހުންނަށް ޚިދުމަތް ދެވޭނެ ކަމަށް ނޭޝަނަލް ޑްރަގް އޭޖެންސީ (އެންޑީއޭ) އިން ހާމަކޮށްފިއެވެ.
އިންޑިއާގެ އެހީއާއެކު ހުޅުދޫގައި ހެދުމަށް ހަމަޖެހިފައިވާ މި ސެންޓަރު އިމާރާތްކުރުމަށް މިނިސްޓްރީ އޮފް ނެޝަނަލް ޕްލޭނިން، ހައުސިންގް އެންޑް އިންފްރާސްޓްރަކްޗާގެ ފަރާތުން ހަވާލުކޮށްފައި ވަނީ ރެއިންބޯ ކޮންސްޓްރަކްޝަން ޕްރައިވެޓް ލިމިޓެޑް އާއެވެ.
އެންޑީއޭ އިން ބުނެފައި ވަނީ އަލަށް ޢިމާރާތްކުރެވޭ މި ޑްރަގް ޑިޓޮކްސިފިކޭޝަން ސެންޓަރުގައި އެއްފަހަރާ 60 މީހުންނަށް ޚިދުމަތް ދެވޭނެ ކަމަށާއި އޭގެ ތެރޭގައި ރެޒިޑެންޝަލް ފަރުވާގައި 30 މީހަކަށާއި ކޮމިއުނިޓީ ފަރުވާގައި 30 މީހަކަށް ފަރުވާދެވޭނެ ކަމަށެވެ.
މި ސެންޓަރުގައި ޤާއިމުކުރެވޭ ވަސީލަތްތަކުގެ ތެރޭގައި ޑޮކްޓަރ އެގްޒެމިނޭޝަން ރޫމަކާއި، ނަރސިންގ އެގްޒެމިނޭޝަން ރޫމާއި ނަރސިންގ ސްޓޭޝަނެއްގެ އިތުރުން ކައުންސެލަރުންގެ އިންޓަރވިއު ރޫމާއި، ޑައިނިންގ އޭރިއާ، ބަދިގެ، ކްލާސް ރޫމް، އެޑްމިނިސްޓްރޭޓިވް އޮފީސް، ކްލިނިކަލް އޮފީސް، ކުޑަކަމުދާ ތަކެތި ޓެސްޓުކުރެވޭ ގޮތަށް ސެކިއުރިޓީ އޮފީސް، މަލްޓި ޕަރޕަސް ހޯލް، ކްލައިންޓުންގެ އެކޮމޮޑޭޝަން ބްލޮކްސް، ސްޓާފް އެކޮމޮޑޭޝަން ބްލޮކް، ލޯންޑްރީ އޭރިއާ، ސްޓާފް މެސްރޫމް، ކޮންފަރެންސް ރޫމް، މިސްކިތް، ފެމިލީ މީޓިންގ ރޫމް، ލައިބްރަރީ އަދި ޕާކިންގ ގަރާޖް ހިމެނެއެވެ.
ޑްރަގް ޑިޓޮކްސިފިކޭޝަން، ރިހެބިލިޓޭޝަން އެންޑް ކޮމިއުނިޓީ ސެންޓަރެއް އައްޑޫ ސިޓީ ހުޅުދޫގައި ތަރައްޤީކުރެވެނީ، ސަރުކާރުގެ ޚިދުމަތްތައް ލާމަރުކަޒީ ކުރުމުގެ ސިޔާސަތުގެ ތެރެއިން، ރާއްޖޭގެ ހަތް ސަރަޙައްދެއްގައި މި ޚިދުމަތް ފުޅާކުރުމުގެ ގޮތުންނެވެ.
އިންޑިއާގެ ގްރާންޓް އެހީގެ އަށް މިލިއަން ރުފިޔާގެ ދަށުން ޕްލޭނިން މިނިސްޓްރީން ހިންގާ މި މަޝްރޫއު އާއި ގުޅޭ އެމްއޯޔޫގައި ސޮއިކުރެވުނީ އިންޑިއާގެ ފޮރިން ސެކްރެޓަރީ ހަރްޝް ޝްރިންގްލާ ރާއްޖެއަށް ކުރެއްވި ރަސްމީ ދަތުރުފުޅުގައެވެ.
ހުޅުދޫގައި މި ގާއިމް ކުރެވޭ ޑްރަގް ޑީޓޮކްސް ސެންޓަރަކީ އިންޑިއާގެ ހައި އިމްޕެކްޓް ކޮމިއުނިޓީ ޑިވެލޮޕްމެންޓް ޕްރޮޖެކްޓްސް ސްކީމްގެ 200 މިލިއަން ރުފިޔާގެ (13 މިލިއަން ޑޮލަރު) ގްރާންޓްގެ ދަށުން ރާއްޖޭގައި ހިންގެމުންދާ 30 ކުދި އަދި މެދުމިނުގެ މަޝްރޫއުތަކުގެ ތެރެއިން މަޝްރޫއުއެކެވެ.
