ކަނޑުހުޅުދޫ ގާޒީގެ ސައިކަލުގައި ރޯކޮށްލި މައްސަލައިގައި ދެ މީހުން ހައްޔަރުކޮށްފި
ހައްޔަރުކުރީ 30 އަހަރާއި 22 އަހަރުގެ ދެ ފިރިހެނުން
ސައިކަލްގައި ރޯކޮށްލީ ގާޒީ ފަތިސްނަމާދަށް ހުންނަވަނިކޮށް
ގއ. ކަނޑުހުޅުދޫ ކޯޓުގެ މެޖިސްޓްރޭޓް ހަސަން ދީދީގެ ސައިކަލްގައި ރޯކޮށްލައި އަންދާލި މައްސަލާގައި ދެ މީހުން ހައްޔަރުކޮށްފިއެވެ.
ފުލުހުން ބުނީ ބުދަ ދުވަހުގެރޭ ފަތިހުގެ ވަގުތެއްގައި ސައިކަލެއްގައި ރޯކޮށްލި މައްސަލައިގެ ތުހުމަތުގައި ކޯޓް އަމުރެއްގެ ދަށުން 30 އަހަރުގެ ފިރިހެނަކާއި 22 އަހަރުގެ ފިރިހެނަކު އެރަށުން ހައްޔަރުކޮށްފައިވާ ކަމަށެވެ.
މި ހާދިސާއާ ގުޅޭ ގޮތުން، އެރަށުގެ ރައްޔިތަކު ބުނީ، އެރަށު މެޖިސްޓްރޭޓް ކޯޓުގެ އިސް ގާޒީ ހަސަން ދީދީ، ފަތިސް ނަމާދަށް ހުންނަވަނިކޮށް ސައިކަލްގައި ރޯކޮށްލާފައިވާ އިރު، އެރަށުގެ ސްކޫލުގެ ލީޑިން ޓީޗަރެއްގެ ސައިކަލު ވެސް ރޯވެފައިވާ ކަމަށެވެ. އެހެން ނަމަވެސް އޭނާގެ ސައިކަލަށް މާބޮޑު ގެއްލުންތަކެއް ނުވާ ކަމަށް ރަށުން ވާހަކަދެއްކި މީހާ ރާއްޖެއެމްވީއަށް މައުލޫމާތުދީފައިވެއެވެ.
އޭނާ ބުނީ، ބެލެވޭ ގޮތުގައި ސައިކަލްގައި ރޯކޮށްލާފައިވަނީ، ފަތިސްނަމާދުގެ ދެވަނަ ރަކުއަތުގައި ކަމަށާއި، އެތަނުން ރޯކޮށްލުމަށްޓަކާއި ބޭނުންކުރި ސާފު ތެޔޮފުޅިވެސް އެއްލާލާފައި އޮއްވާ ފެނިފައިވާ ކަމަށެވެ.
މިކަމަކީ ރަށުގެ ރައްޔިތުންގެ މެދުގައި އުފެދިފައިވާ ސިޔާސީ ހިތްހަމަނުޖެހުންތަކެއްގެ ސަބަބުން ދިމާވި ކަމެއް ކަމަށް ބެލެވޭ ކަމަށް ގއ. ކަނޑުހުޅުދޫއިން ވާހަކަދެއްކި ފަރާތުން މައުލޫމާތުދީފައިވެއެވެ.
