ނިއު ޔޯކްގައި ކޮވިޑް-19 ޖެހިގެން މަރުވި 400 އަށް ވުރެ ގިނަ މީހުންގެ ހަށިގަނޑު އަދިވެސް ޖަނާޒާ ނުބޭއްވި ކިއޫގައި ބަހައްޓާފައިވާ ކަމަށް ބޭރުގެ މީޑިއާތަކުން ރިޕޯޓްކޮށްފިއެވެ.

"ސްކައި ނިއުސް" ގައި ރިޕޯޓްކޮށްފައިވާ ގޮތުން ޖަނާޒާގެ ކަންކަން ކުރިއަށް ގެންދިއުމަށް ހަމަޖެހިފައިވާ ހިނަވާގެއެއްގެ ކައިރީގައި ހުރި ރެފްރިޖްރޭޓަޑް ޓްރަކްތަކެއްގައި މިހާރު ވެސް 650 އަށް ވުރެ ގިނަ ހަށިތައް ރައްކާ ކޮށްފައިވެއެވެ. އޭގެ ތެރެއިން 230 މީހުންގެ ޖަނާޒާ ކުރިއަށް ގެންދެވިފައި ނުވަނީ އާއިލާއާ ގުޅޭނެ ގޮތެއް ނެތިގެންނެވެ.

އޭގެ އިތުރުން، ބައެއް މީހުންގެ އާއިލާއިން ހަށިގަނޑާ ޙަވާލުވުމާމެދު ގޮތެއް ނިންމުން ލަސްވުމާއި، ޖަނާޒާގެ ކަންކަން ބެލެހެއްޓޭ ވަރުގެ މާލީ އިންތިޒާމުތައް ހަމަޖެއްސުން ލަސްވެގެން ދިއުންވެސް ލަސްވާ ސަބަބުތަކުގެ ތެރޭގައި ހިމެނޭ ކަމަށް ރިޕޯޓްތައް ބުނެއެވެ.

މި ދަނޑިވަޅަކީ ނިއު ޔޯކްގައި ފެންނަމުންދާ ކޭސްތަކުގެ އަދަދުތައް އިތުރުވަމުންދާ ދަނޑިވަޅެއްކަން ފާހަގަކޮށް "ސްކައި ނިއުސް" އިން ރިޕޯޓްކުރީ، މިހާރުވެސް ނިއުޔޯކުން ދުވާލެއްގެ މައްޗަށް 800 އެއްހާ މީހުން ކޮވިޑް-19 ޖެހިގެން މަރުވާ ކަމަށެވެ.

އެމެރިކާއިން މިހާތަނަށް 12 މިލިއަނަށްވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވާއިރު، 263،000 އަށް ވުރެ ގިނަ މީހުން ވަނީ މި ބަލީގައި މަރުވެފައެވެ. އަދި އެމެރިކާގެ ސްޓޭޓްތަކުގެ ތެރެއިން އެންމެ ފުރަތަމަ ކޮވިޑް ފެތުރިގެން ދިޔައީ ނިއު ޔޯކުގައި ކަން ފާހަގަކޮށްލެވެއެވެ.