އިންޓަގްރޭޓެޑް ޓޫރިސްޓް ރިސޯޓް ތަރައްޤީކޮށް ހިންގުމުގެ އުސޫލު ބަޔާންކޮށް ދިވެހިރާއްޖޭގެ ޓޫރިޒަމާބެހޭ ޤާނޫނަށް އިސްލާހު ގެނައުމުގެ ބިލް ދިރާސާކުރުމަށް މުޅި މަޖިލީހުގެ ކޮމިޓީއަށް ފޮނުވައިފިއެވެ.
މި ބިލް ސަރުކާރުގެ ފަރާތުން ހުށަހަޅުއްވާފައި ވަނީ އެމްޑީޕީގެ ޕާލަމެންޓްރީ ގްރޫޕްގެ ލީޑަރ އަދި މެދު ހެންވޭރު ދާއިރާގެ މެމްބަރ އަލީ އާޒިމްއެވެ. މި ބިލް މަޖިލީހަށް ބަލައިގަންނަން ފެނޭތޯ ނެގުނު ވޯޓުގައި ބައިވެރިވެވަޑައިގެންނެވި 48 މެމްބަރުންގެ ވޯޓުން ވަނީ ބިލް ބަލައިގަތުމަށް ފާސްވެފައެވެ. މިއާއެކު މި ބިލް ދިރާސާކުރުމަށް ވަނީ މުޅި މަޖިލީހުގެ ކޮމިޓީއަށް ފޮނުވާފައެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ބިލް ދިރާސާކުރުމުގެ މަސައްކަތް ބުދަ ދުވަހު ކުރިޔަށް ގެންދަވާނެ ކަމަށެވެ. އަދި މި ބިލަކީ އާމްދަނީ އާއި ގުޅުންހުރި ބިލަކަށް ވުމުން ވީއެންމެ އަވަހަކަށް ބިލް ދިރާސާކުރުމުގެ މަސައްކަތްކޮށް ނިންމަވާނެ ކަމަށް ރައީސް ނަޝީދު ވިދާޅުވިއެވެ.
ބިލް ހުށަހަޅުއްވަމުން އަލީ އާޒިމް ވިދާޅުވީ މި ބިލަކީ މި ވަގުތަށް ވަރަށް މުހިންމު ބިލެއް ކަމަށެވެ. ސަބަބަކީ ދައުލަތުގެ ބަޖެޓް މިހާރު އެތައް ގުނައަކުން ދަރަނިވެރި ވެފައިވާއިރު އަންނަ އަހަރަށް ލަފާކުރާ ދައުލަތުގެ ބަޖެޓްގައި އާމްދަނީ ލިބޭނެ ކަންކަމުގެ ތެރޭގައި ހިމަނާފައިވާ ކަންކަން މި ބިލްގައި ވާތީ ކަމަށް އާޒިމް ވިދާޅުވިއެވެ. އެހެން ކަމުން މި ބިލް މުޅި މަޖިލީހުގެ ކޮމިޓީން ދިރާސާކޮށް ވީއެންމެ އަވަހަކަށް ޤާނޫނަކަށްވުމަކީ މުހިންމު ކަމެއްކަމަށް އާޒިމް ވިދާޅުވިއެވެ.
މި އިސްލާހުގެ ސަބަބުން ވިޔަފާރިތައް އިތުރުވެ ވަޒީފާތައް އިތުރުވެ ދައުލަތަށް ވަންނަ ފައިސާ އެތައް ގުނައަކަށް އިތުރު ވެގެން ދާނެ ކަމަށް އާޒިމް ވިދާޅުވިއެވެ.
މި އިސްލާހުތަކުގެ އެންމެ މުހިންމު މަގްސަދަކީ މިހާރަށް ވުރެ ފަސޭހައިން ޤާނޫނީ ބާރު ލިބިގެން ފަތުރުވެރިކަމާއި ވިޔަފާރި ފުޅާކުރުމުގެ ގޮތުން އިންޓަރގްރޭޓެޑް ޓޫރިޒަމް ރިސޯޓާއި ސްޓަރޓާއި އުސޫލުން ރިސޯޓްތަކުގެ ކޮޓަރި ނުވަތަ ވިލާ ދިގު މުއްދަތަކަށް ކުއްޔަށްދިނުމާއި ޕްރައިވެޓް އައިލެންޑް ކުއްޔަށްދިނުމާއި ގުޅޭ އުސޫލުތަކާއި ހަމަތައް ތަޢާރަފްކުރުމާ އެފަދަ ވިޔަފާރި ތަރައްޤީކުރުމަށް ރަށް ނުވަތަ ބިން ނުވަތަ ފަޅު ކުއްޔަށްދިނުމާއި އެފަދަ ތަންތަނުގެ ކުލި ދައްކަންޖެހޭ އުސޫލު މިހާރަށްވުރެ ފަސޭހަވާނެ ގޮތަކަށް ސަރުކާރުން އެކުލަވާލާ ފޮނުވާފައިވާ އިސްލާހެއް.މެދު ހެންވޭރު ދާއިރާގެ މެމްބަރ އަލީ އާޒިމް
އާޒިމް ވިދާޅުވީ މިބިލްގައި މައިގަނޑު ކަންތައްތައްތަކުގެ ތެރޭގައި އިންޓަރގްރޭޓެޑް ޓޫރިޒަމް ލ. އަތޮޅު ބަރެސްދޫ ނޫނީ ކްރޮސްރޯޑް ހިންގާ އުސޫލުން ޤާނޫނެއްގެ ތެރެއިން ހިންގޭނެ ފުރުސަތު އާންމު ފަރާތްތަކަށް ލިބިގެންދާ ކަމަށެވެ.
އެގޮތުން ޑިވެލޮޕަރ އެއް މެދުވެރިވެގެން ފެނާއި ނަރުދަމާ، ކަރަންޓް އަދި މަގުގެ ކަންކަން ރަނގަޅު ކުރުމަށްފަހު އާންމު ފަރާތްތަކަށް ވަކި ތަންތަން ވިޔަފާރި ކުރުމަށްޓަކައި ޓޫރިޒަމާ ގުޅޭ ފިހާރަ ރެސްޓޯރެންޓް ފަދަ ތަންތަން ދިގު މުއްދަތަކަށް ކުއްޔަށް ނެގުމުގެ ފުރުސަތު ފަހިކޮށްދެވިގެންދާނެ ކަމަށް އާޒިމް ވިދާޅުވިއެވެ. އަދި މި ބިލުން ޕްރައިވެޓް އައިލެންޑް، ވަކި މީހަކަށް އަމިއްލައަށް ގަނެ އެތާ ދިރިއުޅެވޭނެ ގޮތް ހެދުމުގެ ފުރުސަތު ފަހިވެގެންދާ ކަމަށް އާޒިމް ވިދާޅުވިއެވެ.
އޭގެ އިތުރުން ސްޓަރޓަރ އުސޫލުން ކޮޓަރި ކުއްޔަށްދިނުމުގެ ފުރުސަތުވެސް ލިބިގެންދޭ. ޓޫރިސްޓް ރިސޯޓް، ޓޫރިސްޓް ހޮޓާ، ޔޮޓް މެރީނާ، އިންޓަރގްރޭޓެޑް ޓޫރިޒަމް ޕްރޮޖެކްޓްތައް ތަރައްޤީ ކުރުމަށް ކުއްޔަށްދޭ ރަށްރަށާއި ބިންބިން ކުއްޔަށް ވަރަށް ބޮޑު ބަދަލެއް މައިގަނޑު ގޮތެއްގައި އެވްރެޖްކޮށް ގިނަ ރިސޯޓްތަކަށް މިހާރުވެސް އަގުތައް އެބަ ހެޔޮވެގެންދޭ. އެހެން ނަމަވެސް މިގެންނަ އިންޓަގްރޭޓެޑް ޓޫރިޒަމް ސަރުކާރަށް ލިބޭ އާމްދަނީ އެތައް ގުނައެއް އިތުރުވެގެންދޭ. ކުއްޔަށް ބަދަލު ނާންނަނީ މާލެ އަތޮޅުގައި މިއޮތް ރިސޯޓްތަކުން. އޭގެ އިތުރުން މުހިންމު ކަމެއްގެ ގޮތުގައި މިހާރު ނެހެދިފައިވާ ރިސޯޓްތަކަށް އިންޓަގްރޭޓެޑް ޓޫރިޒަމް ތެރެއަށް ވައްދާ ހެދޭނެ އުސޫލެއް މި ޤާނޫނުން ފަހިވެގެން ގޮސްފައިވާނެ.މެދު ހެންވޭރު ދާއިރާގެ މެމްބަރު އަލީ އާޒިމް
އާޒިމް ހުށަހަޅުއްވާފައިވާ މި ބިލްގައި 20 އިސްލާހެއްވެއެވެ. އޭގެ ތެރޭގައި މުޅިން އަލަށް ގެންނަ 6 އިސްލާހެއް ހިމެނޭއިރު މުޅިން އައު 6 މާއްދާއެއް އިތުރެވެގެންދެއެވެ. އަދި މިހާރު އަމަލުކުރަމުންދާ ޓޫރިޒަމްގެ ޤާނޫނުން 3 މާއްދާއެއް އުނިކުރެއެވެ.
