ކުޑަކުދިންގެ ހިޔާގައި ތިބި ކުދިންތަކަކަށް އަނިޔާކުރި 11 މީހެއްގެ މައްޗަށް ދައުވާކުރުމަށް ފޮނުވައިފި
ތަހުގީގު ފުރިހަމަކުރުމަށް އިތުރު 24 މީހަކާއި ސުވާލުކުރެވި، 24 ބަޔާން ނަގައި، 05 ކުޑަކުދިންނާ ސުވާލުކުރެވުނު
ކުޑަކުދިންގެ ހިޔާ
ކުޑަކުދިންގެ ހިޔާގައި ތިބި ކުދިންތަކަކަށް އަނިޔާކުރިކަމަށް ތުހުމަތުކުރެވޭ 11 މީހެއްގެ މައްޗަށް ދައުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.
ކުޑަކުދިންނަށް ކުރާ އަނިޔާތައް ބަލާ ކޮމިޝަނުން ބުނީ ކުޑަކުދިންނަށް ކުރާ އަނިޔާތަކާއި ގުޅޭގޮތުން އެ ކޮމިޝަނުން ކުރިއަށް ގެންދާ އިންކުއަރީ މަސައްކަތުގެ ތެރެއިން 2017 ވަނަ އަހަރު ކުޑަކުދިންގެ ހިޔާގައި ތިބި ކުދިންނާ މެދު އެ ތަނުގެ މުވައްޒަފުންގެ ފަރާތުން އެކިއެކި ޖިސްމާނީ އަދި ނަފްސާނީ އަނިޔާތައް ދީފައިވާ މައްސަލައެއް އެ ކޮމިޝަނަށް ފާހަގަކުރެވިފައިވާ ކަމަށެވެ.
އެގޮތުން ކުޑަކުދިންގެ ހިޔާގައި ތިބި ކުދިންނާމެދު އެތަނުގައި އޭރު މަސައްކަތް ކުރަމުން ދިޔަ ބައެއް މުވައްޒަފުން އަނިޔާވެރި އަމަލުތަކެއް ހިންގާފައިވާ މައްސަލަ ޖުލައި 2018 ގައި މޯލްޑިވްސް ޕޮލިސް ސަރވިސް އަށް ރިޕޯޓުކުރެވުނު ނަމަވެސް، މިހާތަނަށް އެ މައްސަލައިގައި ހިމެނޭ އެއްވެސް މީހެއްގެ މައްޗަށް ފިޔަވަޅެއް އަޅާފައިނުވާކަން ކަން އެ ކޮމިޝަނަށް ވަނީ ފާހަގަކުރެވިފައެވެ.
މި މައްސަލައިގައި ވީ އެންމެ އަވަހަކަށް ތަހުގީގު ފުރިހަމަކޮށް، ތުހުމަތުކުރެވޭ މީހުންގެ މައްޗަށް ދައުވާ އުފުލުމަށްޓަކައި ޕްރޮސިކިއުޓަރ ޖެނެރަލްއަށް ލިބިދޭ ގާނޫނީ ބާރުގެ ދަށުން، އެ ކޮމިޝަނުގެ ފަންނީ ލަފައާއި އިރުޝާދާއި މަޝްވަރާގެ ދަށުން ފުލުހުން މި މައްސަލައިގެ ތަހުގީގު ވީ އެންމެ އަވަހަކަށް ފުރިހަމަކޮށް ދައުވާ ކުރުމަށް ފޮނުވުމުގެ އަމުރެއް، 2020 އޮކްޓޫބަރު 11 ގައި ޕްރޮސިކިއުޓަރ ޖެނެރަލް ވަނީ ނެރެދެއްވާފައެވެ.
މައްސަލައިގެ ތަހުގީގު މުސްތަގިއްލު ކަމާއެކު ކުރިއަށް ގެންދިޔުމަށް އެޅެން ހުރި ހުރިހާ ފިޔަވަޅުތަކާއި އެކު، އެ ކޮމިޝަނާއި، މޯލްޑިވްސް ޕޮލިސް ސަރވިސް އާއި އަދި ޕްރޮސިކިއުޓަރުން ހިމެނޭ ގޮތުން އެކުލަވާލެވުނު ހާއްސަ ޓީމަކުން މައްސަލައިގެ ތަހުގީގު ފުރިހަމަ ކުރުމަށް 12 އޮކްޓޫބަރު 2020 ގައި މަސައްކަތް ފައްޓައި، ތަހުގީގު ފުރިހަމަކުރުމަށް އިތުރު 24 މީހަކާއި ސުވާލުކުރެވި، 24 ބަޔާން ނަގައި، 05 ކުޑަކުދިންނާ ސުވާލުކުރެވި މައްސަލައިގައި ތުހުމަތުކުރެވޭ އިތުރު ފަރާތެއް ދެނެގަނެވުނު ކަމަށް ކޮމިޝަނުން ބުނެއެވެ.
މި މައްސަލައިގެ ތަހުގީގު ފުރިހަމަކޮށް، ތުހުމަތުކުރެވޭ ޖުމްލަ 11 މީހެއްގެ މައްޗަށް ދައުވާ އުފުލައިދިނުމަށް އެދި، 23 ނޮވެންބަރު 2020 ގައި މި މައްސަލަ ޕްރޮސިކިއުޓަރ ޖެނެރަލްގެ އޮފީހަށް ހުށަހެޅުމުން އެ އޮފީހުން މައްސަލަ ބަލައިގަނެ، ދައުވާ އުފުލުމުގެ މަސައްކަތް ފަށާފައިވާ ކަމަށެވެ.
މި މައްސަލަ ރިޕޯޓުކުރުމާއި ފިޔަވަޅު އެޅުމުގެ މަރުޙަލާގައި ކަން ހިނގާގޮސްފައިވާ ގޮތް ދެނެގަނެ ދައުލަތުގެ ބެލުމުގެ ދަށުގައި ތިބޭ ކުޑަކުދިންގެ ރައްކާތެރިކަން ކަށަވަރުކުރުމާއި، 2017 ގައި ކުޑަކުދިންގެ ހިޔާގައި ހިނގާފައިވާ މި މައްސަލަ ތަހުގީގުކުރުމާއި، ފިޔަވަޅު އެޅުމުގައި ޒިންމާވާ މުއައްސަސާތަކުގެ އެއްވެސް އިހުމާލެއް ވޭތޯ ދެނެގަތުމުގެ މަސައްކަތް އެ ކޮމިޝަނުން ވަކި އިންކުއަރީއެއްގެ ގޮތުގައި ކުރިއަށްގެންދާނެ ކަމަށް ކޮމިޝަނުން ބުނެއެވެ.
މި މައްސަލާގައި އިހުމާލެއްވޭތޯ ބަލަމުންދާ އިރު، ހިޔާގެ މުވައްޒަފުން ދައުލަތުގެ ބެލުމުގެ ދަށުގައި ތިބި ކުދިންތަކެއް މީހުން ކުރިމަތީގައި "ބަރަހަނާ" ވާ ގޮތަށް އަމަލު ހިންގި މައްސަލައެއް ވެސް މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމެޓީ އިން ސީރިއަސް މައްސަލައެއްގެ ގޮތުގައި ބަލާފައިވެއެވެ.
