ފްރާންސްގެ ކުރީގެ ރައީސް ނިކޮލަސް ސާކޯޒީގެ މައްޗަށް ތުހުމަތުކުރެވޭ ކޮރަޕްޝަން އާއި މަގާމުގެ ނުފޫޒު ނަހަމަގޮތުގައި ބޭނުން ކުރުމުގެ މައްސަލައިގެ އަޑުއެހުންތައް ފަށައިފި އެވެ.
ހޯމަ ދުވަހު ފުރަތަމަ އަޑުއެހުން ބޭއްވި ނަމަވެސް އަޑުއެހުން ކުރިއަށް ގެންގޮސްފައި ވަނީ އެންމެ 30 މިނެޓަށެވެ. އެގޮތުން މި އަޑުއެހުމުގައި ފްރާންސްގެ ކުރީގެ ރައީސް ސާކޯޒީގެ އިތުރުން، ސާކޯޒީގެ ވަކީލު ތިއެރީ ހާޒޯގް އަދި މެޖިސްޓްރޭޓް ގިލްބަރޓް އެޒިބަރޓްއަށް ވެސް ހާޒިރުކޮށްފަ އެވެ.
މި ތިން މީހުންނަށްވެސް ތުހުމަތު ކުރެވެނީ އެއް މައްސަލައެއްގަ އެވެ. މި ތުހުމަތުތައް ސާކޯޒީ އަށް ކުރެވެނީ އޭނާގެ ނުފޫޒު ބޭނުންކޮށްގެން 2014 ވަނަ އަހަރު އޭނާ އާއި ގުޅޭ ގޮތުން ކުރިއަށް ގެންދިޔަ ތަހުގީގެއްގެ މައުލޫމާތު މެޖިސްޓްރޭޓް ގިލްބަރޓްގެ ފަރާތުން ހޯދަން އުޅުމުންނެވެ.
މި ތުހުމަތުތައް މި ތިން މީހުންގެ މައްޗަށް ސާބިތުވެއްޖެ ނަމަ 10 އަހަރުގެ ޖަލު ހުކުމާއި އެކު އެއް މިލިއަން ޔޫރޯ އިން ޖޫރިމަނާ ކުރެވޭނެ އެވެ.
އަޑުއެހުން 30 މިނެޓަށް ކުރިއަށް ގެންގޮސްފައި ވަނީ މެޖިސްޓްރޭޓް ގިލްބަރޓް އަކީ ހައިރިސްކް ކެޓަގަރީގެ މީހަކަށް ވުމުން ކޮވިޑްގެ މިހާލަތުގައި އޭނާ އަށް އަޑުއެހުންތަކަށް އައުމަކީ ކުރެވޭނެ ކަމެއް ނޫން ކަމަށް އޭނާގެ ވަކީލު ފާހަގަކޮށް އަޑުއެހުން މަޑުޖައްސާލަން އެދުމުންނެވެ. އެހެންކަމުން އަޑުއެހުމުގެ ޖަޖް ވަނީ ބުރާސްފަތި ދުވަހު އަޑުއެހުން ބޭއްވުމަށް ފަސްކޮށްދީފަ އެވެ.
