ބަޖެޓު ކޮމިޓީގެ މަސައްކަތް މިއަދަށް ނިންމުމަށް މަޖިލީހުގެ ރައީސް އެދިވަޑައިގެންފި
23 ނޮވެމްބަރު 2020 | ހޯމަ 05:50ބަޖެޓަށް ބަހުސްކޮށް ނިންމާލާފައިވަނީ މިދިޔަ ބުދަ ދުވަހު
ބަޖެޓު ކޮމިޓީގެ މުގައްރިރު މުހައްމަދު ނާޝިޒް
އަންނަ އަހަރަށްލަފާ ކުރާ ދައުލަތުގެ ބަޖެޓު ދިރާސާ ކުރަމުންދާ ބަޖެޓު ކޮމިޓީގެ މަސައްކަތް ނިންމާ، ކޮމިޓީ ރިޕޯޓު މިއަދު ތަޅުމަށް ފޮނުވާ ދިނުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ހޯމަ ދުވަހުގެ ޖަލްސާގައި ވާހަކަދައްކަވަމުން ރައީސް ނަޝީދު ވަނީ ކޮމިޓީގެ މަސައްކަތްތައް އަވަސްކޮށްދިނުމަށް އެދިވަޑައިގެންފަ އެވެ.
ބަޖެޓު ކޮމިޓީގެ މަސައްކަތްތައް ނިންމުމަށް އެންމެ ފުރަތަމަ ނިންމީ މި މަހުގެ 19 ވަނަ ދުވަހަށެވެ. އެހެންނަމަވެސް، ހުރިހާ މެމްބަރުން ބަޖެޓަށް ބަހުސްކޮށް ނިމުމުން މަސައްކަތްތައް ނިންމުމަށް މަޖިލީހުގެ ރައީސް އެދިވަޑައިގަތެވެ. އެއީ މަޖިލީހުގެ ގަވާއިދުގައި ވާގޮތުން ބަޖެޓާއި ގުޅިގެން މެމްބަރުން ފާހަގަކުރައްވާ ކަންކަން ކޮމިޓީއަށް ފޮނުވަން ޖެހޭތީ އެވެ.
ބަޖެޓަށް ބަހުސްކޮށް ނިންމާލާފައިވަނީ މިދިޔަ ބުދަ ދުވަހު އެވެ.
ކޮންމެ މެމްބަރަކަށް ވެސް ބަޖެޓަށް ބަހުސްކުރުމަށް 15 މިނެޓްގެ އެއް ފުރުސަތެއް ލިބިގެންދިޔަ އެވެ. އަދި ބަހުސްގެ މަރުހަލާގައި މެމްބަރުން ފާހަގަކުރައްވާ ކަންތައްތަކަށް ޖަވާބު ދެއްވުމަށް ފިނޭންސް މިނިސްޓަރ އިބްރާހީމް އަމީރަށް 40 މިނެޓްގެ ވަގުތެއް ވެސް ލިބިގެންދިޔަ އެވެ.
