ދިރާގާއި ފޯރޓިނެޓް ގުޅިގެން ސައިބަރ ސެކިއުރިޓީއާ ބެހޭ ޚާއްސަ ވެބިނަރއެއް ބާއްވައިފި
މި ވެބިނަރ ބާއްވާފައިވަނީ ދިރާގު 'އެއްވުން' ޕްލެޓްފޯމްގައި
ސައިބަރ ސެކިއުރިޓީ އާއި ބެހޭގޮތުން ބޭއްވި ވެބިނަރ
ދިވެހިރާއްޖޭގައި އެންމެ ފުޅާ ދާއިރާއެއްގައި ޑިޖިޓަލް ހިދުމަތް ފޯރުކޮށްދޭ ކުންފުނި، ދިރާގުން، އިންފޮމޭޝަން ޓެކްނޮލޮޖީ ދާއިރާގެ ބޭފުޅުންނަށް އަމާޒުކޮށްގެން ސައިބަރ ސެކިއުރިޓީ އާ ބެހޭގޮތުން ފޯރޓިނެޓް އާ ގުޅިގެން ވެބިނަރއެއް ބާއްވައިފިއެވެ.
މި ވެބިނަރ ބާއްވާފައި ވަނީ ދިރާގު 'އެއްވުން' ޕްލެޓްފޯމްގައެވެ.
"ފްރޮމް ސެކިއުރިޓީ ޓު ޓްރަސްޓް" ގެ ނަމުގައި ކުރިއަށްގެންދިޔަ މި ވެބިނަރގައި އަލިއަޅުވާލި މައިގަނޑު ވާހަކަތަކުގެ ތެރޭގައި ގްލޯބަލް ސެކިއުރިޓީ ޓްރެންޑްސް، ކޮވިޑް 19 އާއި އެފަދަ ބަލިމަޑުކަމެއްގެ ތެރޭގައި އާއި ގޭގަ މަސައްކަތް ކުރުމުން ސައިބަރ ސެކުރިޓީ އަށް ކުރިމަތިވަމުންދާ ގޮންޖެހުންތަކާއި ނުރައްކާތަކާއި، މި ފަދަ ނުރައްކާތަކުން ކުންފުނިތަކާއި މުވައްޒަފުން ސަލާމަތް ކުރުމަށް ކުރެވޭނެ ކަންތައްތަކާއި ސޮލިއުޝަންތަކަށެވެ.
މި ވެބިނަރގެ ކީނޯޓް ދެއްވީ ޓެކް ދާއިރާގައި 20 އަހަރު ދުވަހުގެ ތަޖުރިބާހުރި އަދި މިހާރު އީގާޑިއަން ޕްރައިވެޓް ލިމިޓެޑް، ޑީ.ސީ.އެސް ޕްރައިވެޓް ލިމިޓެޑް އަދި އައި.އައި.އެޗް.ޓީ ސްރީލަންކާގެ ޑިރެކްޓަރ އަދި ޑެލްޓާ ސްޕައިކް ޕްރައިވެޓް ލިމިޓެޑްގެ ކޯފައުންޑަރ ކަމަށްވާ ޝިހާން އަނޮން އެވެ. މީގެ އިތުރުން ޝިހާން އަކީ "ސޭންސް" ސެޓިފައިޑް ސެކިއުރިޓީ މާހިރެކެވެ. ޝިހާންގެ ވާހަކަައިގައި ކޮވިޑް19ގެ ސަބަބުން، ގޭގަ މަސައްކަތްކުރާއިރު ސައިބަރ ސެކިއުރިޓީ އަށް ކުރިމަތި ވަމުންދާ ގޮންޖެހުންތަކާއި ނުރައްކާތަކާ ބެހޭގޮތުން ވަނީ އަލިއަޅުއްވާލައްވައިފައެވެ. އަދި މީގެ އިތުރުން ދުނިޔޭގައި އެނބުރެމުންދާ ނުރައްކާތެރި ސައިބާ ހަމަލާތަލާ ބެހޭ މައުލޫމާތު އުނގެނި، އެކަންތައްތަކުން ރައްކާތެރިވެ، ހޭލާ ތިބުމުގެ މުހިންމު ކަމަށް ވަރަށް ބޮޑަށް ފާހަގަ ކުރެއްވިއެވެ.
މި ވެބިނަރގައި ސަބްޖެކްޓް އެކްސްޕާޓެއްގެ ގޮތުން ވާހަކަފުޅު ދެއްކެވީ 20 އަހަރަށް ވުރެ ގިނަ ދުވަހުގެ އައިޓީ ސިކިއުރިޓީ ތަޖުރިބާހުރި އަދި މިހާރު ފޯރޓިނެޓްގެ ޕްރިންސިޕަލް ސިސްޓަމް އިންޖިނިއަރ ކްރިޝްނަން ރާޖަގޮޕްލަން އެވެ. އެ ބޭފުޅާގެ ވާހަކަފުޅުގައި އަލިއަޅުވައިދެއްވީ ސައިބަރ އެޓޭކް ތަކަކީ މިއަދުގެ ދުނިޔޭގައި މެދުނުކެނޑި 24 ގަޑި އިރު ހިނގަމުން ދާ ކަމެއްކަމަށާއި، ވިޔަފާރީގެ ބޭނުންތަކާއި އެކި ޚިދުމަތްތައް ފޯރުކޮށްދިނުމުގައި ޓެކްނޮލޮޖީ ބޭނުން ކުރާ މިންވަރު އިތުރުވެ، ޓެކްނިކަލް އާލާތްތައް ބޭނުން ކުރުން އިތުރުވާ މިންވަރަކަށް މިފަދަ އެޓޭކްތައް އަމާޒުވެ ސައިބަރ ހަމަލާ އަކަށް ހުށައެޅުމުގެ ކުރައްކާ އިތުރު ވެގެން ދާ ކަމަށެވެ. އެހެންކަމުން، ޚިދުމަތަކުގެ ސެކިއުރިޓީ އިތުރު ކުރުމަށްޓަކައި، ޚިދުމަތް ބޭނުންކުރާ ފަރާތް ތަކާއި، ޑިވައިސްތައް ވަގުތުން ވަގުތަށް މޮނިޓަރ ކުރުމަކީ ނުހަނު ބޭނުން ތެރި ކަމެއް ކަމަށް އަލިއަޅުވާލެއްވިއެވެ.
ދިރާގު ބެކަޕް އަދި ރިކަވަރީ އަކީ ޑިޒާސްޓަރ ރިކަވަރީ އަދި ބިޒްނަސް ކޮންޓިނިއުޓީ އަށް ހާއްސަ ކޮށްގެން ފަރުމާކޮށްފައިވާ ޚިދުމަތެކެވެ. އެގޮތުން، މި ޚިދުމަތަކީ ކްލައުޑް ބޭސްޑް ބެކަޕް ޚިދުމަތެކެވެ.
އެގޮތުން، މި ޚިދުމަތް މެދުވެރިކޮށް ކަސްޓަމަރުންގެ އެންމެ ކްރިޓިކަލް ނުވަތަ އެންމެ މުހިންމު އައިޓީ ސިސްޓަމްތަކުގެ ޑޭޓާ ރައްކާތެރިވެ، ސަރވަރ ކްރޭޝްވުން ފަދަ ކަމެއް މެދުވެރި ވެއްޖެ ހާލަތެއްގައި އެ ސިސްޓަމްތައް އެންމެ ފަހުން ހުރި ހާލަތައް އަވަސްގޮތެއްގައި އަދި ރައްކާތެރިކަމާއެކު އިޔާދަކުރުމަށް މަގުފަހި ވެގެން ދާނެއެވެ.
ދިރާގުގެ އަމާޒަކީ ދިރާގުގެ ބިޒްނަސް ކަސްޓަމަރުންނަށް ކަނެކްޓިވިޓީގެ އިތުރުން އެކި ކަހަލަ ޒަމާނީ ޑިޖިޓަލް ވަސީލަތްތައް މެދުވެރިކޮށް އެހީތެރިކަން ފޯރުކޮށްދިނުން ކަމަށް އެ ކުންފުނިން ބުންޏެވެ.
އާންމު ހާލަތުގައި މަސައްކަތް ކުރަން ޖެހިފައިވާ މި ދަނޑިވަޅުގައި، އިތުރު ސްމާޓް އަދި ޑިޖިޓަލް ޕްލެޓްފޯމްތަކާއި ސޮލިއުޝަންތައް ތައާރަފުކޮށް، މި ޑިޖިޓަލް ޒަމާނުގައި ވިޔަވާރިތައް ފުރިހަމައަށް ކުރިއަށް ގެންދެވޭނެ ވަސީލަތްތައް ހޯދައިދިނުމަށް ދިރާގުން އަބަދުވެސް ދަނީ މަސައްކަތްކުރަމުންނެވެ.
