ޑިސެމްބަރ މަހުގެ ކުރީ ކޮޅު އެމެރިކާގެ ރައްޔިތުންނަށް ކޮވިޑް-19 ވެކްސިން ލިބޭނެ ކަމަށް އެގައުމުގައި ވެކްސިން އުފެއްދުމުގައި އެންމެ އިސްކޮށް ހަރަކާތްތެރިވާ ޑރ. މޮންސެފް ސްލޮއީ ވިދާޅުވެއްޖެއެވެ.

ޑރ. މޮންސެފް ވަނީ ވެކްސިން އަކަށް ހުއްދަ ލިބި އަންނަ މަހުގެ 11 ވަނަ ދުވަހު ރައްޔިތުންނަށް ވެކްސިން ދެވެން ފެށޭނެ ކަމަށް ވިދާޅުވެފައެވެ. އެގޮތުން ވެކްސިން އަށް ހުއްދަ ދެވިގެންދާތާ 24 ގަޑީއިރުގެ ތެރޭގައި ވެކްސިންދޭން ހަމަޖެހިފައިވާ ސަރަހައްދުތަކަށް ވެކްސިން ފޯރުކޮށްދިނުމުގެ މަސައްކަތް ކުރެވިގެންދާނެ ކަމަށް އޭނާ ވަނީ ވިދާޅުވެފައެވެ.

ވެކްސިން ދިނުމުގެ މަސައްކަތް އަންނަ މަހުގެ ތެރޭގައި ފެށޭނެ ކަމުގެ އުންމީދު ދީފައިވާ އިރު، އެމެރިކާއިން ކޮވިޑް-19 އަށް ޕޮޒިޓިވްވި މީހުންގެ ޖުމްލަ އަދަދު ވަނީ 12 މިލިއަނަށް ވުރެ މައްޗަށް އަރައިފައެވެ.

އެމެރިކާއިން ކޮވިޑް-19 އަށް ގިނަ އަދަދެއްގެ ވެކްސިން އުފެއްދުމުގެ މަސައްކަތްކުރަމުން އަންނަ އިރު، އެގައުމުގެ ފައިޒަރ އަދި ޖަރުމަނުގެ ބައޯންޓެކް އިން ކޮވިޑް-19 އަށް ތައްޔާރުކުރަމުން އަންނަ ވެކްސިން 95 އިންސައްތަ ރައްކާތެރިކަަމަށް ދައްކާފައިވާ އިރު، އެކުންފުނިން ވެކްސިން ބޭނުން ކުރުމުގެ ހުއްދައަށް އެދި ހުކުރު ދުވަހު އެމެރިކާގެ ހެލްތު ރެގިއުލޭޓާރުންނަށް ހުށައަޅާފައެވެ.

އެމެރިކާގެ ފުޑް އެންޑް ޑްރަގް އޮތޯރިޓީ އިން ޑިސެމްބަރު މަހުގެ 10 ވަނަ ދުވަހު ވެކްސިން އަށް ހުއްދަ ދިނުމާއި ގުޅޭގޮތުން ގޮތެއް ނިންމާނެ ކަމަށް އެގައުމުގެ މީޑީއާތަކުން ރިޕޯޓްކުރެއެވެ.