"ސްމޯލް ޓީމް އެކްސަސައިޒް 2020" ކާމިޔާބު ކަމާއެކު ނިންމާލައިފި
18 ނޮވެމްބަރު 2020 | ބުދަ 16:58ސިމިއުލޭޝަންގެ ގޮތުގައި ހަތިޔާރާއި ގޮވާ ތަކެތި ބޭނުން ކޮށްފައިވޭ
އެމްއެންޑީއެފް އިން ކުރިއަށްގެންދިޔަ \"ސްމޯލް ޓީމް އެކްސަސައިޒް 2020\" ގެ ތެރެއިން
ދިވެހި އަސްކަރިއްޔާއިން ހުޅުމާލެ ދެވަނަ ފޭސްގައި ކުރިއަށް ގެންދިޔަ "ސްމޯލް ޓީމް އެކްސަސައިޒް 2020" ކާމިޔާބުކަމާއެކު ނިންމާލައިފިއެވެ.
މިމަހުގެ 16 ން 18 ށް، ތިން ދުވަހުގެ މުއްދަތަށް ދިވެހި އަސްކަރިއްޔާއިން ކުރިއަށް ގެންދިޔަ، މި ތަމްރީނުތަކުގައި ހަތިޔާރާއެކު ސިފައިން ހަރަކާތްތެރިވެފައިވާ އިރު، ސިމިއުލޭޝަންގެ ގޮތުގައި ގޮވާތަކެތި ބޭނުންކޮށްފައިވާ ކަމަށް އަސްކަރިއްޔާއިން މައުލޫމާތު ދެ އެވެ.
އަސްކަރިއްޔާ އިން ބުނީ، މި ތަމްރީނުތަށް ކޮންމެ ދުވަހަކު ހެނދުނު 05:30 އިން 09:00 އާއި ހަމައަށް ކުރިއަށް ގެންގޮސްފައިވާ ކަމަށާއި އަދި މި ތަމްރީނުތައް ކުރިއަށް ގެންގޮސްފައި ވަނީ، ހުޅުމާލެ ފޭސް ދޭއްގައި މީހުން ނޫޅޭ ސަރަހައްދުގައި ކަމަށެވެ.
ހުޅުމާލޭގެ އިތުރުންވެސް ރާއްޖޭގެ އެކި ސަރަހައްދުތަކުގައި ދިވެހި އަސްކަރިއްޔާއިން ހަތިޔާރާއެކު ތަމްރީންތަކެއް ކުރިއަށް ގެންދިއުމަށް ހަމަޖެހިފައިވާއިރު، މި ތަމްރީންތައް ކުރިއަށް ގެންދިއުމަށް ހަމެޖެހިފައި ވަނީ ޅ. މާފިލާފުއްޓާއި، ސ. ގަމުގެ ދެކުނުން 07 ނޯޓިކަލް މޭލު ބޭރުގައާއި، ކ. ގިރިފުށީގައެވެ.
