ކަޅުވަކަރު މިސްކިތުން ދައްކުވައިދެނީ ރާއްޖެގެ ޒަމާންވީ އިސްލާމި ތާރީޙް: މިނިސްޓަރ ޔުމްނާ
މި މިސްކިތަކީ 200 އަހަރަށްވުރެ ގިނަދުވަސްވެފައިވާ ދިވެހިންގެ ތަރިކަ
މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް މިނިސްޓަރ ޔުމްނާ މައުމޫން
ކަޅުވަކަރު މިސްކިތުން ދައްކުވައިދެނީ ރާއްޖެގެ ޒަމާންވި އިސްލާމި ތާރީޙް ކަމަށް މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް މިނިސްޓަރ ޔުމްނާ މައުމޫން ވިދާޅުވެއްޖެއެވެ.
ކަޅުވަކަރު މިސްކިތް ހުޅުވަން ބޭއްވި ރަސްމިއްޔާތުގައި ވާހަކަ ދައްކަވަމުން ޔުމްނާ ވިދާޅުވީ ކަޅުވަކަރު މިސްކިތުން ދައްކުވައިދެނީ އިހު ޒަމާނުގައި އުޅުނު ދިވެހިންގެ ފަންނުވެރި ކަމާއި ހުނަރުވެރި ކަން ކަމަށެވެ.
ކަޅުވަކަރު މިސްކިތުގައިވާ ހިރިގަލުތަކުގައިވާ ލިޔުންތަކުން އެނގޭ ގޮތުގައި މިސްކިތް ބިނާ ކުރެވުނީ އައްސުލްޠާން ޙަސަން ނޫރައްދީން އިސްކަންދަރު ކައްތިރި ބަވަނަ މާހަރަދުންގެ ރަސްކަމުގެ 10 ވަނަ އަހަރުގައެވެ. މި ރަދުން ރަސްކަން ކުރެއްވީ މީލާދީން 1179 ވަނަ އަހަރުން ފެށިގެން 1799 ވަނަ އަހަރާ ހަމައަށެވެ. އެހެންކަމުން މި މިސްކިތަކީ 200 އަހަރަށްވުރެ ގިނަދުވަސްވެފައިވާ ދިވެހިންގެ ތަރިކައެކެވެ.
މިސްކިތް ހިމާޔަތްކުރަން މަސައްކަތް ކޮށްދެއްވި ބައެއް ބެފުޅުންގެ ނަންތައް ޔުމްނާ ފާހަގަ ކުރެއްވިއެވެ. އޭގެ ތެރޭގައި ބައްޕާފުޅު، ކުރީގެ ރައީސް މައުމޫން އަބްދުލް ގައްޔޫމް އަދި ކުރީގެ ރައީސް މުހައްމަދު ނަޝީދު ފާހަގަކުރެއްވިއެވެ.
މީގެ އިތުރުން މިސްކިތް އަލުން ރޭވުމަށްޓަކައި ފާއިތުވި ދެ އަހަރު ތެރޭގައި މަސައްކަތް ކޮށްދެވި އެންމެހާ ބޭފުޅުންނަށް ޝުކުރު އަދާކުރެއްވިއެވެ. ޔުމްނާ ވިދާޅުވި ގޮތުގައި، އެ ކަމަނާ ރައީސް ޔާމީންގެ ސަރުކާރުގައި ޑިޕާޓްމަންޓް އޮފް ހެރިޓޭޖުގެ އިސްވެރިޔާގެ މަގާމުން އިސްތިއުފާދެއްވީ ވެސް މި ސަބަބާ ހުރެއެވެ.
ރައީސް ސޯލިހުގެ ސަރުކާރުން މިފަދަ ތަރިކަތަށް ރައްކާތެރިކުރުމަށް ކުރަމުންދާ މަސައްކަތަށާއި ދެއްވާ ސަމާލުކަމަށް ޔުމްނާ ޝުކުރު އަދާކުރެއްވިއެވެ.
ރާއްޖޭގެ އެންމެ ޒަމާންވީ އެއް އާސާރީ ތަރިކަ ކަމުގައިވާ ކަޅުވަކަރު މިސްކިތަކީ 200 އަށް ވުރެ ގިނަ އަހަރު ވެފައިވާ މިސްކިތެކެވެ. ހިރިގަލުން ހަދާފައިވާ މި މިސްކިތަކީ ދިވެހިންގެ ގަލުވަޑާމާއި ލާފެންކުރުމުގެ ހުނަރު ދައްކުވައިދޭ ރީތި މިސްކިތެކެވެ.
