ސުކޫކު ވިއްކުމަށް ދަރުމަވަންތަ ހޮސްޕިޓަލް ރަހުނެއް ނުކުރާނެ، މިލްކުވެރިކަންވެސް ބަދަލެއް ނުކުރާނެ!
އެ މަސައްކަތް ކުރަނީ ފަންނީ މާހިރުންގެ ލަފަޔާ އިރުޝާދުގެ މަތިން
ދަރުމަވަންތަ ހޮސްޕިޓަލް - މިނިސްޓްރީން ބުނީ އެއްވެސް މަރުޙަލާއެއްގައި ހޮސްޕިޓަލުގެ މިލްކުވެރިކަން ބަދަލު ނުވާނެ ކަމަށް
އަންނަ އަހަރު 300 މިލިއަން އެމެރިކާ ޑޮލަރުގެ ސުކޫކެއް ވިއްކުމަށް ދަރުމަވަންތަ ހޮސްޕިޓަލު ރަހުނު ކުރަން އުޅޭކަމަށް ދެކެވޭ ވާހަަކަ ފިނޭންސް މިނިސްޓްރީން ދޮގުކޮށްފިއެވެ.
އެކަމާ ގުޅޭގޮތުން ފިނޭންސް މިނިސްޓްރީން އާންމު ކުރި ބަޔާނެއްގައި ބުނީ، 300 މިލިއަން ޑޮލަރުގެ ސުކޫކަކީ ދައުލަތަށް ބޭނުންވާ ފައިސާ ހޯދުމަށް ބަޖެޓްގައި ހިމަނައިގެން ބޭރު ދުނިޔޭގައި ފާހަގަ ކޮށްލެވޭ ފަންނީ މާހިރުންގެ ލަފަޔާ އިރުޝާދުގެ މަތިން އިޝޫކުރުމަށް މަސައްކަތް ކުރަމުންދާ އިސްލާމިކް ފައިނޭންސިންގއިންސްޓުރުމަންޓެއް ކަމަށެވެ. އަދި ދައުލަތުން ރައްޔިތުންގެ މަޖިލީހަށް ހުށަހަޅައި ފާސްކުރި 2020 ވަނަ އަހަރުގެ ބަޖެޓްގައި މި ސުކޫކު ހިމެނުމުގެ އިތުރަށް، ބަޖެޓް ސްޕީޗްގައި މި ސުކޫކަށް އަލި އަޅުވާލެވި، އަދި ރަތްޔިތުންގެ މަޖިލީހުގެ ބަޖެޓް ދިރާސާ ކުރާ ކޮމިޓީއަށްވެސް ސުކޫކުގެ އެކި ކަންކަން ސާފުކޮށްދީފައިވާނެކަން މިނިސްޓްރީގެ ބަޔާނުގައި ފާހަގަ ކޮށްފައިވެއެވެ.
އެކަމުގެ ތަފްސީލުތައް ބަޔާން ކޮށްދެމުން މިނިސްޓްރީން ބުނީ، އިސްލާމިކް ކޯޕަރޭޝަން ފޮރ ދި ޕްރައިވެޓް ސެކްޓަރ (އައިސީޑީ) އާއި އެކު ވިއްކުމަށް މަސައްކަތް ކުރާ މި ސުކޫކުގެ މައިގަނޑު އަސާސަކީ އެސެޓް ބޭސްޑް ސުކޫކު ކަމަށެވެ. އެގޮތުން އެއީ ދަރަނި ނަގާ ފަރާތުން ކަނޑައަޅާ 100 އިންސައްތަ ދައުލަތުން ހިއްސާވާ ސްޕެޝަލް ޕާރޕޯސް ވެހިކަލް (އެސްޕީވީ) އެއް ގޮތުން 100 އިންސައްތަ ހިއްސާވާ ދައުލަތުގެ ކުންފުންޏަކަށް ދައުލަތުގެ އެސެޓެއްގެ ބެނެފިޝަލް އޯނަރޝިޕް ބަދަލުކޮށް، ސުކޫކުގެ އިންވެސްޓަރުންގެ ފަރާތުން އެސްޓީވީ ގެ ބެނެފިޝަލް އޯނަރޝިޕްގައިވާ އެސެޓް ދައުލަތަށް އިޖާރާ އެއްބަސްވުމެއްގެ ދަށުން ދަރަންޏަށް ނަގާ ފަރާތަށް ލީސް ކުރުން ކަމަށް މިނިސްޓްރީން މައުލޫމާތު ދެއެވެ.
މިނިސްޓްރީން ބުނީ، ސުކޫކުގެ މުއްދަތު ހަމަވުމުން އެސެޓްގެ ބެނެފިޝަލް އޯނަރޝިޕް ދައުލަތުގެ 100 އިންސައްތަ ހިއްސާވާ އެސް.ޕީ.ވީ އިން އަނބުރާ މިނިސްޓްރީ އޮފް ފިނޭންސަށް ނެގޭނެ ކަމަށެވެ. އެހެންކަމުން މި ސުކޫކު ވިއްކުމަށް އެސެޓެއްގެ ގޮތުގައި ދަރުމަވަންތަ ހޮސްޕިޓަލްގެ ބެނެފިޝަލް އޯނަރޝިޕް ބަދަލުކުރުމަކީ ޝަރުއީ އަދި ޤާނޫނީ ގޮތުންވެސް ދަރުމަވަންތަ ހޮސްޕިޓަލް އެއްވެސް ފަރާތަކަށް ވިއްކާލުމެއް ނޫންކަން މިނިސްޓްރީން ފާހަގަ ކޮށްފައިވެއެވެ. އަދި މި 2 ސުކޫކު އިޝޫ ކުރުމުގެ އެއްވެސް މަރުޙަލާއެއްގައި ދަރުމަވަންތަ ހޮސްޕިޓަލްގެ މިލްކުވެރިކަން މިނިސްޓްރީ ފިޔަވައި އެހެން އެއްވެސް ފަރާތަކަށް ބަދަލު ނުކުރެވޭނެ ކަމަށާއި، ދަރުމަވަންތަ ހޮސްޕިޓަލް ރަހުނެއްވެސް ނުކުރެވޭނެ ކަމަށް މިނިސްޓްރީން ބުނެއެވެ.
މިނިސްޓްރީން ބުނީ، 2017 ވަނަ އަހަރުވެސް ދައުލަތަށް ފައިސާ ހޯދުމަށް މިގޮތަށް ދައުލަތުގެ އިމާރާތެއް ބޭނުން ކޮށްގެން ސުކޫކެއް ވިއްކުމުގެ މަސައްކަތްތަކެއް ކުރިއަށް ދިޔަ ކަމަށެވެ. އެހެން ނަމަވެސް އޭރު އެކަން ކުރެވޭ ގޮތް ނުވީ ޤާނޫނީ ގޮތުން ކުރިމަތިވި ގޮންޖެހުންތަކެއްގެ ސަބަބުންކަން މިނިސްޓްރީގެ ބަޔާނުގައި ފާހަގަ ކޮށްފައިވެއެވެ.
އޭގެ އިތުރުން، ސުކޫކު ފަދަ އިސްލާމިކް ޑެޓް އިންސްޓްރުމަންޓް ތަކަކީ ދުނިޔޭގެ އިސްލާމީ އަދި އެނޫން ޤައުމުތަކުންވެސް ކުރާ ކަމެއްކަން މިނިސްޓްރީން ފާހަގަ ކުރެއެވެ. އަދި މިކަމުގައި ޙަޤީޤަތް އޮޅޭގޮތަށް ވާހަކަ ނުފެތުރުމަށް މިނިސްޓްރީން ވަނީ އެދިފައެވެ.
