ބަޖެޓު ކޮމިޓީގެ މަސައްކަތްތައް ނިންމަން ވާނީ ބަޖެޓުގެ ބަހުސް ނިމުމުން: ރައީސް ނަޝީދު
16 ނޮވެމްބަރު 2020 | ހޯމަ 05:37ބަޖެޓާއި ގުޅިގެން މެމްބަރުން ފާހަގަކުރައްވާ ކަންކަން ކޮމިޓީއަށް ފޮނުވަން ޖެހޭ
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
އަންނަ އަހަރަށް ލަފާ ކުރާ ދައުލަތުގެ ބަޖެޓު ދިރާސާ ކުރަމުންދާ ކޮމިޓީގެ މަސައްކަތްތައް ނިންމާލަން ވާނީ ހުރިހާ މެމްބަރުން ބަޖެޓަށް ބަހުސްކޮށް ނިމުމުން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ކޮމިޓީތަކުން ކަނޑައަޅާފައިވާ ސުންގަޑިތައް މަޖިލީހުގައި އިއުލާނު ކުރައްވަމުން ރައީސް ނަޝީދު ވިދާޅުވީ ބަޖެޓު ދިރާސާ ކުރާ ކޮމިޓީން ބަޖެޓު ދިރާސާކޮށް ނިންމާނެ ތާރީހެއްގެ ގޮތުގައި ކަނޑައަޅާފައި ވަނީ މި ނޮވެންބަރު މަހުގެ 19 ވަނަ ދުވަހަށް ކަމަށެވެ.
އެއީ އެ މަނިކުފާނު ވެސް ލަފާ ދެއްވި ގޮތް ކަން ފާހަގަކުރައްވާ ނަޝީދު ވިދާޅުވީ މަޖިލީހުގެ ގަވާއިދުގައި ވާގޮތުން ބަޖެޓާއި ގުޅިގެން މެމްބަރުން ފާހަގަކުރައްވާ ކަންކަން ކޮމިޓީއަށް ފޮނުވަން ވާނެ ކަމަށެވެ. އެހެން ކަމުން ބަހުސް ނިމުމުގެ ކުރިން އެ ކޮމިޓީގެ މަސައްކަތް ނިންމުމަކީ ރަނގަޅު ކަމެއް ނޫން ކަން އެ މަނިކުފާނު ފާހަގަކުރެއްވިއެވެ.
ކޮންމެ މެމްބަރަކަށް ވެސް ބަޖެޓަށް ބަހުސްކުރުމަށް 15 މިނެޓްގެ އެއް ފުރުސަތެއް ލިބިގެންދާނެއެވެ. އަދި ބަހުސްގެ މަރުހަލާގައި މެމްބަރުން ފާހަގަކުރައްވާ ކަންތައްތަކަށް ޖަވާބު ދެއްވުމަށް ފިނޭންސް މިނިސްޓަރ އިބްރާހީމް އަމީރަށް 40 މިނެޓްގެ ވަގުތެއް ދިނުމަށް ވެސް ވަނީ ނިންމާފައެވެ.
އޭގެ އިތުރުން ރައްޔިތުންގެ މަޖިލިހުގެ ބަޖެޓު ދިރާސާ ކުރާ ކޮމިޓީ އާއި އެހެނިހެން ކޮމިޓީތަކުން އަންނަނީ ވަކިވަކި ވުޒާރާތަކާއި، މިނިވަން މުއައްސަސާތަކާއި އެކި އިދާރާތައް ހާޒިރުކޮށްގެން ހުށައެޅިފައިވާ ބަޖެޓާ ގުޅޭގޮތުން ހުރި ކަންބޮޑުވުންތައް އޮޅުންފިލުވާ، ގެންނަން ހުށައަޅާ ބަދަލުތައް ދެނެގަތުމުގެ މަސައްކަތް ކުރަމުންނެވެ.
