ޓްރާންސްޕޯޓް އޮތޯރިޓީގެ ހިދުމަތްތައް ލަސްވަނީ މުވައްޒަފުން މަދުވީމަ: ނަހުލާ
"ޓްރާންސްޕޯޓް އޮތޯރިޓީއަކީ އަބަދުވެސް ވަރަށް ޝަކުވާ ބޮޑު ތަނެއް"
ޓްރާންސްޕޯޓް މިނިސްޓަރ އައިޝަތު ނަހުލާ
ޓްރާންސްޕޯޓް އޮތޯރިޓީން ރައްޔިތުންނަށް ފޯރުކޮށްދޭ ހިދުމަތްތައް ލަސް ވަނީ އެތަނުގެ މުވައްޒަފުންގެ އަދަދު މަދުވުމުން ކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެއެވެ.
ދިވެހިރާއްޖޭގެ އަޑުން ގެނެސްދޭ ޕްރޮގްރާމެއްގައި ވާހަކަ ދައްކަވަމުން ނަހުލާ ވިދާޅުވީ ޓްރާންސްޕޯޓް އޮތޯރިޓީއަކީ އަބަދުވެސް ވަރަށް ޝަކުވާ ބޮޑު ތަނެއް ކަމަށާއި މަގާމާ ހަވާލުވި ދުވަހުން ފެށިގެން ވެސް އެކަންކަން ހައްލު ކުރުމުގެ ގޮތުން ގިނަ މަސައްކަތްތަކެއް ކުރެވިފައިވާ ކަމަށެވެ.
އެހެން ނަމަވެސް އެ އޮތޯރިޓީއަށް ދިމާވެފައިވާ މުވައްޒަފުންގެ ދަތިކަމާހުރެ، ރައްޔިތުންނަށް ފޯރުކޮށްދޭ ހިދުމަތްތައް އެކަށީގެންވާ މުއްދަތެއްގެ ތެރޭގައި ފޯރުކޮށް ނުދެވި، ބޮޑެތި ލަސްތަކެއް ދިމާވާ ކަމަށް ވިދާޅުވިއެވެ. އަދި ކޮވިޑުގެ ހާލަތާއި ގުޅިގެން ތަނަށް އިތުރު މުވައްޒަފުން ނެގޭގޮތް ނުވެފައިވާ ކަމަށް ވެސް ވިދާޅުވިއެވެ.
ކޮވިޑުގެ ހާލަތާއި ގުޅިގެން ޓްރާންސްޕޯޓް އޮތޯރިޓީން ފޯރުކޮށްދެމުން އަންނަ ހިދުމަތްތަކަށް އައިސްފައިވާ ބަދަލުތަކަށް އަލިއަޅުއްވާލައްވާ ވާހަކަ ދައްކަވަމުން ނަހުލާ ވިދާޅުވީ، އެ އޮތޯރިޓީން ދެވޭ ގިނަ ހިދުމަތްތައްތައް އޮންލައިން ކުރެވިފައިވާ ކަމަށެވެ. މިިކަމުގެ ސަބަބުން ދުވާލެއްގެ މައްޗަށް ހިދުމަތްދޭ މީހުންގެ އަދަދުތައް އިތުރުވެ، އިތުރު ބުރަތަކެއް ކުރިމަތިވެފައިވާ ކަަމަށް ވިދާޅުވިއެވެ.
އެގޮތުން ކުރިން އެ އޮތޯރިޓީއިން ހިދުމަތް ދެމުން އައީ ދުވާލެއްގެ މައްޗަށް 100 ވަރަކަށް ފަރާތަށް ނަމަވެސް، މިހާރު ދުވާލެއްގެ މައްޗަށް 200 އާއި 300 އާ ދޭތެރޭގެ އަދަދެއްގެ މީހުން ހިދުމަތަށް އެދި ހުށައަޅާ ކަން ފާހާގަކުރެއްވިއެވެ. އަދި އެންމެ ގިނަވާ ދުވަސް ދުވަހު 400 ވަރަކަށް މީހުން ހިދުމަތަށް އެދި ހުށައަޅާ ކަމަށް ނަހުލާ ވިދާޅުވިއެވެ.
މި އަހަރު ބަޖެޓަށް ދިމާވި ދަތިކަމުގެ ސަބަބުން މުވައްޒަފުން އިތުރު ކުރުމަށް ދަތިތަކާއި ކުރިމަތިވީ ނަމަވެސް ފެށިގެން މި އަންނަ އަހަރުން ޓްރާންސްޕޯޓް އޮތޯރިޓީ އާއި މިނިސްޓްރީން ފޯރުކޮށްދޭ ހިދުމަތްތަކަށް ހެޔޮ ބަދަލެއް އަންނާނެ ކަމުގެ ޔަގީންކަން މިނިސްޓަރ ނަހުލާ ވަނީ އަރުވާފައެވެ. އަދި ދިމާވެފައިވާ މުވައްޒަފުންގެ ދަތިކަމުގެ މައްސަލަ ހައްލުކުރުމަށް، އިތުރު މުވައްޒަފުން ނަގާނެ ކަަމަށް ވެސް ވިދާޅުވިއެވެ.
އަންނަ އަހަރަށް ލަފާކޮށް ހުށައަޅާފައިވާ ބަޖެޓުގައި ޓްރާންސްޕޯޓް މިނިސްޓްރީއަށް ކަނޑައަޅާފައި ވަނީ 60،284،989ރ. (ފަސްދޮޅަސް މިލިއަން ދެ ލައްކަ އައްޑިހަ ހަތަރު ހާސް ނުވަ ސަތޭކަ އައްޑިހަ ނުވަ ރުފިޔާ) އެވެ. އޭގެ ތެރެއިން ޓްރާންސްޕޯޓް އޮތޯރިޓީއަށް އެކަށައަޅާފައި ވަނީ 15،862،163ރ. (ފަނަރަ މިލިއަން އަށް ލައްކަ ފަސްދޮޅަށް ދެ ހާސް އެއް ލައްކަ ފަސްދޮޅަސް ތިން ރުފިޔާ) އެވެ.
