42 މީހަކު ޕޮޒިޓިވްވެ، 18 މީހަކު ބަލިން ރަނގަޅުވެއްޖެ
މި ބަލިން ރަނގަޅުވި މީހުންގެ އަދަދު 11،262 ވަނީ އަރާފައި
ކޮވިޑަށް ފަރުވާދޭ ސިއްހީ އެހީތެރިން
ސާދަ ބިދޭސީންނާއެކު ޖުމްލަ 42 މީހަކު ކޮވިޑް-19 އަށް ޕޮޒިޓިވް ވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އާންމުކޮށްފައިވާ ތަފާސް ހިސާބުތަކަށް ބަލާއިރު، ހުކުރު ދުވަހުގެ ރޭ 18:00 ން ހޮނިހިރު ދުވަހުގެ ރޭ 18:00 ށް، 18 މީހަކު ވަނީ މި ބަލިން ރަނގަޅުވެފައެވެ. މިއާއެކު ޖުމްލަ މި ބަލިން ރަނގަޅުވި މީހުންގެ އަދަދު 11،262 ވަނީ އަރާފައެވެ.
ކޮވިޑް-19ގެ އެހެނިހެން ތަފާސް ހިސާބުތަކަށް ބަލާއިރު ހޮނިހިރު ދުވަހު މި ބައްޔަށް ޕޮޒިޓިވްވި މީހުންގެ އަދަދު 42 އަށް އަރާފައިވާ އިރު، މިވަގުތު 843 މީހަކު އަންނަނީ ކޮވިޑް-19 އަށް ރާއްޖޭގައި ފަރުވާ ހޯދަމުންނެވެ. އޭގެ ތެރޭގައި ހޮސްޕިޓަލުގައި އެޑްމިޓު ކޮށްގެން 49 މީހަކަށް އަންނަނީ ފަރުވާދެމުންނެވެ. އައިސޮލޭޝަން ފެސިލިޓީތަކުގައި މިވަގުތު 246 މީހުން ތިބިއިރު މިބަލީގައި މިހާތަނަށް ނިޔާވި މީހުންގެ އަދަދަކީ 42 އެވެ.
ކޮވިޑް-19 އިން މީހަކު ރަނގަޅުވި ކަމަށް ބަލަނީ ބައްޔަށް ޕޮޒިޓިވްވެ 14 ދުވަސް ފަހުން ބަލީގެ އަލާމާތެއް ނެތް ނަމައެވެ. ބަލީގެ އަލާމާތް ހުރިނަމަ އެ އަލާމާތެއް ނެތި ދަންދެން ނުވަތަ ކޮވިޑް-19 އަށް ނެގެޓިވު ވަންދެން އެމީހަކީ ޕޮޒިޓިވު މީހެއްގެ ގޮތުގައި ބަލައެވެ.
ހޮނިހިރު ދުވަހު ވަނީ މި ބައްޔަށް ޕޮޒިޓިވް ވެގެން 57 އަހަރުގެ ދިވެއްސެއް ނިޔާވެފައެވެ. މިއީ މި މަސް ތެރޭގައި ރާއްޖެއިން މި ބަލީގައި ނިޔާވި ހަތަރުވަނަ މީހާ އެވެ. މިއާއެކު މި ބަލީގައި މިހާތަނަށް 34 ދިވެހިންނާއި 8 ބިދޭސީއަކު ވަނީ ރާއްޖެއިން ނިޔާވެފަ އެވެ.
