ސްރީލަންކާ ކަސްޓަމްސްއިން ހިފެހެއްޓި މަހުގެ ޝިޕްމަންޓް އެގައުމަށް އެތެރެކޮށްފި
14 ނޮވެމްބަރު 2020 | ހޮނިހިރު 12:43ދިވެހި ސަރުކާރުން ބުނަނީ ރާއްޖެއިން ލަންކާއަށް މަސް އެކްސްޕޯޓް ކުރުމަށް އެއްވެސް ދަތިކަމެއް ނެތް ކަމަށް
ރާއްޖޭގައި ދޮށީގެ މަސްވެރިކަން ކުރާ ދޯންޏަކުން މަސް ބާނަނީ
ސިޔާސަތުތަކަށް ގެނައި ބަދަލާއި އެކު ސްރީލަންކާގެ ކަސްޓަމްސްއިން ހިފެހެއްޓި މަހުގެ ޝިޕްމަންޓް އެ ގައުމަށް އެތެރެކޮށްފި އެވެ.
މިކަމާއި ގުޅޭ މައުލޫމާތު ހިއްސާކޮށް، ފޮރިން މިނިސްޓްރީން ބުނީ، ލަންކާ ސަރުކާރުން އެގައުމަށް މަސް އެތެރެކުރުމުގެ ސިޔާސަތުތަކަށް ގެނައި ބަދަލުތަކާ ގުޅިގެން ލަންކާއަށް އެތެރެ ނުކުރެވި، ކަސްޓަމްސްގައި ތާށިވެފައި ހުރި މަހުގެ ޝިޕްމަންޓް ލަންކާއަށް އެތެރެކޮށްފައިވާކަމަށެވެ.
އަދި، ތާށިވެފައި ހުރި މަހުގެ ޝިޕްމަންޓްތައް އެގައުމަށް އެތެރެކުރެވިފައިވަނީ ހާރިޖީ ވަޒީރު އަބްދުﷲ ޝާހިދު އާއި ސްރީލަންކާގައި ހުންނަވާ ދިވެހި ހައިކޮމިޝަނަރ، ސްރީލަންކާ ސަރުކާރުގެ އިސް ބޭފުޅުންނާއެކު ކުރެއްވި މަޝްވަރާތަކަށްފަހުގައިކަމަށެވެ.
ރާއްޖޭގެ މަހުގެ އުފެއްދުންތައް، ލަންކާ ސަރުކާރުން ކުރިންވެސް ދީފައިވާ ޔަޤީންކަމާ އެއްގޮތަށް ލަންކާއަށް އެތެރެކުރެވޭނެ ފަސޭހަ އިންތިޒާމްތައް ހަމަޖެއްސުމާ ގުޅޭ ގޮތުން ލަންކާ ސަރުކާރާއެކު މިނިސްޓަރ ޝާހިދު މަޝްވަރާ ކުރައްވަމުން ގެންދަވާކަމަށް ހާރިޖީ ވުޒާރާއިން ބުންޏެވެ.
މިހާރު ވެސް ލަންކާގައި ވަނީ އެ ގައުމަށް އެތެރެކުރާ މުދާ ކޮންޓްރޯލްކޮށް، މަސްވެރިންނާއި ދަނޑުވެރިންގެ ވިޔަފާރިތައް ހިމާޔަތްކުރުމަށް ފިޔަވަޅުތައް އަޅާފަ އެވެ. ލަންކާއަކީ ތައިލެންޑް ނަގާފައި، ރާއްޖެއިން އެންމެ ގިނަ އަދަދަކަށް މަސް ބޭރުކުރާ އެއް ގައުމެވެ. އަދި ރާއްޖޭގެ ހިކަމަހުގެ ބާވަތްތަކަށް ލަންކާގައި އޮންނަ ޑިމާންޑު ވަރަށް ބޮޑެވެ.
