2023 ވަނަ އަހަރު ނިމޭއިރު ރާއްޖޭގެ ހުރިހާ ރަށަކަށް ފެނާ ނަރުދަމާގެ ހިދުމަތް ފޯރުކޯށްދެވޭނެ ކަމަށް ފިނޭންސް މިނިސްޓާރ އިބްރާޙިމް އަމީރު ވިދާޅުވެއްޖެއެވެ.

ރާއްޖެޓީވީއަށް ދެއްވި ހާއްސަ ބަސްދީގަތުމެއްގައި މިނިސްޓަރު އަމީރު ވިދާޅުވީ، މިހިނގާ 2020 ވަނަ އަހަރު ނިމޭއިރު، ހުރިހާ ރަށެއްގައި ފެނާއި ނަރުދަމާ ގާއިމުކުރުމުގެ ޕްރޮޖެކްޓްތައް އެވޯޑް ކުރެވިގެންދާނެ ކަމަށެވެ. އެއާއެކު އަންނަ އަހަރު އެކަމުގެ އަމަލީ މަސައްކަތްތައް ފެށި، ރައީސް އިބްރާޙިމް މުހައްމަދު ޞާލިހުގެ ވެރިކަމުގެ ދައުރު ނިމުމުގެ ކުރިން އެ މަސައްކަތްތައް އެއްކޮށް ނިންމާލެވޭނެ ކަމަށް ވެސް މިނިސްޓަރު ވިދާޅުވިއެވެ.

ކޮވިޑް-19 ގެ ހާލަތާއި ގުޅިގެން ރާއްޖޭގެ އުމްރާނީ ތަރައްގީގެ ގިނަ މަސައްކަތްތަކެއް ހުއްޓާލަން ޖެހުނުކަން ފާހަގަކުރައްވާ މިނިސްޓަރު ވިދާޅުވީ، މިއަހަރު އަލަށް ފެށުމަށް ހަމަޖެހުނު ގިނަ ޕްރޮޖެކްޓްތަކެއް ވެސް އެވޯޑް ނުކުރެވި މަޑުޖައްސާލަން ޖެހުނު ކަމަށާއި، ނަމަވެސް އަންނަ އަހަރު އެ މަސައްކަތްތަކާއެކު އިތުރު މަޝްރޫއުތަކެއް ފެށިގެންދާނެ ކަމަށެވެ.

މިނިސްޓަރު ވިދާޅުވީ، މިހުރިހާ ކަމަކަށް މިއަހަރުގެ ތެރޭގައި ލައިން އޮފް ކްރެޑިޓް ފެސިލިޓީގެ ދަށުން އިންޑިއާގެ އެގްޒިމް ބޭންކުން ފައިސާ ހަމަޖެހިފައިވާ ކަމަށެވެ. އެގޮތުން މިހާރު ލިބިފައިހުރި ފައިސާ އާއެކު އެ މަސައްކަތްތައް ފެށުން ވެގެންދާނީ އިގްތިސާދު ކުރިއެރުވުމަށް ކުރެވިގެންދާނެ މުހިންމު ކަމެއްގެ ގޮތުގައި މިނިސްޓަރު ވަނީ ސިފަކުރެއްވާފައެވެ.

މިނިސްޓަރު ވިދާޅުވީ، ރާއްޖޭގެ އިގްތިސާދު މިހާރު ހުރި ހިސާބުން އެހެން ލެވެލްއަކަށް ގެންދިއުމަށް މާލޭގައި ހުރި ކޮމާޝަލް ޕޯޓު އެހެން ސަރަހައްދަކަށް ބަދަލުކުރުމަކީ މުހިންމު ކަމެއް ކަމަށާއި، އެއާއެކު ތިލަފުށީގައި މި ސަރުކާރުން އަލަށް ހެދުމަށް ނިންމާފައިވާ ކޮމާޝަލް ޕޯޓާއިއެކު މިކަމަށް ހައްލު ލިބިގެންދާނެ ކަމަށެވެ.

މިނިސްޓަރު އިތުރަށް ވިދާޅުވީ، 2021 ވަނަ އަހަރުގެ ބަޖެޓުގައި އައްޑޫ ސިޓީގެ ޑިވޮލޮޕްމެންޓަށް ވަރަށް ބޮޑު އަހައްމިއްޔަތު ކަމެއް ދީފައިވާނެ ކަމަށާއި، އެގޮތުން އައްޑޫ އިންޓަނޭޝަނަލް އެއަރޕޯޓު ތަރައްގީކުރުމާއި، ބިން ހިއްކުމުގެ އިތުރުން މަގުތައް ހެދުމަށް ބަޖެޓުން ބޮޑު ހޭދައެއް ކުރުމަށް ނިންމާފައިވާނެ ކަމަށެވެ.