ފުލުހުންގެ ޔުނީފޯމުގައި ބޮޑީ ކެމެރާ ހަރުކުރުމުގެ މަސައްކަތް އަންނަ އަހަރަށް ބަޖެޓު ކުރެވި، އެ މަސައްކަތް ވަރަށް އަވަހަށް ފަށާނެ ކަމަށް ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވެއްޖެއެވެ.
ސީޕީ މިހެން ވިދާޅުވީ "ރާއްޖެޓީވީ" އަށް ދެއްވި ހާއްސަ އިންޓަވިއުއެއްގައެވެ. ފުލުހުންގެ މަސައްކަތްތަކަށް ޓެކްނޮލޮޖީގެ ދާއިރާއިން ލިބިފައިވާ ކުރިއެރުންތަކާއި، ކުރިއަށް އޮތް މުސްތަގުބަލުގައި ލިބޭނެ ކުރިއެރުން ތަކުގެ ވާހަކަ ހިއްސާކުރައްވަމުން ސީޕީ ވިދާޅުވީ ބޮޑީ ކެމެރާގެ ސަބަބުން ފުލުހުންގެ މަސައްކަތަށް އިތުރު ފުރިހަމަކަމެއް ލިބޭނެ ކަމަށެވެ. އެގޮތުން ފުލުހުންގެ މަސައްކަތަށް އިތުރު ހިތްވަރެއް ލިބޭނެ ކަމަށާއި، އަދި ފުލުހެއްގެ މައްސަލައަކާ ގުޅިގެން އާންމު ރައްޔިތަކާ ބައްދަލުކުރި ނަމަވެސް، ކެމެރާގެ ސަބަބުން ދެއްކި ވާހަކަތަކުގެ ހެކި ލިބެން ހުންނާނެ ކަމަށްވެސް ވިދާޅުވިއެވެ.
ހަމަ އެފަދައިން ފުލުހެއްގެ މައްސަލައެއް ހުށަހެޅިއްޖެ ހާލަތެއްގައިވެސް ހެކި ލިބެން ފަސޭހަވެ، މައްސަލަ ބަލަން އިތުރު ފަސޭހަތަކެއް ވެގެންދާނެ ކަމަށާއި، ފުލުހުން މަސައްކަތްކުރާ މިންވަރުވެސް ދެނެގަތުމަށް ލުއިތަކެއް ލިބިގެންދާނެ ކަމަށްވެސް ވިދާޅުވިއެވެ.
އަޅުގަނޑު ގަބޫލުކުރާ ގޮތުގައި ކުށްކުރާ ފަރާތްތަކުގެ މެދުގައި ކުށަށް އަރައިގަތުން އެކަށީގެންވާ ފަރާތްތަކުގެ ބިހޭވިޔާއަށްވެސް ބަދަލު އާދޭ. އެއީ ދެން ރިސާޗުން ފެންނަން އޮތް ކަމެއް.ކޮމިޝަނަރ އޮފް ޕޮލިސް މުޙައްމަދު ހަމީދު
މީގެ އިތުރުން ބޮޑީ ކެމެރާގެ ސަބަބުން ފުލުހުންނަށް އަންނަ ނުރައްކާވެސް ކުޑަވާނެ ކަމަށް ސީޕީ ވިދާޅުވިއެވެ. އަދި ސަރުކާރުގެ ފަރާތުން މިހާރު އެކަމަށް ފެހި ސިގްނަލް ދީފައިވާއިރު، ބޮޑީ ކެމެރާ އާއެކު "ޓޭޒަރ ގަން" ބޭނުން ކުރެވޭނެ ގޮތަށް ހަމަޖެެއްސުމަށް ފުލުހުން މަސައްކަތް ކުރަމުން އަންނަ ކަމަށްވެސް ވިދާޅުވިއެވެ.
ފުލުސް އޮފިސަރުންގެ ޔުނީފޯމުގައި ބޮޑީ ކެމެރާ ހަރުކޮށްގެން މަސައްކަތްކުރުމަކީ އެހެން ގައުމުތަކުންވެސް ކުރަމުން އަންނަ ކަމެކެވެ. އެގޮތުން ދުނިޔޭގެ އެހެނިން ގައުމުތަކުގައި މި ކެމެރާ އާންމުކޮށް ހަރުކޮށްފައި ހުންނަނީ ފުލުހުން ބޭނުންކުރާ ހެލްމެޓް ނުވަތަ އައިނުގައެވެ. ދުނިޔޭގެ އެންމެ މަޝްހޫރު އެއް އޮޕަރޭޝަން ކަމަށްވާ އުސާމާ ބިއްލާދިނަށް ދެވުނު ހަމަލާވެސް ރިކޯޑު ކުރެވިފައިވަނީ ހަމަ މިފަދަ ބޮޑީ ކެމެރާއެއްގެ ސަބަބުންނެވެ.
