ދިވެހިރާއްޖޭގެ ޖުޑީޝަރީގައި އަންހެނުންގެ ދައުރު އިތުރުވަމުން ދިއުމަކީ މިއަދު އުފާކުރައްވާ ކަމެއް ކަމަށް ބަންޑާރަނައިބް (އޭޖީ) އިބްރާޙިމް ރިއްފަތު ވިދާޅުވެއްޖެއެވެ.
ސަރުކާރަށް ދެ އަހަރު ފުރުން ފާހަގަ ކުރުމަށް ރާއްޖެޓީވީން ކުރިއަށްގެންދިޔަ ޚާއްސަ ކަވަރޭޖަށް ދެއްވި އިންތަރވިއުއެއްގައި އޭޖީ ވިދާޅުވީ، ޖުޑީޝަރީގައި އަންހެނުން ހިއްސާ ކުރާ ދައުރު މިއަދު އިތުރުވެފައިވާ ކަމަށެވެ. އެގޮތުން މެޖިސްޓްރޭޓް ކޯޓުތަކުން ފެށިގެން ރާއްޖޭގެ ސުޕްރީމް ކޯޓާ ހަމައަށް ބެލި ނަމަވެސް މިއަދު އަންހެން ފަނޑިޔާރުން ތިއްބެވިކަން ފާހަގަ ކުރައްވައި އޭޖީ ވިދާޅުވީ، އެއީ ޖުޑީޝަރީގައި އަންހެނުންނާއި ފިރިހެނުންގެ ފަރަޤު ކުޑަ ކުރުމަށް އެޅުނު މުހިއްމު ފިޔަވަޅެއް ކަމަށެވެ.
އޭޖީ ވިދާޅުވީ، މިއީ ފާއިތުވެދިޔަ ތަނުގައި ފެނިފައިވާ މަންޒަރެއް ނޫން ކަމަށާއި، ކުރިއަށް އޮތް ތަނުގައިވެސް މި ބަދަލުތައް ފެންނަމުންދާނެ ކަމަށް އުއްމީދު ކުރައްވާ ކަމަށެވެ.
ދިވެހިރާއްޖޭގެ ތާރީޚުގައި ފުރަތަމަ ފަހަރަށް އެންމެ މަތީ ކޯޓަށް އަންހެން ބޭފުޅުން އައްޔަނު ކުރެވުނީ، ހަމަ އެއާއެކު މިވަގުތު ދިވެހި ރާއްޖޭގައި ފުރަތަމަ ފަހަރަށް ޖުޑީޝަލް ސަރވިސް ކޮމިޝަނުގެ ރައީސަކަށްވެސް އަންހެން ބޭފުޅަކު އެ އިންނަވަނީ، އޭގެ އިތުރުން ޖުޑީޝަލް އެޑްމިނިސްޓްރޭޝަންގެ ޗީފް ޖުޑީޝަލް އެޑްމިނިސްޓްރޭޓަރަކަށްވެސް އެ ހުންނެވީ އަންހެން ބޭފުޅެއް، މިއީ ފާއިތުވެ ދިޔަ ތަނުގައި އަޅުގަނޑުމެންނަށް ފެނިފައި ހުރި މަންޒަރުތަކެއް ނޫން، އަދި ހަމަ އެހެންމެ ދިވެހި ރާއްޖޭގެ ކްރިމިނަލް ކޯޓުގައިވެސް ފުރަތަމަ ފަހަރަށް އަންހެން ފަނޑިޔާރަކު މިއަހަރު އެ އައްޔަނު ކުރެވިގެން ދިޔައީ، އަޅުގަނޑު އުފާވާ އެންމެ ބޮޑު އެއް ސަބަބަކީ މިއަދު އަޅުގަނޑުމެންނަށް ކެރޭނެ ދަންނަވަން ޖުޑީޝަރީގެ ކޯޓުތަކުގައި އަންހެން ފަނޑިޔާރުންނަށް އިސްކަންދޭތަން އަޅުގަނޑުމެންނަށް ފެންނަމުން އެބަ ދެއޭ، މެޖިސްޓްރޭޓް ކޯޓުތަކުން ފެށިގެން ދިވެހި ރާއްޖޭގެ ސުޕްރީމް ކޯޓާ ހަމައަށް އަންހެން ފަނޑިޔާރުން އެބަތިބި މިއަދު، އެއީ ޖުޑީޝަރީގައި އަންހެނުންނާ ފިރިހެނުންގެ ފަރަޤު ކުޑަ ކުރުމަށް އެޅުނު މުހިއްމު ފިޔަވަޅެއް ގޮތުގައި އަޅުގަނޑު ބަލައިގަންނަން އަދި ކުރިއަށް އޮތް ތަނުގައިވެސް އެގޮތަށް ދާނެ ކަމަށް އަޅުގަނޑު އުއްމީދު ކުރަން،ބަންޑާރަނައިބް އިބްރާޙިމް ރިއްފަތު
އޭގެ އިތުރުން، ސަރުކާރުގެ ވޭތުވެދިޔަ ދެ އަހަރަށް އަލިއަޅުވާލައްވާ އޭޖީ ވިދާޅުވީ، ޖުމުލަ ގޮތެއްގައި މި ދެ އަހަރަކީ ކާމިޔާބު ދެ އަހަރު ކަމަށެވެ. އެގޮތުން މުޅި ދުނިޔެއަށް ބަލިމަޑުކަމެއް ކުރިމަތިވެފައިވާ ދަނޑިވަޅެއްގައި ވެސް ސަރުކާރުން ރައްޔިތުންނަށް ވެފައިވާ ވައުދުތައް ފުއްދުމަށް ސާބިތުވެ އޮތްކަން ފެންނަމުންދާކަން ފާހަގަ ކުރައްވައި އޭޖީ ވިދާޅުވީ، މިއަދު ރައްޔިތުން ޖުޑީޝަރީއަށް ކުރާ އިތުބާރު ވެސް އެތައް ގުނައަކަށް އިތުރުވެފައިވާ ކަމަށެވެ. އަދި ޙަޤީޤީ އިންސާފު ޤާއިމު ކުރެވެމުންދާ ކަމުގެ އިހުސާސް މިއަދު ކުރެވެމުންދާ ކަމަށް އޭޖީ ވިދާޅުވިއެވެ.
އޭޖީ އިތުރަށް ވިދާޅުވީ، ފާއިތުވި އެއްވެސް ސަރުކާރަކުން ކަންކަމުގައި ދެފުއް ފެންނަ ގޮތަކަށް އަދި ޖަވާބުދާރީ ކުރުވޭ ގޮތަކަށް ކަންކަން އިންތިޒާމު ނުކުރާ މިންވަރަށް މި ސަރުކާރުން އެކަން ކުރަމުންދާ ކަމަށެވެ. އެއާއެކު ރައްޔިތުންގެ ޙައްޤުތަކާއި މިނިވަންކަން ހިމާޔަތް ކުރާނެ ޤާނޫނީ ވެރިކަމެއް ޤާއިމުވެގެން ދާތަން ފެންނަމުންދާ ކަމަށް އޭޖީ ވިދާޅުވިއެވެ.
