ފުރަތަމަ ދައުރުގައި އެންމެ 12 ޖަލްސާ، 53 ދުވަހު ޗުއްޓީ
މިއަދަކީ މިހާރު ހިނގަމުންދާ މަޖިލީހަށް 3 އަހަރު ފުރޭ ދުވަސް
މަޖިލީހުގެ މެޖޯރިޓީ އޮންނަ ސަރުކާރު ކޯލިޝަންގެ ބައެއް މެމްބަރުން
ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ޖަލްސާތައް ނިންމާލުމަށްފަހު 53 ދުވަހުގެ ދިގު ޗުއްޓީއަކަށްފަހު، ދެ ވަނަ ދައުރުގެ ޖަލްސާތައް އަންނަ ހޯމަ ދުވަހު ފެށުމަށް ނިންމައިފި އެވެ.
ޖޫން މަހުގެ ފަސް ވަނަ ދުވަހު މަޖިލީހުގެ މިއަހަރުގެ ދެވަނަ ދައުރުގެ ފުރަތަމަ ޖަލްސާތައް ފެށުމަށް ނިންމާ މަޖިލީހުގެ މެމްބަރުންނަށް އަންގާފައިވީ ނަމަވެސް ޖަލްސާގެ އެޖެންޑާ އަދި ނުނެރެ އެވެ.
މަޖިލީހުގެ ގަވާއިދުގައި ކަނޑައަޅާފައިވާ ދުވަހަށް ވުރެ ކުރިން، އޭޕްރީލް މަހުގެ މެދުތެރޭގައި މަޖިލިސް ޗުއްޓީއަށް ދިޔައީ، މަޖިލީހުގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލަ ހުށަހަޅައި މަގާމުން ވަކިކުރުމަށް އިދިކޮޅު ފަރާތްތަކުން މަސައްކަތް ކުރަމުން ދަނިކޮށެވެ. މަސީހުގެ މަގާމް ސަލާމަތްކޮށް ދިނީ، އިތުބާރު ނެތްކަމުގެ މައްސަލައިގައި ފުރަތަމަ ނެގި ވޯޓްގައި ވެސް، މަޖިލީހުގެ ގަވާއިދާ ހިލާފަށް ރޯލްކޯލް ވޯޓަށް ގޮސްގެންނެވެ. ދެ ވަނަ ފަހަރަށް ހުށަހެޅި މަސީހުގެ އިތުބާރު ނެތްކަމުގެ މައްސަލަ ބޭރުކޮށްލީ، މަޖިލީހުގެ ގަވާއިދަށް ބަދަލު ގެނައުމަށް ފަހު އެވެ. އެއަށް ފަހު މިހާރު ވަނީ، އިތުބާރު ނެތްކަމުގެ މައްސަލައެއް ފާސްކުރިޔަސް، ފަހުބަސް ބުނާނީ ސުޕްރީމް ކޯޓުން ކަމަށް އެ ކޯޓުން ނިންމައިފަ އެވެ.
މަސީހުގެ ރިޔާސަތުގެ ދަށުން 18 ވަނަ ރައްޔިތުންގެ ހިނގަމުންދާގޮތާމެދު ހިތްހަމަ ނުޖެހޭކަން ގިނަ މެމްބަރުންތަކެއް ފާހަގަކުރެ އެވެ.
މަޖްލީހުގެ ޖަލްސާތައް އެކަށީގެންވާ ގޮތެއްގައި ކުރިއަށް ނުގެންދާކަން ފާހަގަކުރެވޭއިރު، މިއަހަރުގެ ފުރަތަމަ ދައުރުގެ ޖަލްސާތައް ފަށާފައިވަނީ މިދިއަ ފެބްރުއަރީ މަހުގެ ހަ ވަނަ ދުވަހު އެވެ. ފުރަތަމަ ދައުރު އޭޕްރީލް މަހުގެ ނިޔަލަށް ކުރިއަށް ގެންދަންޖެހޭއިރު، އެންމެފަހުން މަޖިލީހުގެ ޖަލްސާއެއް ބާއްވާފައިވަނީ އޭޕްރީލް 12 ވަނަ ދުވަހު އެވެ. އޭގެ ފަހުން މަޖިލީހުގެ ޖަލްސާއެއް ބާއްވާފައި ނުވާއިރު، ރަސްމީކޮށް މަޖިލީހުގެ ޗުއްޓީ މަހަކީ މެއި މަހެވެ.
