"އެނަޖީ ވޭސްޓްވާތީ" ކަމަށް ބުނެ ފުލުހުންތަކެއް މީހަކަށް އަނިޔާކުރި މައްސަލައެއް!

އައްޑޫ ސިޓީގައި ފުލުހުންތަކެއް މީހަކަށް އަނިޔާކޮށް ބިރުދެއްކި މައްސަލައެއް ބަލައި ދިނުމަށް ރައްޔިތުންގެ މަޖިލީހުގައި އެދިއްޖެއެވެ.

އާއްމު ފަރާތަކުން މަޖިލީހުގެ ރައީސް މުހައްމަދު ނަޝީދު އަށް އެޑްރެސްކޮށް ލިޔެފައިވާ ސިޓީއެއް ގައި ބުނީ، ނޮވެމްބަރު މަހުގެ ނުވަ ވަނަ ދުވަހު ރޭގަނޑުގެ 11:00 ޖެހިހާއިރު ފޭދޫގެ މަގެއްގެ މަތީގައި ހުއްޓާ ފުލުހުންގެ އޮފިސަރުންތަކެއް ވެގެން އޭނާގެ ކޮއްކޮ އެމީހުންގެ ބެލުމުގެ ދަށަށް ގެންގޮސްފައިވާ ކަަމަށެވެ.

އެ ސިޓީގައި ބުނެފައިވަނީ، ހިތަދޫ ޕޮލިސް ސްޓޭޝަނަށް ކޮއްކޮ ގެންގޮސް ބިޑި އެޅުވުމަށްފަހު، ގައިގައި ތަޅައި، ޖިސްމާނީ އަނިޔާދީ، އޭނާގެ ކަންފަތް މަތީގައި ތަކުރާރުކޮށް ޖަހާފައިވާ ކަމަށެވެ. އޮފިސަރުން ވަނީ އޭނާގެ ކޮއްކޮ ބެޑް ޝީޓުން އައްސައި އެކޮޅުކޮޅުން ބާއްވާނެ ކަމަށް ބުނެ ބިރުދައްކާފައިވާ ކަމަށާއި، އަދި ގައިގައި ޖެހިކަން އެއްވެސް މީހެއްގެ ކައިރީގައި ބުނެފިނަމަ އޭނާއަށް "އަރުވާލާނޭ" ކަމަށް ބުނެ އިންޒާރުދީފައިވާ ކަމަށް އާއިލާގެ މެމްބަރު އާއްމުކޮށްފައިވާ ސިޓީގައި ބުންޏެވެ.

އަނިޔާ ލިބުނު މިހާގެ ދައްތަ ބުނީ، ފުލުހުންގެ ބެލުމުގެ ދަށުން ކޮއްކޮ ދޫކޮށްލިއިރު އޮފިސަރުންގެ ފަރާތުން ލިބުނު އަނިޔާގެ ސަބަބުން އޭނާގެ ވާތު ކަންފަތުގެ ތޫރި އިރައިގެން ގޮސްފައިވާ ކަމަށެވެ. ސިޓީ ފޮނުވި ފަރާތުން ވަނީ މި މައްސަލަ ބަލައި ދިނުމަށް މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީ ގައި އެދިފައެވެ.

ފުލުހުންތަކެއް މީހަކަށް އަނިޔާކުރި މައްސަލައެއް ފެންމަތިވެފައިވާއިރު، ހާލަތާއި ނުބައްދަލު ބާރުގެ ބޭނުން ފުލުހުން ބޭނުންކުރާ ކަމުގެ މައްސަލަތައް އަދިވެސް އަންނަނީ ފެންމަތިވަމުންނެވެ. އަދި ރައްޔިތުންނަށް އަނިޔާވެރިނުވާން ފުލުހުންގެ އިސްވެރިން އޮފިސަރުންނަށް އިލްތިމާސް ކުރަމުން ދިޔަ ނަމަވެސް އެފަދަ ކަންތައްތައް ކުރާ ކަމުގެ ޝަކުވާތައް އަދިވެސް ރައްޔިތުން އަންނަނީ ކުރަމުންނެވެ.