ބަހްރައިންގެ ބޮޑު ވަޒީރު ޝައިހް ޚަލީފާ އަވަހާރަވެއްޖެ

ބަހްރައިންގެ ބޮޑު ވަޒީރު ޝައިހް ޚަލީފާ ބިން ސަލްމާން އަލް-ހަލީފާ އަވަހާރަވެއްޖެ އެވެ.

ބަހްރައިންގެ ޝާހީ ގަނޑުވަރުން ބުނީ 84 އަހަރުގައި ޝައިހް ސަލްމާން އަވަހާރަވީ ބުދަ ދުވަހު ކަމަށެވެ. މިކަމާއި ބެހޭގޮތުން އިތުރު ތަފްސީލެއް އަދި ހާމަކޮށްފައެއް ނުވެ އެވެ.

ޝައިހް ސަލްމާން އަކީ 1970 ވަނަ އަހަރުން ފެށިގެން ބަހްރައިންގެ ބޮޑު ވަޒީރުކަން ކުރަމުން އަންނަ ބޭފުޅާއެވެ. މިހާތަނަށް މުޅި ދުނިޔެއިންވެސް އެންމެ ގިނަ ދުވަހު ބޮޑު ވަޒީރުކަން އަދާ ކުރެއްވި ކަމުގެ ލަޤަބު ލިބިފައިވަނީވެސް ޝައިހް ސަލްމާން އަށެވެ.

ސަލްމާން އަވަހާރަވި އިރު އެބޭފުޅާގެ 4 ދަރިކަލުން ދުނިޔޭގައި އެބަތިއްބެވެ. އެއީ އަންހެން އެއް ކަނބަލާއި ފިރިހެން 3 ބޭފުޅުންނެވެ. ސަލްމާން އަވަހާރަވެފައި ވަނީ އެމެރިކާގެ މަޔޯ ކްލިނިކްގަ އެވެ.