އުތުރުގެ މަސްވެރިކަން ވަރަށް ރަނގަޅު، މަސްވެރިންނަށް ދިމާވާ ދަތިތައް ހައްލުކުރުމަށް ގިނަ މަސައްކަތްތަކެއް އެބަކުރަން: މިފްކޯ
އުތުރުގެ މަސްވެރިކަން ރަނގަޅުވާ ކޮންމެ ފަހަރަކު ފެލިވަރުގެ ކެޕޭސިޓީ ފުރޭ
މަސްވެރިކަން ކުރާ އުޅަނދެއް، އުތުރަށް މަސްވެރިކަން ރަނގަޅު
އުތުރުގެ މަސްވެރިކަން ވަރަށް ރަނގަޅުކަމަށާއި ފެލިވަރުގެ ކެޕޭސިޓީ ފުރި މަސްވެރިންނަށް ދިމާވާ ދަތިތައް ހައްލުކުރުމަށް ގިނަ މަސައްކަތްތަކެއް ކުރަމުންގެންދާކަމަށް މިފްކޯއިން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން މިފްކޯގެ ސީއީއޯ އިސްމާއިލް ފައުޒީ ވިދާޅުވީ، އުތުރުގެ މަސްވެރިކަން ރަނގަޅުވާ ކޮންމެ ފަހަރަކު ފެލިވަރުގެ ކެޕޭސިޓީ ފުރޭ ކަމަށާއި އެކަން ހައްލުކުރުމަށް ގިނަ މަސައްކަތްތަކެއް ކުރަމުންދާކަމަށެވެ. އެގޮތުން ފެލިވަރުގައި ހުންނަ 700 ޓަނުގެ ކެޕޭސިޓީ ފުރި 2 ބޯޓެއްގައި މަސް ސްޓޯރކޮށް ކޫއްޑުއަށް ގެންދިއުމުގެ މަސައްކަތް ކުރަމުން ގެންދާކަމަށެވެ.
1200 ޓަނުގެ ކެޕޭސިޓީއެއް ދެ ބޯޓުގައި ހުރި އިރު ސްޓޯރ ކުރުވެނީ ފްރީޒްކޮށްގެން ކަން ފާހަގަކޮށް އިސްމާއިލް ވިދާޅުވީ، ކޫއްޑޫއަށް ބޯޓުން މަސް ގެންދިއުމުގައި ކޮޅަކަށް 36 ގަޑިއިރު ނަގާކަމަށެވެ. މިހާރު ބޭނުންކުރަމުން ދާ ދެ ބޯޓު، ކަލަމިންޖާ 402 އަދި 403 ވެސް މަސްބަރުކޮށް ކޫއްޑުއަށް މަސްބޭލުމަށްފަހު ފެލިވަރަށް ދަތުރުކުރަމުން އަންނަކަމަށެވެ.
އިސްމާއިލް ވިދާޅުވީ އުތުރުން ކޫއްޑުއަށް މަސްކިރަން ދިއުމަކީ މަސްވެރިންނަށްވެސް ވަރަށް ހަރަދު ބޮޑުވާކަމެއް ކަމަށާއި ވީހާވެސް އަވަހަކަށް އެކަން ހައްލުކުރުމަށް މަސައްކަތް ކުރަމުންދާކަމަށެވެ. އަދި، މި މަސައްކަތުގައި މަސްވެރިން ދެއްވާ އެއްބާރުލުމަށް އޭނާ ވަނީ ޝުކުރު އަދާކުރައްވާފަ އެވެ.
