ދުނިޔޭގެ ނިސްބަތުން ގާއިމުކުރެވޭ އެންމެ ބޮޑު ފްލޯޓިންގ ސޯލާ ނިޒާމު ރާއްޖޭގައި ގާއިމުކުރަނީ
ދުނިޔޭގެ ނިސްބަތުންވެސް މިގޮތަށް ގާއިމުކުރެވޭ އެންމެ ބޮޑު ފްލޯޓިން ސޯލާ ނިޒާމަށްވާނެ
ދުނިޔޭގެ ނިސްބަތުންވެސް މިގޮތަށް ގާއިމުކުރެވޭ އެންމެ ބޮޑު ފްލޯޓިން ސޯލާ ނިޒާމަށްވާނެ
ވޯރލްޑް ބޭންކުގެ އެހީގައި 36 މެގަވޮޓް ސޯލާ ޕީވީ ހައިބްރިޑް ސިސްޓަމް ގާއިމުކުރުމުގެ މަޝްރޫޢެއް ފެށުމަށް ތައްޔާރުވަމުން އަންނަ ކަމަށް އެންވަޔަރަންމަންޓް މިނިސްޓަރ ޑރ ހުސައިން ރަޝީދު ހަސަން ވިދާޅުވެއްޖެ އެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރަށް ދެ އަހަރު ފުރުމުގެ މުނާސަބަތުގައި "ރާއްޖެޓީވީން ގެނެސްދޭ ޚާއްސަ ކަވަރޭޖަށް މިނިސްޓަރ ދެއްވި އިންޓަރވިއުގައި އެވުޒާރާއިން ފާއިތުވި ދެ އަހަރު ދުވަހުގެ ތެރޭގައި ހާސިލްކުރެވިފައިވާ މުހިންމު ކަންތައްތަކާއި ގުޅޭގޮތުން ވަނީ ވާހަކަ ދައްކަވާފައެވެ. އެގޮތުން އިޔާދަކުރަނިވި ހަކަތައިގެ ދާއިރާއިން ހާސިލްކުރެވިފައިވާ މުހިންމު ކަންތައްތަކާއި ކުރިޔަށް ހުރި މަޝްރޫޢުތަކާއި ގުޅޭގޮތުން ވާހަކަ ދައްކަވަމުން މިނިސްޓަރ ވިދާޅުވީ މިއީ ވޯރލްޑް ބޭންކުގެ 313 މިލިއަން ޑޮލަރުގެ މަޝްރޫޢެއް ކަމަށެވެ. މިމަޝްރޫޢުގެ ދަށުން 10 މެގަވޮޓް ޖަހަނީ ފްލޯޓިންގ ގޮތަށް ފެންމަތީގައި ކަމަށް މިނިސްޓަރ ވިދާޅުވިއެވެ.
މީގެއިތުރުން މިނިސްޓަރ ވިދާޅުވީ ޕަވަރ ޕާރޗޭސް އެގްރިމެންޓްގެ ދަށުން 5 މެގަވޮޓް ސޯލާ ޖެހުމުގެ މަސައްކަތް މިހާރު ވަނީ ތައިލެންޑް ކުންފުންޏަކާ ހަވާލުކުރެވިފައި ކަމަށެވެ. އަންނަ މަހު މިމަޝްރޫޢުގެ އަމަލީ މަސައްކަތް ފެށުމަކީ އެކަށީގެންވާކަމެއް ކަމަށް މިނިސްޓަރ ވިދާޅުވިއެވެ. މިމަޝްރޫޢުގެ ދަށުން މާލެ އާއި ހުޅުމާލެ ގުޅުވާ ލިންކް ރޯޑް ސަރަހައްދުގައި 5 މެގަވޮޓްގެ ސޯލާ ޖަހާނެ ކަމަށް މިނިސްޓަރ ވިދާޅުވިއެވެ. އޭރުން މާލެ އާއި ހުޅުމާލެއަށްވެސް ކަރަންޓް ލިބިގެންދާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރައްޔިތުންނަށް ހެޔޮ އަގުގައި ކަރަންޓް ފޯރުކޮށްދިނުމަށްޓަކައި 2019 ގެ ތެރޭގައި ގެނައި ބަދަލުތަކުގެ ތެރެއިން ރާއްޖޭގެ ހުރިހާ ރަށެއްގައި ޑޮމެސްޓިކް ކެޓަގަރީގައި 400 ޔުނިޓަށްވުރެ މަތީގެ ބޭނުންތަކަށް ނަގަމުން އައި އަގުގެ ފަރަގު މިހާރު ވާނީ ނައްތާލާފައި ކަމަށެވެ. އަދި އަތޮޅުތަކުގެ ވިޔަފާރީގެ ބޭންޑްތަކުގެ އަގުގެ ތަފާތުކަންވެސް މިއާއެކު ނައްތާލާފައިވާ ކަމަށް މިނިސްޓަރ ވިދާޅުވިއެވެ. އަދި ޑީސަލުން ނަގަމުން އަންނަ 5 ޕަސެންޓްގެ ޑިޔުޓީ ސަރުކާރުން ހުއްޓާލީ އެގޮތުން ލިބޭ ފައިސާ ކަރަންޓް އަގުހެޔޮ ކުރުމަށް ޚަރަދުކުރުމަށް ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިދައުރުގެ ތެރޭގައި މިހާތަނަށް ކުރެވުނު މުހިންމު އެއް މަސައްކަތަކީ ނެޓް މީޓަރިންގ ގެ ގަވާއިދު އިސްލާހުކުރުން ކަމަށެވެ. މިއިސްލާހާއެކު މީހުންގެ ގޭގޭގައި އެމީހުން އަމިއްލައަށް ސޯލަރ ޕީވީ ހަރުކުރެވޭނެ ކަމަށް މިނިސްޓަރ ވިދާޅުވިއެވެ.
މާލޭގެ މަގުތަކުގައި ޖަހާފައި ހުރި މަގުބައްތިތައް ލެޑް ލައިޓަށް ބަދަލުކުރުމުގެ މަޝްރޫޢުގެ ދަށުން މާލޭގައި މިހާރު 2650 ލެޑްލައިޓް ހަރުކޮށްފައިވާ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އަމާޒަކީ އާންމު ރައްޔިތުން ކަރަންޓް ބޭނުންކުރާ ގޮތް ބަދަލުކޮށް އިސްރާފުކުޑަކުރުން ކަމަށެވެ.
