ޕޯޗުގަލުގެ ތަރި ކްރިސްޓިއާނޯ ރޮނާލްޑޯ ވިއްކާލަން ޔުވެންޓަސްއިން މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

ރެއާލް މެޑްރިޑް ދޫކޮށް އުމުރުން 35 އަހަރުގެ ރޮނާލްޑޯ ޔުވެންޓަސްއަށް ބަދަލުވީ 2018 ވަނަ އަހަރުގެ ޖުލައި މަހުގެ ތެރޭގައި 100 މިލިޔަން ޔޫރޯއަށެވެ. އެފަހަރު ރޮނާލްޑޯ ވަނީ ޔުވެންޓަސްއާއެކު ހަތަރު އަހަރުގެ އެއްބަސްވުމެއް ހަދާފައެވެ.

މީގެ ކުރިން ރެއާލް މެޑްރިޑާއެކު ޔުއެފާ ޗެމްޕިއަންސް ލީގު ހަތަރު ފަހަރު ރޮނާލްޑޯ ކާމިޔާބުކުރި ނަމަވެސް، އޭނާއަށް ޔުވެންޓަސްއާއެކު އަދި މިހާތަނަށް ޗެމްޕިއަންސް ލީގު ކާމިޔާބުކުރެވިފައެއް ނުވެއެވެ. އެގޮތުން މިދިޔަ ސީޒަނުގެ ޗެމްޕިއަންސް ލީގުން ޔުވެންޓަސް ވަނީ ދެވަނަ ބުރުން ކަޓާފައެވެ.

ޔުވެންޓަސްއާއެކު ރޮނާލްޑޯ ހަދާފައި އޮތް އެއްބަސްވުން 2022 ވަނަ އަހަރު ހަމަވާއިރު، އަންނަ އަހަރުގެ ހޫނު މޫސުމުގެ ޓްރާންސްފާގައި އޭނާ ވިއްކާލަން ޔުވެންޓަސްއިން މަސައްކަތް ކުރަމުން އަންނަ ކަމަށް ރިޕޯޓުތައް ބުނެއެވެ. އެއާއެކު ޕީއެސްޖީން ރޮނާލްޑޯ ހޯދުމަށް މަސައްކަތް ފަށާފައިވާ ކަމަށްވެސް ވަނީ ރިޕޯޓުކޮށްފައެވެ.

ދާދި ފަހުން ދިން އިންޓަވިއުއެއްގައި ޕީއެސްޖީގެ ސްޕޯޓިންގ ޑިރެކްޓަރު ލިއެނާޑޯ ބުނީ ރޮނާލްޑޯ ހޯދުމާ މެދު ޕީއެސްޖީން ގޮތެއް ނިންމާފައިނުވާ ކަމަށާއި، އެކަމަކު ކުރިމަގުގައި ވާނެ ގޮތް ބުނަން ނޭނގޭ ކަމަށެވެ. އެކަމަކު ޓްރާންސްފާ ބާޒާރަށް ޕީއެސްޖީން ފުރިހަމައަށް ތައްޔާރުވާނެ ކަމަށާއި، ރޯނާލްޑޯ ގަތުމުގެ ފެންވަރު ޕީއެސްޖީގައި ހުރިނަމަ އެ ފުރުސަތު ލިބޭ ހިނދަކު އޭގެ ބޭނުން ހިފުމަކީ އެކަށީގެންވާ ކަމެއް ކަމަށްވެސް އޭނާ ބުންޏެވެ.

ރޮނާލްޑޯ ވިއްކާލަން ޔުވެންޓަސްއިން މަސައްކަތް ކުރަމުން އަންނަ ކަމަށް ރިޕޯޓުތައް ބުނި ނަމަވެސް، މީގެ ކުރިން ޔުވެންޓަސްގެ ރައީސް އަންދްރޭ އެގްނެލީ ވަނީ ރޮނާލްޑޯއަކީ ވިއްކާ ކުޅުންތެރިއެއް ނޫން ކަމަށާއި، މާލީ ގޮތުން ޔުވެންޓަސް އަޑިއަޅާލި ކަމުގައިވީ ނަމަވެސް، ރޮނާލްޑޯ ވިއްކާ ނުލާނެ ކަމަށް ބުނެފައެވެ.

ޔުވެންޓަސްގައި ރޮނާލްޑޯ މިހާތަނަށް މޮޅު ކުޅުމެއް ދައްކާފައިވާއިރު، އޭނާ ވަނީ ޔުވެންޓަސްއަށް ކުޅެދިން 94 މެޗުގައި 71 ލަނޑު ޖަހާފައެވެ. އަދި ވަނީ މިހާތަނަށް ޔުވެންޓަސްއާއެކު އިޓާލިއަން ލީގު ދެ ފަހަރު އަދި އިޓާލިއަން ސުޕަ ކަޕް އެއް ފަހަރު ކާމިޔާބުކޮށްފައެވެ.