ދުވާފަރުގައި ކުޑަކުއްޖަކު ރޭޕް ކުރި މީހަކު 15 އަހަރަށް ޖަލަށް ހުކުމްކޮށްފި
އޭނާ ޖަލަށް ލާފައި ވަނީ 15 އަހަރަށް
ރ. ދުވާފަރު
ރ. ދުވާފަރުގައި ކުޑަކުއްޖަކު ރޭޕް ކުރިކަމުގެ ކުށް ސާބިތުވެ ދައުވާލިބޭ މީހާ 15 އަހަރަށް ޖަލަށް ލާން ކްރިމިނަލް ކޯޓުން ހުކުމްކޮށްފިއެވެ.
އަންގާރަ ދުވަހު ކުރި މި ހުކުމާއި ގުޅޭ ގޮތުން ޕްރޮސެކިއުޓަރ ޖެނެރަލް (ޕީޖީ) ހުސައިން ޝަމީމް ކުރެއްވި ޓްވީޓެއްގަިއ ވިދާޅުވީ ދުވާފަރުގައި ކުޑަކުއްޖަކު ރޭޕް ކުރި މައްސަލަ ސާބިތުވެފައިވާ ކަމަށާއި މިއީ ލިބުނު ބޮޑު ކާމިޔާބީއެއް ކަަމަށެވެ.
ޝަމީމް ވިދާޅުވީ ކުށް ސާބިތުވެފައި ވަނީ ޑީއެންއޭ ހެއްކާއި އަނިޔާ ލިބުނު ކުއްޖާގެ ބަޔާނާއި މެޑިކަލް ރިޕޯޓްތަކުގެ މައްޗަށް ބަޔާންކޮށް ކަމަށެވެ.
ކުޑަކުދިންނަށް ޖިންސީ ގޯނާ ކުރާ މައްސަލަތަކަށް ޚާއްސަ އިސްކަމެއް ދީގެން ބަލަމުންދާއިރު، އެފަދަ ގިނަ މައްސަލަތައް ފާއިތުވި ދުވަސްތަކުގައި ނިންމާފައިވެއެވެ. އަދި ގިނަ ދުވަސްވީ މައްސަލަތައް މިހަރުވެސް ނިންމަމުންދާކަން ފާހަގަ ކުރެވެއެވެ.
ދާދިފަހުން މީޑިއާއަކަށް ދެއްވި އިންޓަވިއުއެއްގައި ޕީޖީ ޝަމީމް ވަނީ ކުޑަކުދިންނަށް ޖިންސީ ހާނިއްކައެއް ދީފައި ސަލާމަތް ވެގެން ރީތިކޮށް ނޫޅެވޭނެ ކަމާއި، އެފަދަ ކަންކަން ކުރާ ފަރާތްތަކަށް ދައުވާކޮށް، އަދަބު ވެސް ދެވޭނެކަން އަދި ޖަލަށް ވެސް ލާނެކަން ރައްޔިތުންނަށް އެނގޭނެ ކަމަށް ވިދާޅުވެފައެވެ.
