މިއަހަރު ނިމޭއިރު ރާއްޖޭގެ އިގްތިޞާދު 29.3 އިންސައްތަ ދަށަށްދާނެ

މިއަހަރު ނިމޭއިރު ރާއްޖޭގެ އިގްތިޞާދު 29.3 އިންސައްތަ ދަށަށްދާނެ ކަމަށާއި މިއީ މީގެ ކުރިން އަހަރެއްގެ ތެރޭގައި ދުވަހަކުވެސް އިގްތިޞާދު ދަށްވި މިންވަރެއް ނޫން ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެ އެވެ.

މިނިސްޓަރ ވިދާޅުވީ ކޮވިޑް-19 އާއި ގުޅިގެން ރާއްޖޭގެ އިގްތިޞާދު ވަރަށް ބޮޑަށް ދަށަށް ގޮސްފައިވާކަމަށެވެ. މިގޮތުން މި ކަމުގެ އަސަރު ރާއްޖޭގެ ހުރިހާ ސިނާއަތަކަށް ކޮށްފައިވާކަމަށެވެ. އަދި ފަތުރުވެރިން ރާއްޖެ ޒިޔާރަތްކުރާ މިންވަރު މި އަހަރު 65 އިންސައްތަ ދަށަށް ދާނެ ކަމަށާއި އެއާއެކު ފަތުރުވެރިކަމުގެ ދާއިރާ 68 އިންސައްތަ ދަށަށް ދާނެކަމަށް ބެލެވޭ ކަމަށް މިނިސްޓަރ ވިދާޅުވި އެވެ. އަދި އިމާރާތްކުރުމުގެ ދާއިރާއަށްވެސް ވަނީ 11 އިންސައްތައިގެ ދަށްވުމެއް އައިސްފައި ކަމަށް މިނިސްޓަރ ވިދާޅުވި އެވެ.

Advertisement

މިނިސްޓަރ ވިދާޅުވީ ދުނިޔޭގެ އެހެން ގައުމުތަކެކޭ އެއްފަދައިން، ރާއްޖޭގެ ވަޒީފާގެ ބާޒާރަށް ބަލާއިރު، ކޮވިޑް-19 އާ ގުޅިގެން އިޤްތިސާދުގައި ވަޒީފާތައް މަދުވެފައިވާ ކަމަށެވެ. ޖޮބް ސެންޓަރުގެ ހިސާބުތަކަށް ބަލާއިރު، އޭޕްރީލުން ސެޕްޓެމްބަރު މަހުގެ ނިޔަލަށް12,000އަށްވުރެ ގިނަ މީހުން ވަޒީފާ ގެއްލިގެން ނުވަތަ އާމްދަނީއަށް ނޭދެވޭ އަސަރުކޮށްގެން ޖޮބް ސެންޓަރަށް ހުށަހަޅާފައިވާ ކަމަށް މިނިސްޓަރ ވިދާޅުވި އެވެ.

މިނިސްޓަރ ވިދާޅުވީ ކޮވިޑް-19 ބަލިމަޑުކަން ދުނިޔޭގައި ފެތުރެން ފެށުމާއެކު، ދިވެހި ސަރުކާރުގެ އެންމެ ބޮޑު އަމާޒަކަށްވީ ވައިރަސްއާ ކުރިމަތިލުމުގެ ޤާބިލުކަން ގާއިމްކުރުން ކަމަށެވެ. މިއީ އިޤްތިސާދީ ހަރަކާތްތައް އަލުން ފެށުމަށާއި، ރައްޔިތުންގެ ރައްކާތެރިކަމަށް މުހިއްމުވި ފިޔަވަޅުތަކެއް ކަމަށް މިނިސްޓަރ ވިދާޅުވި އެވެ.

ރާއްޖޭގެ އިޤްތިސާދު ދަށްވެ، ވަޒީފާތަކަށް އަސަރުކުރުމުން، ދައުލަތުގެ ބަޖެޓުގެ އަމާޒަކަށްވީ އިޤްތިސާދު ހިފެހެއްޓުމާއި، ރައްޔިތުންނަށާއި ވިޔަފާރިތަކަށް ދިމާވެފައިވާ ނިކަމެތިކަމަށް އެހީތެރިވުން ކަމަށް މިނިސްޓަރ ވިދާޅުވިއެވެ. ކޮވިޑް-19 އާއެކު ރާއްޖޭގެ ރައްޔިތުންނަށް ބޭނުންވާ އަސާސީ ތަކެތީގެ ރައްކާތެރިކަން ކަށަވަރުކުރި ކަމަށާއި މިގޮތުން ކާޑާއި ޒަރޫރީ ތަކެތި ހޯދައި ސްޓޮކް ކުރުމަށް 84 މިލިއަން ރުފިޔާ ހޭދަކުރެވުނު ކަމަށް މިނިސްޓަރ ވިދާޅުވި އެވެ.

އަދި، ރައްޔިތުންނަށާއި ވިޔަފާރިތަކަށް ދިމާވި ދަތި ހާލަތަށް އެޑްރެސްކުރުމުގެ ގޮތުން އިކޮނޮމިކް ރިލީފް ޕެކޭޖެއް ތައާރަފްކުރެވުނު ކަމަށް މިނިސްޓަރ ވިދާޅުވި އެވެ.

މި ކަންކަން ކުރުމަށް ބަޖެޓުން ޖާގަ ހޯދީ ޚަރަދުތައް ކުޑަކޮށްގެން ކަމަށް މިނިސްޓަރ ވިދާޅުވިއެވެ. އެގޮތުން ސިޔާސީ ފަރާތްތަކާއި ބޮޑެތި މުސާރަލިބޭ ފަރާތްތަކުގެ މުސާރަތައް ކުޑަކުރެވިފައިވާއިރު ފެށިފައިނުވާ ހުރިހާ މަޝްރޫޢުތަކެއް މަޑުޖައްސާލެވުނު ކަމަށް މިނިސްޓަރ ވިދާޅުވި އެވެ. މިގޮތުން 2020 ވަނަ އަހަރަށް ފާސްކުރެއްވި 37.9 ބިލިއަން ރުފިޔާގެ ބަޖެޓު ގާތްގަނޑަކަށް 27 ބިލިއަން ރުފިޔާއަށް ވަނީ ކުޑަކޮށްފައި ކަމަށް މިނިސްޓަރ ވިދާޅުވި އެވެ.

ނަމަވެސް، ކޮވިޑް-19 އާ ގުޅިގެން އިތުރުވި ޚަރަދުތަކާއެކު، 2020ވަނަ އަހަރުގެ މުރާޖަޢާކުރި ބަޖެޓުގެ ޖުމުލައަކީ 31.8 ބިލިއަން ރުފިޔާ ކަމަށް މިނިސްޓަރ ވިދާޅުވި އެވެ. އަދި މިއީ މި މަޖިލީހުން މި އަހަރަށް ފާސްކުރި މިންވަރަށްވުރެ 6.1 ބިލިއަން ރުފިޔާ ކުޑަ އަދަދެއް ކަމަށް މިނިސްޓަރ ވިދާޅުވި އެވެ.

މިނިސްޓަރ ވިދާޅުވީ ފިސްކަލް ޕޮލިސީ އަކީ ޤައުމުގެ އިޤްތިސާދު ނެގެހެއްޓުމަށް އެހީތެރިވެވެން އޮތް އެންމެ މުހިއްމު ވަސީލަތް ކަމަށެވެ. އެހެންކަމުން މި ދަނޑިވަޅަކީ ކައުންޓަރ ސިކްލިކަލް ފިސްކަލް ޕޮލިސީއެއް ދަމަހައްޓަން ޖެހޭ ދަނޑިވަޅެއް ކަމަށް މިނިސްޓަރ ވިދާޅުވި އެވެ.

މިއާއެކު، ބަޖެޓު ފައިނޭންސްކުރުމަށްޓަކައި، ދަރަނި ނަގަންޖެހޭ މިންވަރު ވަނީ އިތުރުވެފައި ކަމަށް މިނިސްޓަރ ވިދާޅުވި އެވެ. ދައުލަތުގެ ދަރަނި 2020 ވަނަ އަހަރު ނިމޭއިރު ހުންނާނެކަމަށް ބެލެވެނީ 70.3 ބިލިއަން ރުފިޔާގަ އެވެ. މިއީ ޖީ.ޑީ.ޕީގެ ނިސްބަތުން 121.4 އިންސައްތަ އެވެ.